Sagrada Família Basilica ah Pope Leo nih daihnak caah rianṭuan a herhnak a langhter

Pope Leo XIV nih Sagrada Família a tlawnnak cu Bawipa Thisa Sacrament hmai ah thlacamnak le Antoni Gaudí thlan tlawnnak in a thawk. Gaudí thihnak kum zakhat tlinnak le Biakinn pi thluachuah pek nak puai Thawngṭhabia chimnak ah: “Thawngṭha nih Khrih cungah zumhnak lei karhlanternak kong le Khrih zumhnak taktak cu thahnawnnak, zeirel lonak le harnak a tongmi hna zeirel lonak he aa ralchan mi a si” tiha Pope nih a ti.

Catalan le Spanish holh in phungchimnak ah Pope nih, “Keimah cu Amah ka si ti nan zumh lo ahcun nan sualnak chungah nan thi lai” timi Johan Thawngṭha chungin a chim. “Hi bia hna hi a fekmi bia an si i khamhnak caah sawmnak zong an si” tiah a ti. “Jesuh na zumh buin ral doh khawh a si lo. Jesuh kan zumh buin sualnak a ngei lomi kan that kho hna lo. Jesuh kan zumh buin harnak a tongmi, a ṭapmi, sifak harsa in a zammi hna kha kan kaltak kho hna lo” tiah a ti.

Sagrada Família Basilica ah Pope Leo XIV hruainak in Missa tuahnak (@Vatican Media)

Pope Leo nih amah a dong tu Siangpahrang Felipe VI le Siangpahrangnu Letizia, Spain Prime Minister Pedro Sánchez, le ramkhel le Khrihfabu nawlngeitu hna kha kut tlaih chawnhnak a ngeih hnu hna ah, “Sagrada Família Basilica innka pi cu a kut aa samhmi bantukin mi vialte kha hi biakṭheng ah Pathian Bia ngaih awkah a sawm hna. Cu nih cun Bawipa dawtmi, a Thisa in a cawmmi chungkhar sinak ah a kan ser” tiah a ti.

Rammi le biaknak hruaitu hna sinah bia a chim tikah, ‘Basilica pi nih Pathian bia thiang le Bawipa Thisa (Eucharist) pawngah mi a pumh tu lungrualnak hmelchunhnak a si’ tiah a ti. Biakinn sakning zoh tik zongah, Khrihfabu cu lung tampi in sakmi a nungmi inn pi he a tahchunh i Khrih cu a hrampi le aa donghnak a si’ tiah a ti. Basilica saknak a kal cuahmahmi bantukin Khrihfa nunnak zong Pathian nih rian a limmi pakhat ah aa tel mi bawmtu hna si dingah sawmmi kan si tiah a ti.

Pope nih “Basilica suaisamnak nih thlarau lei sullam tampi kha a langhter. Hi Basilica pi nih Pathian nih a kan tlanhnak, Pathian cung kan i ruahchannak le Pathian dawtnak hmelchunhnak hna kha a langhter. Biakinn pi cung i a ceu iin a ummi vailamtah cu zumhnak tehte le khuapi caah ceunak a si. Zumhnak langhternak ah zuksuai mi hna zong nih a dang tein sullam an langhter cio hna” tiah a ti.

Sagrada Família Basilica ah zumtu hna Missa kai nak (@Vatican Media)

A phungchimnak a dongh nak ah, Pope Leo nih Sagrada Família saknak ding caah a kenkip in a dirkamhtu hna cungah lawmhnak bia a chim i Basilica a ropui taktak mi a si tiah a ti, mah biakinn pi zong cu  thawngṭha chimnak dingah hriamnam ṭha taktak a si tiah a ti. Zumtu hna zong kha Khrih lei lawng zoh-hoih in um loin hlawtmi le harnak a tongmi hna zong kha cawisan dingin a forh hna. Basilica pi nih a langhter mi dawhnak le rumra bantukin ruahchannak le ṭhatnak tuahnak in Khrih tehte khaaan dingin a forh hna.