Roco Phungphai

Audio (aw) zongin ngai khawh a si.

1.Hmun le innpi ro i conak  

Hakha Lai miphun ahhin innchungkhar ro i co tikah, unau rual lakah hmunpi le inn cu a hniangbik nih co a si tawn.

Hakha khua i a ummi Sangtechung Pu Lian Nawn nawl a ngeih hlan ahhin, a hniangbik nih co a rak si. Asinain amah chan a phak tikah ‘upabik nih ro co si cang seh’ tiah a ti caah ro cu a hniang in upa bik ah aa ṭhial.

Hi bantukin ro aa ṭhialnak cu Sangpi, Sangte, Darkhuah, Nguntual, Vaingam, Hranglung, Khenglawt le Thlaceu chung phun hna nih an zulh ve hna i a hniang bik nih co si ti loin, upa bik nih co a si colh cang. Asinain an rak zulh tawn mi pupa phungphai ro conak cu an hlaw kho dih rih lo.

A hniangbik nih hmunpi le inn co ding a si nain a tanglei hna ruang ahhin a sung lai.

-Zei kong a si hmanh ah a co ding kha aa ngol, a un, a nuar i aa hnolh ahcun a co kho ti lai lo.

-Hringtu a pa sinah hmaitonh, fiang tein ṭhatlonak a tuah le a pa lung a ton lo ahcun an unau rual lakah a pa nih a duhmi a coh ko hna lai.

-A hniangbik pa cu thinghmui hma a in sual, a hruhngat sual a si ahcun, a unau dang sinah a kal lai.

Unau pathum an si ahcun a hniangbik nih a pa inn le hmun cu a co lai. Mah pa cu fa ngei loin a thih ahcun upabik nih a co lai. mah upabik le mah a unau kha sikhuatnak, chiatserhnak, i ralnak an ngeih ahcun milai pa nih hmun le innpi cu a co lai.

Unau panga chuak an si i upabik nih nupi ngei in inn dang ah a chuah cang ahcun le an unau rual nupi ṭhi loin an um cio ahcun a hniangbik nih a co lai. An nau hniangbik zong a thih ahcun palinak pa nih a co lai. Upabik pa cu nupi a ngei cang i hmundang i a um cang caah hmun le innpi cu a sung lai.

Unau panga chuak an si i tlangval lawngte an si i hmunkhat ah khua an sak ahcun a hniangbik nih inn le hmun cu a co lai. Cu a hniang pa cu ro cotu ngei loin a thih ahcun, upa bik sinah khan aa ṭhial lai. A thih ve i cotu ngei loin an um ahcun a tangmi hna lakin a hnianglei bikin upa lei bik tiang (4nk in 2nk ah) a changchang in an co lai.

Unau chuak panga lakah pali cu nupi an ngeih dih i a hniangbik nih inn le lo a co tikah tefa thlau loin a hniangbik cu a thih ahcun upa bik sinah a kal lai. A thih ve ahcun palinak pa sinah aa ṭhial lai.

Unau panga an chuak i upa bik le pahnihnak, pathumnak nupi an ngeih i inn dang i an chuah cang i pathumnak le a hniang bik lawng inn an an um hnga. Cu tikha a hniang bik nih innpi le ro cu a co ko i, tefa thlau loin a thih ahcun milai, pathumnak, innchung ngei lo pa nih a co hlei lai lo i upa bik sinah ro cu aa ṭhial ko lai.