Nu Mary kan upat nak sullam

Nihin RVA in thlarau thazang a la tu nan dih lak in Bawipa nih a thar in thluachuahnak in pe ko hna seh. Bupi nih relding ah a kan timhpiak mi (1Siangpahrang 19:19-21; Lk 2:41-51) hna chungin, nihin cu Mary Lungthin thiang puai ni a si bantukin “Nu Mary cu kan biak mi a si lo, kan upat mi a si” timi in thazang i lak hna u sih. 

Midang dawtnak na cham khawh lo zongah um ko seh, a lung fahnak va pe hlah! Jesuh lungthin thiang puai a dih a thaizing (nihin) cu Bupi nih sual hram ngei loin aa semmi Mary lungthin thiang puai a kan tuah piak. Pentecost puai a dih a thaizing ah Mary cu Bupi a nu a sinak puai a kan tuah piak. Sep 14, vailam tung puai a dih a thaizing ah Nu Mary a lung kuainak puai a kan tuah piak. Hitin hmunkhat te ah a kan tuahpiak nak sullam cu kan mah vialte nih Pathian dawtnak, kan Bawipa Jesuh Khrih zangfahnak chungah kan um camcin khawhnak hnga ding caah a si. 

1944 kum Voi-2 nak vawlei ralpi a dih hna ah Pope Pius nih ‘Vawlei mi kan dih lak Nu Mary zohkhenhnak, thlacam piaknak kan hmuh khawh cio nak hnga’ tiin nu Mary lungthin thiang puai hi a kan tuah piak. A timhnak cu ram le miphun karlak remnak, daihnak le misual mi nih sual ngaichihnak an ngeih nak hnga caah tiin hi puai cu tuah mi a si. Hi puai kan tuahnak thawngin Pathian dawtnak, kan Bawipa Jesuh Khrih a zangfahnak a thei chinchin mi le Bawinu a upat mi, aa bochanmi kan si khawh nak hnga, nu Mary lungthin thiang sinah kan nunnak kan zeizong vialte pekchanh hna u sih. 

Mary upat nak le thangṭhatnak a tawinak in raut ṭi hna u sih. (Lk 1:41-43) ‘Thiang Thlarau in a khat mi Pathian nu a si caah Thiang Thlarau in a khat mi Elizabeth nih upat nak a pek.’(Lk 1:48) ‘A tu thawk in mi vialte nih Thluachuak nu an ka ti lai.’ (Biathlam 12:1-17) ‘Jesuh a zummi vialte kan nu a si caah’; (Gen 3:15) ‘Rulpi a lu a lam tu a si caah, Pathian nu a si caah’; (Jn 1:1-2) ‘Bia cu Pathian a si. Pathian cu bia a si, (14) Bia cu minung ah a cang.’ Pathian minung cannak aa lak nak cu Nu Mary sin in a si. Fapa Pathian i a nu a si. (Matt 1:17-18) ‘Thiang Thlarau innchung nu a si.’ Thumkomh Pathian an i komhnak cu nu Mary a si. 

Cucaah zumtu hna nih nu Mary cu Pathian hmun ah chiah in kan biak mi siloin upatnak kan pek mi tu kha a si. Nu Mary cu a zungzal in a thiang mi nu a si. (Isiah 7:14) “Ngaknu thiang nih fa a pawi lai i fa a hrin lai. A min ah Emanuel tiah sak a si lai.” (Lk 1:27) “Ngaknu thiang a min cu Mary a si.” Mary cu ngaknu thiang a si. Sual hram ngei lo mi nu a si. 

1858 kum Mary nih Benedict sin a rak langh lio ah “Sual hram ngei loin aa semmi Bawinu ka si” tiah a ti. Sual hram ngei mi nih mi sual a khamh kho lo. Misual nih miding a hring kho lo. Misual nang lei kei caah miding a kan hrin piaktu nu cu misual a si kho lo. Zeicah tiah misual nih misual a khamh kho lo. Misual khamhtu ding caah miding a herh. Miding a hring tu ding cu a thian hmasa a herh. Cucaah Profet Isaiah nih “Ngaknu thiang nih fa a pawi lai i fa a hrin lai a ti.” (Lk 1:27) ah ‘Ngaknu thiang a min cu Mary a si. Mary a min cu ngaknu thiang a si.’ 

Mary lungthin thiang nih a kan cawnpiak mi cu ‘na nunnak a dihlak, na ruahnak a dihlak in Bawipa aa ruahchanmi, Bawipa aa thaih chanmi si ding’ kha a kan duh piakmi a si. Kan Bawipa Jesuh cu vailam cungin an ṭhumh i nu Mary ṭang cungah an pomter bantukin kan nunnak kan zeizong vialte he nu Mary lungthin thiang sinah pekchanh hna u sih. Nan dihlak cungah Pathian nih thluachuah in pe ko hna seh. Amen

Thazang petu /- Saya Francis Khua Pheng