Pathian zumh timi cu a bia ngaih le a nawl zulh kha a si

Tuzing kan cathiang chungin kan Bawipa Jesuh Khrih nih a kan cawnpiak mi hi zumtu hna kan caah a biapi tukmi le a herhtuk mi a si i tuchan Khrihfa bu tampi nih nawlbia cu a herh ti lo. Kan Bawipa Jesuh Khrih nih a kan tlenh cang, a kan khamh cang caah kan Bawipa Jesuh Khrih lawmh le thangṭhat lawnglawng hi abipi ko cang. Nawlbia cu kan zulh khawh ti lo caah pei kan Bawipa Jesuh Khrih nih Calvary vailam cungah cun a kan thih piak cang cu tiah minung tampi nih an ti i nawlbia zul loin, anmah duh ning in nuahnak, a lawmhnak menmen in Pathian a bia mi hi tampi an um. 

Nawlbia hi Pathian nih Sinai tlang cungah Moses a pek mi nawlbia 10 le cu nawlbia pin ahcun Judah mi hna nih an i serchommi, an chapchihmi, phungbia nawlbia timi hi theihthiam awk, thleidan thiam awk kha a herh ngaingai. 

Judah mi hna nih hin nawlbia 10 pin ah hin anmah nih an serchommi, a tuah chommi tampi a um i cuticun an tuah chommi zulh le anmah tuahsernak in tuah le zulh kha an rak i tim hna. Tahchunhnak ah Pathian nih nawlbia chungah ‘Pathian ni cu na thianter lai’ tiah nawlbia a kan pek i Judah mi hna nih an chapchih mi cu ‘Sabath ni ahcun ahohmanh khual nan tlawng lai lo. Nan kar kha kar thongkhat pinin nan kar lai lo. Nan kar a si ahcun cucu khualtlawn a si cang caah Sabath ni nan buar a si’ tiah timi bantuk te hna kha an i cawnpiak hna. Sabath ni ah na caw maw na saṭil maw pakhatkhat khur ah a tlak ahcun a chuah cu na chuah piak ko lai nain a hma na men piak lai lo. Sii na thuhpiak lai lo tibantuk te hna le um kheng tongh lai ah tuah ṭuan ning, rawl ei lai ah kut ṭawl ning tibantuk phungphun kha an ser chih, an chapchih i cuticun anmah dinfel tuahser ṭhatnak in Pathian lungton kha an rak i zuam hna. Sihmahsehlaw Pathian nih a cohlang hna lo. A pom piak hna lo. Aho tuahsernak hmanh kha Pathian nih a cohlaan piak hna lo ti kha kan hmuh mi cu a si. 

Cutikah Pathian nih a Fapa ngeihchun te kha vawlei ah a rak thlah i, kan Bawipa Jesuh Khrih nih kan caah temhtuarnak, thihnak, a thawhṭhannak in a kan khamh, a kan tlenhnak kha zumh loin, anmah tuahsernak le anmah dinfelnak le anmah phuahcop mi cawnpiak nak phungbia in Pathian lung ton aa tim mi hna caah khan mithiang Paul hna nih a timi cu “Nanmah tuahser nak le dinfelnak in phungbia nan zulhmi le Pathian lungton nan i timh mi hi cu pakpalawng a si. Nawlbia cu thihnak a si. Khrih zumhnak lawnglawng in khamhnak kan hmu, luatnak kan hmu” tiah Rome cakuat chungah a timi hna kha kan hmuh mi cu a si. 

Cucu Jesuh Khrih kan ca i a thihnak, a thawhṭhannak, a kan khamh, a kan tlenhnak kha zum loin anmah tuahsernak le dinfelnak phungbia cawnpiak nak in Pathian lungton aa timi hna a rak timi hna kha a si i kannih zumtu hna kan caah cun Pathian nawlbia hi abiapi tuk hringhranmi a si ti kha cathiang ah kan hmuh mi kha a si. 

Kan Bawipa Jesuh Khrih nih “Moses nawlbia hna le Profet hna cawnpiaknak nawlbia kha hrawh awk ah a ra tiah ka ruat hlah u. Hrawh awk ah siloin tlinter awk tu ah ka ra” tiah a ti. Moses nawlbia hna le Phungbia cawnpiakmi hna hi ataktak ti ahcun ‘Bia’ kha a si i, asinain kan Bawipa Jesuh Khrih nih cun bia lawng khan siloin amah a nunnak le a pum thiang hrimhrim in, mithmuh kut tongh in Calvary vailam cungah a tlinter mi kha kan hmuh. 

Nawlbia 10 hna kan zoh tikah, pakhat nak in pathumnak tiang hi Pathian le minung i pehtlaihnak a si i pali in pahra tiang hi minung le minung i pehtlaihnak kha a si. Vailam kan timi zong cu vawlei in vanlei Pathian le minung i pehtlaihnak a si i a phei in aa khangmi hi minung le minung i pehtlaihnak kha a si i kan Bawipa Jesuh Khrih hrimhrim nih Calvary vailam cungah khan mithmuh kut tongh in a tlinternak minung le minung i dawtnak, Pathian le minung i dawtnak pehtlaihnak a tlinternak kha kan hmuh mi kha a si. 

Cucaah dawt mi u le nau hna, Pathian bia, nawlbia kan timi hi minung ṭemṭawntu le minung a tlaihip tu sawhsawh menmen ah siloin kan i tinhmi zungzal nunnak ah kan phak khawhnak hnga ding caah lam hmuhsaktu, kilkamhtu, vengtu a si ti kha fiang tein cathiang ah kan hmuh mi kha a si. 

Ti cu kan duhnak hmunhma ah tlawt-tlau lo tein a phak khawhnak hnga ding caah ti lam kan tuahpiak bantuk tein kannih, zumtu vialte hna sualnak chungah tlawt-tlau lo tein, Satan pennak chungah kan kal lo nak hnga ding caah, kan i tinhmi zungzal nunnak kan phak khawhnak hnga ding caah Pathian nawlbia hi abiapi tuk hringhran mi a si. Pathian nawlbia lo cun kan i tinhmi hmunhma phak khawh a si lo ti kha cathiang ah fiang tein kan hmuh mi kha a si. 

Cucaah cun ahohmanh nih nawlbia lak i a hmebik te hmanh kha zul loin a um i midang zong kha cubantukin a cawnpiak hna ahcun cu pa cu Vancung Pennak chungah a hmebik a si lai. Cun nawlbia kha a zul i midang zong kha cubantuk zulh awk tiin a cawnpiak tu hna cu Vancung Pennak chungah mi ngan an si lai tiah kan Bawipa Jesuh Khrih nih tuzing caan ah a kan cawnpiak mi kha a si. Khrih kan zumh, Pathian kan zumh kan ti a si ahcun a bia, a nawl ngaih le zulh kha zumh cu a si ko. Thazang Pe tu /- Saya John Chan Uk