THIHNAK A ṬHAWNNAK CHUNGAH AN HLAWNH TAK LO

Pathian nih minung cu a tluk hna zongah a hlaw hlei lo. Pathian nih a auh i khuaruahhar ngaiin ṭhatlonak cungah teinak a phak lainak le a sualnak in hlawm ṭhan a si lainak kong kha a thanh. (Cf. Gen. 3:9, 15). Mah Bible cacang hi “Hmasabik Thawngṭha” (Protoevangelium) tiah auh a si. Messiah le khamhtu kong, rul le minu karlak ral i dohnak kong le mah nu tefa nih hmanung bikah teinak a hmuh lainak kong kha a si.

Khrihfa cawnpiaknak nih mah Bible cacang ah hin vailam cungah thihnak tiangin nawl a ngaimi, Adam thar in Adam Hlun” nawlngeih lonak kha a belh lai, ti kha a hmuhsak. (Cf. ICor. 15:21-22, 45, Phil. 2:8, Rom. 5:19-20). Cu lengah Bupi pupa hna le doctor hna nih mah cacang chungah a ummi minu hi; Mary, Khrih Nu, Eve Thar” a si tiin an hmuh. Mary cu Khrih nih sualhram a ngei lo i a nunchung ah sualnak zeihmanh a tuah lo. (Pius XII).

A si kun ahcun Pathian nih zeicadah hmasa minung kha sualnak in a khamh hna lo? St. Leo the Great nih cun, “Chim khawh lomi Khrih velngeihnak nih, khuachia nahchuahnak nih a kalpi mi nakin a ṭha deuhmi thluachuahnak kha a kan pek,” a ti. St. Thomas Aquinas nih, “Minung sinak hi a ngan deuhmi ah cawi awkah a dontu zeihmanh a um; sualnak hnu hmanh in Pathian nih a ngan deuhmi ṭhatnak kha chuahter awkah ṭhatnak kha a awnh,” tiah a ṭial. Cu bantukin St. Paul nih, “Sualnak a tamnak ah velngeihnak a tam chin,” tiah a ti. Thawhṭhan lawmhnak hla ah, “Maw, lawmh awk tlak palhnak, a ngantuk hringhranmi Khamhtu a kan hmuh piakmi,” tiah sak a si. (Cf. Rom. 5:20).