Bawipa Thisa Zarhpi Ni
Nihin ni caah thlarau thazang lak ṭi dingin Bupi nih a kan thimpiak mi cathiang hna cu (Deut 8:2-3,14-16; 1Cor 10:16-17; Jn 6:51-58) hna hi an si.
Dawt mi u le nau hna, nihin ni ah Bupi nih Bawipa Thi le Sa puai kha sunglawi ngai in a kan tuah piak. Zei ruangah dah Bawipa Thisa puai cu kan tuah? A ruang cu, Jesuh Khrih cu khamhtu a si, nunnak a si ti ruangah asi.
Jesuh Khrih cu Calvary tlang cungah a thi i a thisen in a kan tlanh. Cucu raithawinak a si. Raithawinak a um lo ahcun biaknak a si lo. Biaknak cu raithawinak nih khan a tlinter. Biakam hlun kan zoh tikah Isarel miphun pawl nih raithawinak an tuah tikah tuufa te, asiloah saṭil pakhatkhat an thah i a thi an luanter? Pa Pathian luntlinhnak ding caah an tuah mi asi. Mah raithawinak thawngin an thlacamnak hna cu Pathian nih a cohlaan hna i an nunnak cu Pathian nih a zohkhenh hna, a cawm hna i a khamh hna.
Hlaan raithawinak can ah Jesuh Khrih nih amah pum in thawinak a tuah i rawithawi ning kha a thlen. Calvary tlang cung Jesuh Khrih a thihnak cu raithawinak taktak asi. Biakṭheng kan timi ah nifatin kan tuah mi Missa thawinak, Jesuh Thi le Sa, cu nunnak asi timi kha mi tampi nih an zum kho lo.
Jesuh Khrih nih a thi le sa kong a chim tikah, Judah mi pawl nih minung ruahnak menmen in an zoh, an ruah tikah an thei kho lo, an zum kho lo. “Ka sa a ei i ka thi a dingmi paoh cu zungzal nunnak an ngei lai” tiah a chim tikah a kan sersat tiah an ruah. Zeiruangah kan mah ei awk ah a thi le sa cu a kan pek tiah an ti i Jesuh cu an kal tak dih. An tlik tak dih. Sihmahsehlaw, biatak kan chimh hna. “Ka sa a ei lo i ka thi a ding lomi paoh cu nunnak an ngei lai lo” tiah a ti. Nunnak tiah a chimmi cu zungzal nunnak vancung ram kong a chimmi asi.
Jesuh nih ka Pennak cu vawlei hi a si lo. Ka Pennak cu zungzal nunnak vancung ram kha si a ti. Mah kong kha Judah mi hna le mi tampi nih an thei kho lo. Cucaah a zultu hna zong a timi hna cu ‘nannih zong nan zumh lo ahcun kir ko u, ka kal tak ko u’ tiah a ti ko hna. Sihmanhsehlaw, Peter nih a leh mi cu “Bawipa, nang cu Khrih na si. Nangmah sin lawngah nunnak a um. Ka zumh ko” tiah a ti ve.
Cu nunnak, Jesuh Khrih kong thawngṭha cu Peter le zum tu hna nih vawlei khuazakip ah an chim ruangah Jesuh a zummi paoh nih cu nunnak an ngeih khah.
Nihin ah “Corpus Christi” kan timi Bawipa Thisa puai kan timi cu a sunglawi tuk hringhran mi puai a si. Khrihfa hna caah kan nunnak taktak zong asi. Nihin raithawinak a ngei lomi biaknak cu biaknak taktak asi lo. I pumh sawh in thlacam sawh kha asi ko.
Nihin kan i ruahchanmi nunnak cu Khrih nih a kan pek mi nunnak kha asi. Ro a kan pek tak mi a thi le sa “Keimah ka thi le ka sa a ei a ding mi paohpaoh cu zungzal nunnak an ngei lai” tiah a timi ‘Ro’ kha kan zumh mi cu asi.
Khrih ah nung taktak hna u sih. Khrih ah ruahchannak ngei u sih. Khrih ah a thar in zumhnak ngei u sih. Kan zumh khawh lo asi ahcun Judah mi hna bantukin Khrih kha minung ruah sawhsawhnak in a zummi le aa pum mi kan si ko lai.
Bawipa Thi le sa puai kan tuahnak thawngin mi vialte hna zong nih Khrih kha zum taktak kho hna sehlaw, mi vialte nih a kan pek tak mi nunnak cu ngei hna u sihlaw, zungzal nunnak kan phanhnak hnga, Khrih he kan nunnak kha nihin hi vawlei ah tehte khaan in nun i zuam cio hna u sih.
Thazang pe tu/ – Fr. Dominic Kung Tial