JESUH KHRIH A FAPA NGEIHCHUNH, KAN BAWIPA
Jesuh: : Hebru holh in Jesuh timi sullam cu “Pathian nih a khamh” ti a si. Vancungmi Gabriel nih Mary sin thawng a thanh lioah mah min cu a pek. Jesuh min nih a sining le a rianṭuannak kha a langhter. (Lk. 1:21). Pathian lawng nih sualnak kha a ngaihthiam khawh. Cucaah minung a cangmi Pathian Fapa Jesuh nih “A miphun kha an sualnak in a khamh hna lai” (Mt. 1:21, 2:7).
Khamhnak tuanbia ah Pathian nih Israel mi kha sal cannak lawngin luatter men kha a duh hna lo. (Deut. 5:6). An sualnak zongin khamh a duh hna. Zeicahtiah sualnak cu Pathian cungah sual a si zungzal caah amah lawng nih a ngaihthiam khawh. (Ps. 51:4, 12). Cucaah Israel mi nih Khamhtu Pathian min auh loin khamhnak kha an kawl kho lo. (Ps. 72:9).
‘Jesuh’ timi min nih Pathian hrimhrim hi a Fapa chungah a um i minung sualnak vialte kha a khamh khotu a si, ti a langhter. Mah hi khamhnak a pemi Pathian min a si. Cucaah mi vialte nih amah min kha an auh khawh. Zeicahtiah Jesuh nih amah le amah kha minung cannak in mi vialte he aa kawm dih. (Jn. 3:18, Lam. 2:21, 5:41, IIJn 7, Rom. 10:6-13). “Cucaah vanrang tangah khamhnak a kan pe khotu mindang a um ti lo. (Lam. 4:12, 9:14, Jam. 2:7).
Khamhtu Pathian min cu tlangbawi ngan nih Israel mi sualthlahnak caah kumkhat ah voikhat lawng an auh tawn. (Ex. 25:22, Lev. 16:2, 15-16, Num. 7:29, Sir. 50:20, Heb. 9:5-7). Mithiang Paul nih, “Pathian nih a thi in sual thenhnak a pek,” tiah Jesuh kong a chim tikah a chim duhmi cu Khrih minung sinak chungah Pathian cu a um i vawlei he remnak a tuah,” ti kha a si. (Rom. 3:25, IICor. 5:19).
Jesuh a thawhṭhannak nih Pathian min kha a liannganter chinchin. Zeicahtiah khi caan thawkin Jesuh min cu min vialte lakah min sungbik ṭhawnnak he a tlingmi min ah a cang. (Phil. 2:9-10, Jn. 12:28). Khuachia nih amah min kha an ṭih. (Lam. 16:16-18, 19:13-16). Amah min in zultu hna nih khuaruahharnak kha an tuah. (Mk. 16:17). Zeicahtiah Pathian nih amah min in halmi vialte cu a pek dih hna. (Jn. 15:16).
Jesuh min cu Khrihfa mi thlacamnak lung chungah a um. Kan thlacamnak vialte cu, “Kan Bawipa Jesuh Khrih min in kan nin hal,” tiin kan donghter. “Maw, Mary, thlacamnak ah “Na chungchuak Jesuh kha thluachuahnak a hmu” kan tinak ah Bawipa min cu a sannak bik a phan. Nichuahlei Khrihfa hna an thlacamnak pakhat, “Jesuh Thlacamnak” an timi ah, “Bawipa Jesuh Khrih, Pathian Fapa, kei misual hi ka zaangfah tuah,” a ti. Mithiang Joan of Arc bantuk mithiang tampi hna cu, “Jesuh” tiin kaakhat te an chim i an thi.