Pathian Bia thiang tlaknak vawlei ṭha kan si a herh.
Zarkel (15) nak Zarhpi ni, nihin ni caah Bupi nih a kan timhpiak mi cathiang hna cu: Isaiah 55:10-11; Psalm 64:10-14; Romans 8:18-23; Maṭhew 13:1-9 hna hi an si.
Nihin kan relmi cathiang hna nih a langhter mi cu Pathian bia ah ṭhawnnak a umnak le cu Pathian bia cu kan cohlaan khwh nak hnga ding caah kan lungthin remh a herhnak kong an si.
Isaiah chungah Pathian bia cu van ruah bantukin vawlei cungah atla in vawlei cung thil hna cungah nunnak a pek tak hna. Vawlei hrinter ta loin van ah a kai ṭhan lo. Cu bantukin Pathian bia zong Pathian duh mi tlinh loin a um lo tiah a ti. Kan mit in kan hmuh khawh lo hmanh ah Pathian nih duh sah tein kan nunnak ah rian a ṭuan zungzal ko timi kha kan zumh a herh.
Thawngṭhabia nih a kan cawnpiak mi cu hmun kip ah aa ṭhekzamh mi thlaici he tahchunh in a kan cawnpiak. Thlaici cu Pathian Bia a si i, a tlaknak hmun dangdang hna nih a langhter mi cu kan thinlung a si. A caan ah kan thinlung cu lung in a khatmi hmun ah a tla mi thlaici a kheuh khawh lonak bantukin le hlingbur lak ah a tla mi thlaici a ṭhan khawh lo bantukin siseh, a tanhchunh. Jesuh nih vawlei nonṭha mi bantuk si dingin a kan sawm. Pathian bia thiang a ngai i a cohlang thiammi lungthin, cun a thei tampi in a tlaimi si dingin a kan duh piak.
Mithiang Paul nih ralrin a kan pek mi cu harsatnak hna chungah ruahchannak he a nung mi kan si a ti. Cun sermi thil hrimhrim zong nih Pathian bia thiang a tlinnak caan a phanh hlan tiang a hrumnak kong a chim ve. Kan tonmi harsatnak hna hi kan nunnak a donghnak an si lo. Pathian nih nunnak lam lei ah a kan hruai zungzal ko timi kha kan theih ding a si.
Nihin ni ah kan ruah ding a simi cu: zeibantuk vawlei hmun ah a tla mi dah kan si? Pathian Bia thiang cohlan duhnak lungthin kan ngei maw? Pathian Bia thiang in kan nunzia, kan lungput, i thlen in Pathian he pehtlaihnak tuah kan duh maw? Nifatin Pathian nih kan thinlung chungah a dawtnak in a kan umpi, veel laksawng a kan pek ko. A Bia thiang kha zumhnak le lungsaunak he cohlan in kan nunnak ah dawtnak theipar, zangfahthiamnak theipar, le pakhat le pakhat cungah i theihthiamnak theipar kan tlai khawh cio nak hnga Pathian sinah thlacam buin i zuam zungzal hna u sih. Thazang petu /- Fr. Fidelis Maung Sein