Bawipa Pathian cungah Zumhnak ngei zungzal ko

Bupi nih thlarau thazaang lak ṭi dingin a kan thimpiakmi kan bible cathiang hna cu (Hos.10:1-3,7-8,12;  Mt. 10:1-7) tiang hna hi an si i, Bupi nih nihin ni ah a kan cawnpiak duhmi cu kanmah thilti khawhnak ah zumh tuk loin Pathian thilti khawhnak le Pathian a kan dawtu kan Pathian cungah kan lungthin kha chiah zungzal dingin, cun amah hmaiah kan nunning hi zumhtlak tein nun ding hi a kan cawnpiak duhmi a si. 

A voikhatnak kan relmi Hosea bible chungah, Israel cu a tlaimi, aa dawhmi, a si ṭhami mitsur dum a vun si tikah amah thilti khawhnak, aa dawhnak , amah a tlainak cungah khan lungpuamnak ruamkainak a ngeih tikah Hosea nih a hmuh tikah, kha thil sining hi Bawipa sinin thluachuah na hmuhmi a si. mah hi cu nangmah thilti khawhnak a si lo Pathian thluachuah na hmuhmi a si. Cucaah Pathian sinah hin hung kir ṭhan ko” tiin kawhnak sawmnak kha a si. Kannih Khrihfa hna lung rethei khuaruahhar vansan in kan um tikah Pathian sin thlacam ding hi kan philh tuk lai tiah kan ruah lo. Sihmanhsehlaw, siṭhatnak kan cungah a hung um tikah cun Pathian sin panh hi kan philh ṭheo tawn. A hnu deuh ah si te ko seh, tiin a ruang tete hi chim in thlacam zong hi daithlan in um kan hmang tawn. Kha thil siningte, nunzia te kha Israel hna sinah Hosea nih a hmuh tikah, “Nan palh cang e. Nanmah thlua an chuah zungzaltu Pathian sinah khan hung kir ṭhan u” timi kha a kan ti venak cu a si. 

Nihin ni ah kan fimthiamnak le kanmah thilti khawhnak hna zawn cung ah khan kan lung kan chiah i kan i uantuk ve a si ahcun palhnak tampi kan tuah a si lai, cucu Pathian nih a kan duhpiakmi a si lo. Zeicahtiah kan thilti khawhnak, kan ruah khawhnak, nan nunnak, kan thaw kan zeizong vialte Pathian sinin a rami a si caah, thil ti khawhnak a ka hlantu, a kan ngeitu Bawipa kha kannih hna nih a cungah zumh tlak tein a rian kan ṭuan ding le lawmh bia kan chim ding kha kan rian a si. 

Pahnihnak ah thawngṭhabia Matthai chungah hin Bawipa Jesuh Khrih nih zultu (12) hna kha Israel mi hna sinah a dang tein a thlah. Cu a thlah hna tikah “Vancung Pennak a nai cang, nan lung i thlang ulaw thawngṭhabia cungah ngai ulaw zum u” timi kha thawngṭha chim dingin Bawipa nih a thlah hna. “Nan sualnak kha kal tak u, Bawipa sinah rung kir ṭhan u” timi kha a si. Nihin ni tiangin Jesuh Khrih rian fialmi, thlahmi rian kha nihin tiang ṭuanmi cu a si. 

Atu online cung in bia kan chimmi zong hi “Nan sual chiata u law, i ngaichih u law Bawipa sinah rung kir ṭhan u” timi thawngṭhabia kan chim zungzalmi cu a si. Zeicahtiah a kan ngeitu Pathian sinah kan kir ding kha kannih ser a simi hna / minung hna kan rian a si. Kan Bawipa sin kan kir ṭhan ding kha kan rian a si. Cucaah Bawipa nih a thlah hna tikah Mession rian lianpi a pek hna, thilti khawhnak a pek hna. Nihin ni ah nang le kei Khrihfa kan sinak ah kan tuah khawhmi, kan chim khawhmi kan rel khawhmi, kan hmuh khawhmi hna hi kanmah thazaang thilti khawhnak in maw a si (asiloah) Pathian thluachuahnak thawngin dah a si timi kha ruah ṭhan. Pathian thluachuah a si ti kha na hmuh ahcun Bawipa sinah rung kir law, lunglawmhnak bia chim amah sinah thlacam daithlang hlah usih. 

Mithiang Francis Xavier nunnak kan zoh tikah amah hi mirum chungkhar in, thilti khomi chungkhat, a fimmi chungkhar a si ko natein annih nih Pathian rianṭuan aa timh tikah a ngeihchiah, chawva, chungkhat chiahtak in Asia ram tiang a rak ra i nganfak ngai, sifak ngaiin Pathian bia kha lunglawm ngaiin mi sinah tehte a rak khangtu, thawngṭhabia a rak phuangtu Mithiang Francis Xavier kha a si. Minung sining in kan zoh tikah, vawlei tah pedan in kan zoh tikah mirum, mi thilti kho a si ko natein mi hna Pathian sermi hna amah sinah kirpi ṭhan ding, cun khamh an si nakhnga zuamnak, Pathian cungah zumhtlak a sinak kha a nunnak in tehte a khanmi cu a si. 

Nihin nang le kei zong Francis Xavier bantuk lungthin kan ngeih ve ahcun i uanpinak zeihmanh kanmah le kanmah kan ngeih ding a si lo. Kannih cu Pathian sermi kan si, Pathian sinah a kir ṭhan ding kan si. Pathian sinin thluachuah a hmumi kan si, Pathian thluachuah caah Pathian sinah lunglawmhnak chim ding hrimhrim kan si timi kha thei hna usih. 

Nihin kan cathiang hna nih mah thilti khawhnak cungah bochannak ngei loin Pathian a kan ngeitu kan Bawipa cungah bochan zungzal ding le Amah hmaiah zumhtlak tein nun ding kha a kan sawmmi cu a si. Nan dihlak in Bawipa nih thluachuah in pe ko hna seh.   

Thazang petu /- Fr. Fidelis Maung Sein