Remdaihnak cu nuclear hriamnam nih aser kho lo, hriamnam hlohnak lawng nih a ser khawh
Pope nih a chimmi “Hriamnam hlohnak, Daihnak lam kawlnak, Daihnak cu Laksawng asi” timi tlangtaar in Vatican zung cachuahnak nih cauk an chuah. Cu cauk cu Alessandro nih edit a tuah i 2025 May 8 ah Pope ah thim a rak sinak thawk in nihin ni tiang Pope Leo nih hriamnam hloh in daihnak lam kawl a herhnak kong a chimmi chung in komh in Italy holh in cauk an chuah cang tiah theih asi. Cu cauk chung ah aa telmi cu Pope nih a chuah ballo mi cauk asi i a rauh hlan ah Miraang Holh zong in an chuah lai ti asi.
“Nan sin ah daihnak um ko seh,” ti mi cu thihnak in a thoṭhan mi Khrih Jesuh nih a zultu hna sin ah a hmasabik a biakchawnhnak bia asi(Jn 20:19). Hi bia cu Khrih nih thihnak in a thawhṭhan hnu ah a zultu hna le vawlei mi vialte caah a hmasabik a pekmi laksawng zong a si fawn. Cu laksawng (daihnak) cu fawi tein hmuhmi le ngahmi asi lo. Nazareth khua mi Jesuh nih huatnak, hremnak, thahnawnnak le vailam cung thihnak tiang a in i, hriamnam hmang loin fahnak le thihnak kha a in. Thihnak in a tho i thawngṭha a phuan i a luancia kum 2000 lio in nihin ni tiang a ingtuar ve.
Dainak cu minung nih duhbik mi le lungthin a cawlcanghtertu bik asi ko nain, atu le atu hrocer le lamhchih asi tawn. Tu lio kan vawlei ah ram 103 hrawng cu phunkhat khat in raltuknak ah an i tel hna. Ukraine,Midle East, Sudan, Kawlram, Yemen, Congo le hmun dangdang hna ah meithal le bom puak thawng an thang i nifatin nunnak liam le a thi mi an um. Vawlei ralpi pahnihnak a dih hnu ah kan ton ballo mi buainak le i tukdohnak a karh chin lengmang caah Pope Francis nih hi kong he pehtlai in vawlei ralpi a pathumnak thawhnak an si tiin ralrin a rak pek mi kha atu ka chimmi le ka au pi mi he an i naih. Abiapibik mi cu “daihnak” ti mi cu ṭuanvo lak(reponsibility) asi. Abiana ah buaibainak, i sikhuatnak a chuah tikah, asiloah, namneh rialdip serhsatnak kan ton tikah mi dang cungah sualphawtnak, mawchiatnak in kan lehrulh hna ahcun kan minung hawi he i huat i remlonak le zeirel lonak hna a karh chin lai. Daihnak ser loin rualremnak kha kan hrawh chin tawn. Daihnak cu kanmah nih kan thawk hmasa a hau.