Pope nih July chung thlacam tinhmi cu ‘minung nunnak upat kilvennak’

Vawlei cung um Catholic vialte nih July thlachung kan thlacamnak ah “Minung nunnak kilven awk le upat awk” caah thlacam ding in Pope nih a kan sawm. Pathian pekmi nunnak cu man ngeihter in derthawmnak le sining aa khatlo mi pakhat cio kan nunnak kha upat hmaizahnak ngeih awk ah Pathian sin ah thlacam awk ah a kan forh. A thlacamnak ah, Pope nih Bawipa nih pakhat cio kha dawtnak in a kan ser i tlamtling tein nun dingah a kan kawh ti langhter. Minung kan nun hram thawk in kan thaw a dongh tiang Pathian muisam kengin sermi a thiang nunnak ngeitu kan si. Minung pakhat cio nih kan ngeihmi nunnak a sunlawi zia hi upatnak he ṭihzah kilven awk ah hngalhthiamnak kan pe ko. Minung nunnak ah thleidannak umlo in, a derthawm mi le santlai lo mi hna kha nemnak le zaangfahnak in zohkhenhnak le namneh rialdip a tong mi hna kha ralṭha tein dirkamh kilven awk ah kan cawnpiak. Bawmh chanh zaangfah zawnruah awk asi mi kha zaangfah zawnruat loin kan um sualnak cungah kan ngaithiam hram ko. Bupi cu mivialte caah dornak siter awk le a nungmi thawngṭha tehte khaantu siter awk ah kan bawm ko tiah, Pope nih thla a cam. A donghnak ah  Bawipa nih a kan dawt bantukin nunnak kha nemnak, zumhawktlak sinak le mah le mah i pekchanhnak he i dawt awkah kan bawm ve tiah a thlacamnak a donghter.