Pathian cu Thlarau le Biatak in kan Biak awk a si

Nihin ni caah kan nu Bupi nih a kan timh piak mi chungin thazang hrawmh kan duh mi hna cu Isaiah 1:10-14 chungin a si lai. Pathian nih Profet Isaiah hmang in a chimmi cu: “Nan ka pekchanh lengmang mi thawinak vialte hi ka duh ti lo. Nan cawtum hna le nan tuu hna le nan meheh hna thi nih hin a nor in an ka nor cang. Manngei lo nan ka pekchanhmi thil hi a duh in ka duh ti lo. Nan ka pekchanh lengmang mi thawinak hi ka duh ti lo.”

Zeiruangah dah Pathian sin an pek mi raithawinak hi Pathian nih a cohlaan lo timi hi kan ruah tikah Pathian duh ning in siloin anmah duh ning in Pathian an rak biak ruangah a si. Cun an kut ah thisen aa neh ruangah a si timi kha kan hmuh khawh. Thazang lak ṭi dingah chim ka duh mi cu, Pathian kan biak kan ti lio ah hin tlau khawh a si. Biakinn chungah um in Pathian kan biak, kan thangṭhat kan ti ko lio bu in Pathian sin in tlau khawh a si. Zeitikah dah kan tlau kan ti a si ahcun, thlarau le biatak in siloin kanmah taksa sinak, kanmah duh ningin Pathian kan biak i kan thangṭhat tikah khan Pathian sin in kan tlaunak cu a si ti kha kan hmuh khawh. 

Cun “man ngei lo thil nan ka pek mi hi ka duh ti lo” tiah a ti rih. Pathian nih minung a kan ser tikah, a kan ser hnawh chanmi tampi lakah pakhat cu zei dah a si tiah cun  ‘Amah biak awkah a kan sermi kan si.’ Israel miphun hna Izip ram in Kanan ram lei ah a hruai hna nak cu Amah an biak khawh nak hnga ding caah a si. Pathian nih Moses sinah a timi cu: Moses, hi mi hna hi chuah pi hna. Keimah an ka biak khawhnak hnga chuah pi hna a ti. Cuasicaah, Pathian cu thangṭhat a duhmi Pathian, thlarau le biatak in biak a duhmi Pathian a si timi kha fiang tein kan hmuh khawh. 

Cuasicaah, zei bantuk lungput in dah Pathian hi kan biak i, zeibantuk lungput in dah Pathian in kan pekchan timi hi a biapi ngai mi a si. Pathian nih a zoh mi cu “Zeizat dah a pek timi kha a si lo. Aho nih dah a ka biak timi zong a si lo. Zeibantuk lungput in dah an ka biak timi kha a zoh tu Pathian a si. Zeibantuk lungput in dah an ka pek timi kha a zoh tu a si.” Cuasicaah Pathian kan biak tikah thlarau le biatak in kan biak ding kha nihin ni caan ah thazang pek kan duh mi hna cu a si. 

Pathian hi thlarau le biatak in biak loin, kanmah duh ning le kanmah siarem ning in kan biak chung paoh cu, Pathian kan biak nak ah hin zeitik hmanh ah Pathian aa lawm bal lai lo i kan biaknak cungah Pathian thluachuah zong a um bal lai lo. Pathian kan biak tikah kanmah duh ning in kan bia sual maw timi zong hi kan i check a hau fawn. 

Nihin ni caan ah Khrihfa aa timi tampi cu Pathian duhnak siloin kanmah siaremnak, kanmah duh ning in a kalpi mi, a hruaimi biaknak tampi kan um hna. Cu vialte chungah cun kan biak ning hi check ṭhan u sihlaw, thlarau le biatakin, Pathian duh ning tein kan biak a si ahcun Pathian hi kan cungah aa lawm lai i, kan ram a dam lai i, kan Khrihfa bu a dam lai i, kanmah pumpak zong kan dam lai timi kha nihin ni caan ah thazang pek kan duh hna. 

Dawtmi Khrihfa u le nau vialte hna, Pathian sin pekchanhnak kan tuah tikah, kan pekchanhmi thil cungah siloin kan lungput a zoh tu a si caah lungthin thiang tein, toidor tein, Amah duh ning tein Pathian sinah thil a pe mi le Pathian sinah raithawinak a tuah mi le Pathian sinah thangṭhatnak a pe mi le Pathian cungah biaknak a tuah mi kan si khawhnak hnga ding caah thazang pek kan duh hna. Kan dihlak cungah Pathian nih a thar in thluachuahnak kan pe hram ko seh. Amen

Thazang petu /- Saya Simon Hram Ling