Pathian ṭhawnnak cu tangdornak lungthin a ngei mi hna sin in a lang tawn
Nihin ni caah Bupi nih a kan timhpiak mi cathiang hna cu Zechariah 9:9-10; Rom 8:9,11-13; Matthew 11:25-30 hna hi an si. Kan cathiang hna nih an langhter mi cu ‘Pathian ṭhawnnak cu tangdornak lungthin a ngeimi hna sinah, le cun Pathian cungah an zumhnak a dih in a chia mi hna sinah biatak zalonnak cu a um timi kong a si.
Zechariah 9:9-10 chungah Siangpahrang cu a ṭhawngmi raltuknak rang tum cit loin, a nun nem mi laa fa note tu kha aa cit a ti. Siangpahrang tiah a timi nih a sawh duh mi cu Jesuh Khrih kha a si. Jesuh Khrih nih sualnak a teinak cu hriamnam hmang in siloin daihnak in a si. Nun nemnak in a si. A Pennak zong ṭhihpoih nak le ṭhazang hmang in uk nak siloin dawtnak in a si. Phorhlawtnak, mah thil ti khawhnak lawng bochan ding kha hlawt in nun nemnak lungthin he Pathian uknak le hruainak kha cohlan ding in a kan sawm.
Psalm 144 zong nih: Bawipa cu kan lungtum, a kan khamhtu le thluachuah vialte aa thawk nak a si a ti. Minung nunnak cu a hninghno tuk mi, chikhat te ah a rawk kho mi sihmanhsehlaw, Pathian nih a dawt zungzal, a keilven zungzal nak kong kha a chim ve. Pathian cungah bochannak lungthin kan ngeih khawh a si ahcun hi vawlei chawva le thilri hna nih a kan tei kho lai lo. Zeicah tiah cun himnak taktak cu Bawipa Pathian cung lawngah a um caah a si.
Rom cakuat 8:9,11-13 chungah a timi cu Khirh chungah a nung mi hna cu Thlarau thianghlim in a nung mi an si a ti. Cu Thlarau cu zumtu hna sinah a um i cu Thlarau nih cun mah zawn lawng ruahnak lungthin vialte kha a tei khawh dih. Khrihfa hna kan nunnak ah sualnak hrial ding lawng siloin Thiang Thlarau Pathian nih kan lungthin a kan uk ding le a kan thlen ding a herh.
Matthew 11:25-30 chungah Jesuh nih a kan hnem kho taktak mi bia in a kan sawm. “Rethei le thilrit mi vialte hna, ka sinah ra tuah u, dinhnak kan pek hna lai” a ti. Biatak luatnak cu rianṭuan ding um lo le harsatna um lo lawng kha a chim duh mi a si lo. Jesuh Khrih zumhnak lawng in ngeih khawh mi le hmuh khawh mi a si. A seihnam cu phorh a fawi. Zeicah tiah cun kanmah nak in a rit deuh mi thil a kan phorh piak caah a si. Jesuh Khrih hnu zulh kan ti tik zongah hin zeibantuk harsatnak hmanh um ti lo kha si loin Amah he a veel chungah um in khual tlawn ṭi tu kha a si.
Lisieux khua mi St. Therese nih nihin kan relmi cathiang hna cawnpiak mi hi aa rak nun pi i cuticun a dawt mi Pathian rian thiang kha a rak ṭuan. A nun lam caah tlangtar aa lak mi cu “Thil fate hmanh sisehlaw dawtnak lungthin in tuah-ṭuan ding” timi kha a si. Amah nih mi lianngan si dingin ai rak zuam bal lo. Tangdornak lungthin ngeih in Pathian dawtnak cungah biatak tein zumhnak a rak ngei mi nu Mithiang a si. Thianhlimnak cu tuahsernak kip ah Pathian cung zumhnak le dawtnak he tuah ding a si timi kha a thei tu nu thiang zong a si. Amah thil ti khawhnak cungah zeihmah ruamkai nak lungthin ngeih loin Thiang Thlarau Pathian cungah a zumhnak a chia kho mi nu a si. A thilrit hna kha Khrih kut thiang cungah a chan kho tu nu thiang zong a si. St. Theresa nunnak nih a kan cawnpiak mi cu ‘thianhlimnak timi cu mikip nih tuah khawh mi le nun khawh mi lam a si. Sihmahsehlaw nifatin nunnak ah tangdornak lungthin, Pathian zumhnak le dawtnak lungthin ngeih a herh’ timi nun zia kha mithiang nu sin in kan i cawn khawh mi a si.
Thazang petu /- Fr. Fidelis Maung Sein