Pope: Raltuknak thlichia nih kan i ruahchannak hrawk hlah seh

Pope cu summer holiday (ṭhaal dinh caan) a umnak Castel Gandolfo i Piazza della Libertà ah Angelus thla a camnak ah, Middle East ah a thar in a chuakmi buaibainak le tukdohnak le Ukraine le Russia kar raldohnak hna cu kap hnih biaruahnak le i ceihmainak in daihnak lam kawl awk ah a forh hna. ‘Sea Sunday’ ah, ralkap buainak ruangah an rianṭuannak dirhmun a harter deuhmi tilawng rianṭuantu le tilawng dinhnak hmun rianṭuantu vialte hna he naihniam tein umṭinak zong a langhter. Hi raldohnak le buaibainak ruangah mipi nih harnak an tuarnak zong a chim chih. 

July thla a zarh hnihnak cu rili cung rianṭuanmi hna caah ah conglawmh upatpeknak ni (Sea Sunday) tiah ti asi. Pope nih a bik in Middle East kong a chim, cuka ahcun U.S le Iran kar kahdaihnak hnatlaknak a rawh hnu ah tukdohnak a chuak ṭhanmi, Lebanon ah a cang cuahmahmi tukdohnak le buainak, Russia le Ukraine karlak raldohnak kongah a lungretheihnak a langhter. Naite ah  Russia nih Kharkiv, Dnipro, Kyiv le Odesa ah fak ngai in a kah.

Raltuknak thlichia cu Middle East, Ukraine le vawleicung hmun tampi ah a hrang ṭhan i thahnawnnak le ṭihnung phunzakip thlaici a tuh ruangah sualnak ngeilo mipi tampi cu harnak an tong tiah a chim. Rome khua Bishop asi mi Pope nih ruahchannak thlau lo dingin mizapi kha thazaang a pek hna i miphun hna karlak ah a hmunmi remdaihnak hmuh khawhnak lam pakhat lawng a simi biaruahnak le ceihmainak ah kir ṭhan dingin a forh hna. 

Hi raltuknak thlichia nih kan ruahchannak le daihnak mei kha hmit hlah seh. Kap hnih biaruahnak, hmaitonh in i ceihmainak in daihnak lam ser awk le tharchuah awk ah a sawm hna. Hi zuamnak lawng nih a dingmi le a hmunmi daihnak a chuahter khotu lam asi. Cu tik lawng ah miphun hna nih lungrualnak, himnak le upatnak he an nung kho lai tiah a chim.

A bik in middle East kong he pehtlai in U.S le Iran daihnak hnatlaknak an ngeih mi a rawh ṭhan hnu ah buainak a chuak ṭhan. Cun Lebenon ram i a cang cuahmah mi buainak kong siseh, Russia le Ukraine karlak raldohnak kong ah a lung retheihnak le fak ngai in harnak a ingtuar mi hna kong zong a chim. 

“Kan i ruah lo lio caan ah, raltuknak thlihran cu Middle East, Ukraine le vawleicung hmun tampi ah a hrang ṭhan i pakhat le pakhat i thahnawnnak le tihnung thil tampi a chuahter ṭhan i sualnak a ngei lomi mi tampi kha a hnorsuan ṭhan hna” tiah Pope nih a ti.

Pope nih cun mipi kha an i ruahchannak hloh lo dingin thazaang a pek hna i, miphun pakhat le pakhat karlak ah a hmunmi remdaihnak hmuh khawhnak lam a simi biaruahnak le ceihmainak(dialogue) tuahnak ah kir ṭhan dingin a forh hna.

“Hi thlihran hna nih kan ruah i channak le daihnak meialh kha hmihter hlah u sih. Biaruahnak, tonnak le ramkhel pehtlaihnak lam ah kawl dingin kan i zuam than lai timi a fekmi ruahchannak a thar in tuah ṭhan ka duh. Biaruahnak, tonnak le ramkhel pehtlaihnak lam kawl nak lawng in a dingmi le a hmunmi daihnak a chuak kho lai. Mah lam lawngin miphun hna kar lak ah lungrualnak, himnak le upatnak a um kho lai” ti zong in Pope nih cun a ti. 

Source: Vatican News