Pathian sin ah zeitin dah pekchanhnak na tuah?

Nihin RVA service in Pathian bia in thazaang a latu nan dihlak cungah a thar in Bawipa nih thluachuah in pe ko hna seh! 

Nihin voikhatnak Bible kan relmi 2Tim 4:1-8, Thawngṭhabia Mk 12:38-44 chungin; Mi zapi nihcun Jesuh bia cu lunglawm ngaiin an ngai. A cawnpiak lio hna ahcun; ‘phungbia cawnpiaktu Saya pawl hi i ralring hna u; annih cu an puan fual pipi he i chawh i, chawdawr tlang ah mi nih upatnak in ka chawn hna seh ti a duhmi an si. Pumhnak ah ṭhutdan a ṭha khun mi i ṭhut kha an duh i, zapi rawldanghnak ah upatnak hmun i ṭhut kha an duh. Nuhmei kha an ei an hmuar hna i, an inn an lo kha an chuh hna. Cun zapi nih ka hmu hna seh tiin thla kha saupi pi in an cam. Hi hna hi cu an dantatnak a fak chinchin men ko lai’ tiah a ti. 

Jesuh cu Biakinn tangka chiahnak pawngah khan a ṭhu i, tangka an sanhmi kha a zoh hna. Mirum tampi nihkhan tangka tampi an sanh lengmang. Hi lio ahkhan a si a fak ngaimi nuhmei nu pakhat a ra ve i, piahra tluk a man a simi dar tangka pahnih a sanh ve. Jesuh nihkhan a zultu kha a kawh hna i, ‘Hi a si a fak ngaimi nuhmei nu nihhin tangka kuangah midang vialte nakin tambik a sanh. Zeicah tiah a dang nihcun an ngeih hlei kha an sanh. Sihmanhsehlaw hi nu hi cu, sifak ngai a si ko nain a ngeihmi vialte kha a sanh dih. A nunnak ca i a hman dingmi kha aa thawh dih’ tiah a ti. Bawipa thawngṭhabia a si; Maw Bawi Khrih, nangmah cungah thangṭhatnak um ko seh!

June thla chung kan lut cang. June thla cu Jesuh Lungthin Thiangbik thla a si bantukin minung mithmuh ah aa dawhmi le a thiangmi si loin Pathian mithmuh ah Pathian lungthin ah aa dawhmi, a thiangmi lungthin ngei usi timi in thazaang la hna usih. 

Nihin Lai mi nu pawl cu Evangelist Pastor hna dawt cu kan thiamtuk. Asinain innchungkhar hruaitu a va dawt a thiam lomi kan tampi. Biakinn chung nunzia a thiammi kan tampi ko. Asinain Biakinn lengah nunzia a thiammi cu mitlawmte lawng kan si. Nihin thawngṭhabia chung, kan Bawipa Jesuh nih ‘phungbia cawnpiaktu pawl kha i ralring hna u; Zeicahtiah annih cu mi nih ka upat hna seh, mi nih ka thangṭhat hna seh ti an duh i thla kha saupi pi in an cam’ tiah a ti. Mi nih upat a duhmi kan tampi ko.

Nihin ahlu a pemi vialte lakah nuhmei nu a pekmi a tambik tiah Jesuh nih a ti. A cheu cu mi nih ka hmu hna seh, mi nih ka thangṭhat hna seh ti an duh. A cheu cu an ngeihmi a hleivuang kha an pek tiah a ti. Ahlu lakah man a ngeibik a hlu cu na hlut mi kha aho sinah dah a phanh timi theih lomi kha a si. Khrihfabu caah tiin pakhat pa nih tahan um khap hleihnih a hlut i, um chungah ca pakhat a ṭial chih. ‘Mah um hi rawl chuannak ah nan hmang lai lo’ tiah a ti. 

Nihin ah kan Bawipa Jesuh nih a hlu a pemi vialte kha a zoh tikah a uarbik mi, mi pakhat a um; cucu nuhmei nu a si. Bawipa ram kauhnak caah Bawipa nih nangmah kha an herh.  Na nunzia in siseh, na hmurkaa in siseh, na chawva in siseh Bawipa ram caah rianṭuantu ṭha a herh. Bawipa ram caah rianṭha na ṭuannak ah siseh, ahlu na peknak ah siseh minung nih ka hmu hna seh, mi nih ka thangṭhat hna seh timi lungput siloin Pathian nih ka hmu ko seh, Pathian nih ka cohlanpiak ko seh timi lungput tu siseh. A hlei a vuangmi siloin na ngeihmi chung tein a pe khomi si i zuam ko. Mi nih a thawngṭha chim a ṭhatuk, a thlacamnak a ṭhawngtuk, a hmurka a ṭhatuk timi lungput a ngeimi va si hlah. Minung nih uarmi, minung nih cawisan mi, minung nih thangṭhat mi nakin Pathian nih a uarmi, Pathian nih a cawisan mi, Pathian nih a thangṭhat mi a ṭha deuh. 

Peter nih ‘Minung lungton nakin Pathian lungton a ṭha deuh’ tiah a ti. (Lam 4:19). Mi nih ka thangṭhat hna seh, mi nih ka hmu hna seh timi lungput ngeih in a rianṭuan mi le ahlu a pemi va si hlah. Bawipa sunparnak langhternak caah a rianthiang a ṭuanmi le ahlu a pemi va si ko u. Nihin kan Bawipa Jesuh nih a ram kauhnak caah rian a ṭuantu hna le ahlu a pemi hna a zoh tikah a lung a donghmi an tampi ko. Asinain a uarmi hna zong an um. Cucu nuhmei nu a si. Nuhmei nu nun cawngin Bawipa ram caah rianṭha ṭuan usih. A ngaitu nan dihlak cungah Bawipa nih thluachuah in pe ko hna seh! Kaa lawm.

Thazang Pe tu /- Saya Francis Khua Pheng