Jesuh cu kan damnak siibawi ṭha a si’
Nihin ni tiang caan ṭha, caan sunglawi a kan petu kan biakmi kan Pathian a min thangṭhat si ko seh! Nitin RVA in Pathian bia thazaang a laatu zumtu nan dihlak cungah a thar in Bawipa nih thluachuah in pe ko hna seh.
Nihin voikhatnak kan relmi Micah 2:1-5, Salm 10:1-14, Mt 12:14-21 tiang. ‘Cun Farasi mi hna cu an kal i Jesuh thah khawhnak ding khua kha an khaan. Cucu Jesuh nih a theih tikah cuka hmun cun lo diam in a kal i, mi tampi nih an zulh. A zawmi vialte kha a damter hna i amah kong kha midang nan chim lai lo tiah a thlauh hna. Cu tiin a tuah cu Pathian nih Isaiah kaa in hika i a ummi hi ka thimmi ka sal a si, ka dawt i a cung i ka lung a tlingmi a si. Amah cung ahcun ka thlarau kha ka chiah lai i, miphun vialte hna sinah ka biading kha a thanh hna lai. Bia kha a al len hna lai lo i, a au zong a au len lai lo. Dinnak kha teinak ah a phakter hlan tiang, a kiakmi phai kung kha hlan koin a khiak lai lo i, a mit dengmang mi mei-inn kha a mui lai lo. Amah cu miphun vialte nih an i bochan lai tiah a timi kha tlinternak caah a si.’
‘A zawmi vialte kha a damter hna.’ Jesuh cu kan damnak siibawi ṭha a si timi in thazaang laa hna usih. Nihin a voikhatnak kan relmi Micah 2:1-5 chungah; ‘misifak a hremtu hna cungah nizahnak tlung ko seh, an inn an lo le an thilri a chut mi hna cungah rawhralnak tlung ko seh, aho hmanh an luat kho lai lo’ tiah a ti.
Phungthlukbia 17:1-5 chungah; ‘misifak nehsawh cu a sertu nehsawh kha a si. Mi nih vanchiat an ton lioah a di a riammi cu dantatnak in an luat lai lo’ tiah a ti. Mi nih zeirel lomi, mi nih an hlawt mi hna kha a dawtu le a cohlangtu cu nihin kan biakmi kan Pathian a si.
Voihnihnak Salm kan relmi 10:1-14 chungah ‘miṭhalo mi cu an ruam a kai i misifak kha an hrem hna. Mi ṭhalo mi hna kut chungin ka khamh tuah. Maw Bawipa, ra law ka khamh tuah.’ Bawmhnak a herhmi hna kha na bawmh zungzal hna caah vanchia mi nih nangmah kha an in fuh. Bawipa a fuhmi le aa bochan mi vialte cu damnak, hnangamnak, lawmhnak, daihnak an hmuh timi hi nihin thawngṭhabia cu a si.
Bawipa lawnglawng hi kan damnak, Bawipa lawnglawng hi a kan bawmtu le a kan dawtu a si. Nihin kutzeng mi pa a damnak le zawtnak a phunphun a ingmi vialte an damnak cu Bawi Jesuh thawngin a si. Unau nang tah na dam maw? Zei zawtfahnak nih an tlaih? Nihin Salm chung kan relmi ‘Maw Bawipa ra law ka khamh tuah’.
Nihin Thawngṭhabia ‘Jesuh sin a rami vialte cu Jesuh nih a damter hna. Jesuh sin ra law Jesuh cu kan damnak siibawi ṭha a si’. A ngaitu nan dihlak cungah Pathian nih thluachuah in pe ko hna seh! Kaa lawm!
Thazang petu /- Saya Francis Khua Pheng