Tangdornak Lungthin he Bawipa Kha Panh hna U Sih
Khrih ah dawt mi u le nau hna July 15 ni ca ah Bupi nih a kan timhpiak mi kan bible ca thiang hna cu Isaiah 10: 5-7, 13- 16; Ps. 94; Matthai 11:25-27 tiang hna hi an si. Ni hin kan rel mi kan Bible cathiang hna nih a bik in a kan cawn piak duh mi cu ‘fim nak, ṭhawn nak ,din nak hi mi nung sin in aa thawk si lo in Pathian sin in a ra mi an si’ ti mi kha a kan cawn piak.
Nihin kan rel mi a voi khat nak bible cathiang Isaiah chungah Assyria Siangpahrang pa nih a thil ti khawh nak, ral tei nak, cun a ṭhawn nak vialte hi amah theih hngalh nak hna, amah nih a tuah khawh mi amah tha zaang ah i ruat in; thil ngei taktak tu, a petu Pathian kha a philh tikah Bawipa Pathian nih a mawhchiat nak kha nihin a voi khat ka rel mi kan bible cathiang i kan hmuh mi cu a si. Cuasicaah kan mah le kan mah tein ruam kai nak nih thil hmaan thil dik si nak kha hmuh ter kho lo in kan mit a kan cawt ter tawn. Pathian sin in thil a ra mi fim nak ṭhawn nak kha hngalh khawh loin a kan ser tu Bawipa kha hmuh khawh loin a kan um ter tu hi ruam kai nak hi a si tawn. Hi hi kan nih Khrihfa hna pakhat cio cung pakhat cio i kan ral a si ti mi kha a voi khat bible kan rel mi chung kan hmunh khawh mi si.
Salm hla chung zongah Bawipa Pathian nih a mi hna amah aa bochan mi hna cu zei tik hmanh ah a hlaw hna lo e ti mi kha kan hmuh khawh. Cucaah Bawipa aa bochan mi cu zei bantuk dah an si. Bawipa cu ka Pathian, a ka ngei tu, a ka zoh khenh tu tiah bochannak lungthin a ngei mi hna, mah nak in thil a ti kho deuh mi Bawipa Pathian a si kha a thei thiam mi lawng nih khan an i bochan khawh mi a si. Khrihfa mi hna nih kan i bochan ding mi Pathian hi a voikhat nak bik ah kan chiah ding ti mi kha philh lo ding a si.
Assyria Siangpahrang pa nih hi thil hna cu keimah nih ka ṭhawn nak in ka tuah khawh mi a si i ka fimnak in ka tuah khawh mi a si tiah ruah nak a ngeih lio ah, nihin i kan rel mi salm hla ṭial tu pa nih cun Bawipa nih a mi hna zei tik hmanh ah a thlau hna lo a chia ta hna lo. Amah aa bochan mi hna kha zeitik hmanh ah a hlaw bal hna lo e tiah a ti. Cucaah nihin ah kan nun, kan theih khawh mi, kan kal khawh mi, pakhat le pakhat kan i chonh khawh rih mi te hi Pathian nih nun nak thlua a kan chuah rih caah, dam nak thlua a kan chuah rih caah, theih hngalh khawh nak ṭhawn nak a kan pek rih caah, kan um kan kal khawh mi a si ti mi hi kan theih ding si. Pathian cungah lunglawmh nak bia kan chim ding a si.
Thawngṭha bia Matthai 11:25-27 ah zei tin dah a ti ṭhan tiah cun ‘Van le vawlei le zei zong vial te uk tu maw ka Pa hi thil lian ngan hna hi mi fim mi thiam mi hna mit ah na thuh i mi nih zei an rel lomi ngak chia te sin ah, na hngalh ter hna, na langh ter caah na min kan thang ṭhat’ e tiah a ti. Hi ngakchia te tiah a ti mi hi zei bantuk dah si. Bawipa nih nan nih cu ngakchia lung put nan ngeih lo ahcun ngakchia te bantukin tangdor nak lungthin le bochan nak lungthin nan ngeih lo ahcun vancung nan phan lai lo e, khamh nan si lai lo e tiah ralrin nak a kan pek mi kha thei ṭhan hna u sih. Ngakchia nih amah a nu a pa a si lo ah, a u le nih maw an chim mi cungah zumh le bochan nak a ngeih bantukin kannih zong kan nu kan pa a si mi kanun nak a kan zoh khenh tu Pathian cungah kan zumh nak kan i ruahchannak kan zeizong vialte kan chiah ve ding kha thawng ṭha bia nih cun a langhter duh mi, a kan cawnpiak duh mi cu a si.
Nihin ah mithiang Bonaventure puai ni zong kan tuah. Mithiang Bonaventure hi Bupi chungah biatak in a min a thang mi, mi nih an conglawmh mi, theologian mithiang pakhat a si. Sihmanhsehlaw, Bonaventure nih mah tluk in theih hngalh nak lei ah, fimnak lei ah thiamnak lei ah a sang ngai ngai mi hmun hma ah a dir mi a si ko na te in ruam kai nak a ngei maw tiah cu ruam kai nak a ngei lo. Hi thil ka theih mi, ka tuah khawh mi, ka hngalh mi hna hi ka Bawipa ka Pathian nih ka pek mi a si tiah bia tak tein, lungthin thiang tein theih hngalh nak lungthin he Pathian cung tu ah khan lawmh nak bia a chim i tangdor nak lungthin te he a rak nung i Bawipa kha tehte a rak khang tu mithiang a si.
Cucaah nihin ni ah Bupi nih a thangṭhat i ngakchia hna bantukin nu le pa hna cungah bochannak a ngeih mi lungthin bantukin mithiang Bonaventure zong Pathian cungah bochan nak he, cun hngalh nak thiam nak ṭhawn nak a petu Pathian a si kha hngalh buin lunglawmh nak he Pathian a thangṭhat zungzal bantukin kan nih hna zong Khrihfa kan si caah kan Bawipa, kan Khrih kha bochan zungzal in lawmh nak bia chim zungzal in nifatin kan um kan kal nak vial te ah amah sin thlacamnak te he um kal khawh i zuam ve hna u sih. Tangdor nak lungthin he Bawipa kan panh a si ahcun Bawipa sin in thluachuah tam pi kan co ko lai. Ruamkai nak he a khat mi Assyria Siangpahrang pa, Bawipa nih a hlawt bantuk si loin kannih hna cu tangdor nak lungthin te he mithiang hna nih an nun pi mi nun zia te kha kan nih Khrihfa hna zong nih nun khawh i zuam ve hna u sih. Nan dih lak in Bawipa nih thluachuah in pe ko hna seh. Amen
Thazang petu /- Fr. Fidelis Maung Sein