Pope Leo XIV cu July 5 in 27 tiang Castel Gandolfo ah (holiday) aa din lai

Pope cu July 5, Zarhpi ni zanlei thawk in July 27 tiang Castel Gandolfo ah ai din (holiday) lai i, hi caan chung ah hin mipi he i tonnak a um rih lai lo tiah Pope umnak zung nih thawng a thanh. Kan hnu kum zong ah Pope Leo cu Castel Gandolfo ah ṭhaal dinh caan (summer holiday) in a rak um bal cang. Castel Gandolfo cu Vatican in suimilam pakhat hrawng aa hlatmi Pope hna an i dinh tawnnak innpi asi. Hi caan chung vialte cu mipi nih Pope he i hmuhtonnak a um rih lai lo. St.Peter Biakinnpi tual ah cam tawnmi Angelus thlacamnak zong Castel Gandolfo ah a cam lai i, mileng le khualtlung tonnak zong phihkhar asi rih lai. August 5, Cawn nithum ni thawk in Vatican ah a ra tlung ṭhan lai.

Kan hnu kum, 2025 (summer holiday) lio zongah  Pope Leo cu Castel Gandolfo ah ni 16 chung(July 6 -22) a rak i din. Cu caan chung ah  (‘Borgo Laudato Si’) ah Missa raithawinak le mipi he i pehtlaih i chawnhbiaknak zong a rak tuah pin ah Pontifical Parish of St. Thomas of Villanova le Cathedral of Albano hna zong a rak tlawn bal. Cu  lio caan ahcun a biapi ngaimi khualtlung meleng tonnak zong a rak ngei i cu hna lak ah cun Ukraine President Volodymyr Zelensky he tonnak, Israel nih Gaza i a ummi Holy Family Church an tuk an hrawh hnu ah Israel Prime Minister Benjamin Netanyahu he telephone in biaruahnak a ngeihmi hna kong zong an i tel. Pope Leo nih a hnu ah Palestine ram President Mahmoud Abbas he zong phone in bia an rak i ruah.