Reithei le thilrit mi vial te hna ka sin ah ra tuah u, dinh nak kan pe hna lai

Bawi Khrih ah dawt mi u le nau hna Hakha Service a ngai tu nan dih lak cungah bawipa nih a thar in thluachuah za in pe ko hna seh. 

Nihin kan nu bupi nih a kan thimpiak mi (Matthai 11: 28-30) chung ah “re theih le thil rit mi vial te hna ka sin ah ra tuah u dinh nak kan pek hna lai. Ka seihnam kha i bei u. Kei cu nunnem le mi tawidor ka si caah ka nawl hi i cawn ve u. Cun dinh nak kha nan hmuh lai. Ka seihnam cu a bei a nuam i ka thil cu a zang tiah a ti.” 

Dawt mi u le nau hna tutan kan boruak ṭhat lo ruangah lung rethei, harsa vansang in a um mi kan tam pi lai ti cu ni hin kan ton cuah mah lio  mi harsatnak nih hin a langhter mi a si ko. Nihin tlangtar ruah ṭi kan duh mi zei dah si ti a si ahcun rei thei le thil rit mi vial te hna ka sin ah ra tuah u dinh nak kan pe hna lai tiah thawngṭha lak ah thawngṭha bik kan bawipa Jesuh khrih nih a kan sawmnak aw te hi nihin ah thazaang lak ṭi kan duh hna. 

Mithiang Francis desel nih zeitin dah a rak ti a si ahcun ‘nan nunnak chungah hmailei thil um ding mi le ai thleng ding mi kong ah thin phang le thlalau tuk in um hlah. A ṭhat nak a chuak lai i ruahchan nak tu he um ko’ a ti. Zeicah tiah nangmah an ngeitu Pathian nih cu thil vialte chung in an luat ter ko lai e a ti. Nihin ah an zoh khenhtu Bawipa nih thaizing zongah an zoh khenh ṭhiamṭhiam ko lai i intuar khawh nak thazaang an pek fawn ko lai tiah mithiang francis desel nih thazaang a kan pek mi te hi thazaang lak ṭi ka duh ngai. 

Zei ruangah dah nihin minung kan nunnak ah hin hmai lei thil um ding mi le ai thleng ding mi kong ah thin phang le thlalau tuk in kan um ding a si lo. A ṭhat nak a chuak te lai ti ruahchan nak he um ko law a kan ti. Zei ruang ah dah a si ti a si ah cun nang mah an ngei tu pathian nih cu vialte chung in an luat ter ko lai a ti. Nang le kei a kan ngei tu nihin kan boruak ṭha lo lak in a kan khamh tu ding a kan luat ter tu ding nifatin a kan zoh khenh peng mi kan lung retheih nak kan vansan vialte a kan hngalh piak dih tu Pathian a um ko. 

Dawt mi u le nau hna minung kan lam thluan hi thin phang le thlalau in a khat tak tak ko. A hmaan mi a si. Kan Bawipa Jesuh Khrih lei hawih loin cu thil vialte ruah ahcun hnabei dong in mah le mah i thah nak te hna, kha vialte kha a um kho mi a si. Zeitik caan paoh ah ruahchan nak thar a kan petu kan Bawipa Jesuh Khrih hi fuh ko u sih. Zei thil kan ton hmanh ah a kan ngeitu kan Bawipa a um ko ti theih buin a nung mi kan si nak ding ah hin a bia pi tuk mi a si. 

Dawt mi u le nau hna ahohmanh nih kan nun chungah harsat nak phun kip tong in lungdongh nak kan ngei cio ko lai. Cucu a hmaan mi a si. Cu kan ton mi kanmah santlaih lo nak le pawngkam thil a cang mi ruangah zong a si kho mi si. Bible kan zoh tikah Profet Elijah zong lungdong in khua a rak sa bal ve. Baal profet 450 kha Gamel tlangah a rak tei hna ti kha Jesebel nih a theih tikah horep lung kuang ah hna bei dong vansang in an um. Pathian nih a hna bei dongh, vansan nak cu a phunphun in a thlop. Hna bei dong le lungrawk in a um mi Elijah cu a ton mi ruangah Bawipa nih a mawh chiat lo. Amah thlawp bawl tu dingah Vancung mi a thlah hnawh hna. Cu lawng siloin Bawipa cu amah pum in Elijah sin ahcun a lang i dai te in a mi hna sin rian ṭuan ding kha a chimh. Cu hnu ceo ah Elijah nih a ṭuan hnga mi rian a peh zulh khawh ṭhan ti kha (2Siangpahrang 19:1-21) chung ah hin kan hmuh khawh mi a si. 

Kan nunnak ah cu ve bantukin lungdong le vansang in um caan a tampi ko lai. Sihmahsehlaw, Pathian nih a kan dawt i kan caah a ṭha bik in khua a kan khan piak pin ah amah kan hmuh khawh nak lam ah a kan hruai zungzal ti hi Khrih ah dawt mi u le nau nu le pa nih kan philh lo ding si. Cucaah (1Peter 5:7) cungah zei tin dah kan hmuh ti a si ah cun ‘amah nih an zoh khenh hna caah nan lung retheih nak vialte kha amah cungah chia dih ko u law’ a kan ti. Cun (Psalm 27: 14) ‘Bawipa cu i bo chan u, zumh nak ngeih cu nan lungdong hlah u, Bawipa cu i bochan uh’ tiah a kan ti. 

Rethei le thil rit mi vialte hna ka sinah ra tuah u dinh nak kan pek hna lai a kan timi chungkhar kan lung retheih nak, zatlang ah kan lung retheih nak, bu chungah kan lung retheih nak, ei le din ding caah siseh ,aih le fenh ding caah siseh, a phunphun in kan lung retheih nak vialte hi kan Bawipa Jesuh Khrih sinah hin phak pi u sih law kan Bawipa Jesuh Khrih a kan chawng kho tu, a thil rit a zaang ngai ngai mi a kan phurhter tu ding mi kan Pathian sinah hin phanh pi cio u sih law, amah sinah ṭhum cio u sih law, zei cah tiah a zoh khenh mi kan si caah ‘kan lung retheih nak vialte hi amah cungah chiah dih ko u’ tiah Peter nih a kan ti bantuk in kan Bawipa Jesuh Khrih zong nih a kan sawm i aw nem tein a kan sawm bantuk tein dawt mi u le nau hna nihin ah kan ton mi harsat nak vialte, kan lung retheih nak phun zakip vialte hi kan Pathian sin ah, kan Bawipa Jesuh Khrih sin ah, a kan tlanhtu, a kan khamh tu sin ah hin chan ko u sih law, cu tin a si ahcun kha vialte kha daidipdep t in kan um ko lai. Kan retheih nak, kan lung retheih nak, kan har satnak, kan ton mi har nak vialte amah sin ah hin ṭum dih ko u sih. A ngai tu nan dih lak cungah Bawipa nih a thar in thluachuah za in pe cio hna seh. Amen

Thazang petu /- Saya William