Pathian ruanṭuan tu tampi thim an si nak hnga zumhnak he thlacam u sih

Nihin cu Zarhkel (11) nak zarhpi ni a si. (Matt 9:36-, 10:8) chungah “Mi zapi kha a hmuh hna tikah khaaltu ngeilo tuu bantuk, bochan awk ngeilo lungrethei awlok chong in an um caah a zangfah hringhran hna. Cutikah a zultu kha, ‘rawl ṭuan awk a tam i a ṭuan tu an tlawm. Cucaah rianṭuan tu tampi a thlah nak hnga lo ngeitu sinah khan thlacam tuah u’ a ti. 

Dawtmi u le nau hna, nihin kan relmi cathiang kan zoh tikah ‘Pathian bia thiang chim in a rian ṭuan ding kong kha kan vawlei pi nih a herh tuk hringhran mi a si’ timi kha a kan cawnpiak mi a si. Jesuh nih mi tampi a hmuh hna tikah a zangfak hna. A ruang cu khaaltu ngei lo tuu bantuk an si a ti. Nihin kan vawlei pi kan zoh tik zongah Khrih  thawngṭhabia tampi chim ding a herh timi kan hmuh mi a si. Nunnak kan timi zong kan zoh tikah vawlei nunnak lawng kan zoh tawn i thlarau nunnak hi kan philh tawn i, cu thlarau nunnak thawngṭhabia a chimmi hna zong kha kan philh tawn hna.     

Kan vawlei pi ah minung milu kan rel, kan zoh ṭhan tik zongah Khrihfa hna hi kan tlawm tuk rih fawn kha kan hmuh khawh fawn. Khrih nih lamkaltu hna a thlah hna i thawngṭhabia an phuan bantukin kan nih hna zong nihin vawlei pi ah kal in thawngṭhabia chim ding kha kan si ve. Jesuh Khrih chan zongah khaaltu ngeilo tuu bantukin minung tampi an um tikah a zangfah tuk hna bantukin, nihin kan mah hna zong Khrihfa a si rih lomi hna sinah kal in Khrih thawngṭhabia chim ding kha ṭuanve kan ngei ve hna. 

Kan nu bupi zong nih Pathian aunak caah thlacam dingin a kan fial ve. A ruang cu Pathian bia thiang mi kip sin a chim phuangtu an um khawh nak hnga ding caah a si. Khrih khamhnak mi kip nih an co nak hnga ding caah a si. lo ngeitu Pathian nih Pathian rianṭuan tu tampi a thlah nak hnga ding caah thla kan cam zong hi a si. “Vailam cungah thihnak in tiangin a kan daw bik tu, maw Jesuh lungthin thiang, kan nih bu kha kan zangfah ko tuah. Minung vialte zong nikhatkhat ah vancung ram pel loin kan phak khawh nak hnga na phung ding cawnpiak tu, Biaknak phung hruaitu a thiangmi Siangbawi, brother, sister le saya hna kha kan nih chungin run thim ko hna’ tiah thla kan cam. 

Khrih nih lo ngeitu sinah thlacam u law tiah a timi kannih hna nih a tak tein kan cam bantukin nihin zong thlacam ding kha tampi kan herh rih. 

Khrihnih zultu 12 a thim hna i a thlah hna tikah mi zaw damternak, mithi thawhternak, cun thinghmui mi hna thianter khawhnak, khuachia hna ṭhawl khawh nak timi hriamnam, Amah Pathian ṭhawnnak kha a pek hna. Cuasicaah, lamkaltu a simi, Khrih rianṭuan tu pawl, Jesuh Khrih sin in thlah a simi paoh nih cun mah bantuk ṭhawnnak hna kha pek an si dih. Mah ṭhawnnak hna he vawlei pi ah kal in Khrih thawngṭhabia chim dingah, nihin ah auh cang mi kan si. Khrihfa a simi paoh, Khrih sinin thlah a simi paoh nih Khrih thawngṭhabia chim ding kha rian kan ngei cio hna. Mah rian cu ṭuan ding in rian khinh mi zong kan si. 

Nihin zarhkel (11) nak ah thla kan cam dingmi cu ‘Pathian rianṭuan tu pawl kha Pathian nih a thlah hna nak hnga, cun Pathian rianṭuan dingin timhtuahnak a ngeimi hna zong thim mi an si nak hnga’ thlacam i zuam hna u sih. Pathian rianṭuan tu tampi a thlah nak hnga zumhnak taktak he thlacam hna u sih. 

Thazang petu /- Fr. Dominic Kung Tial