Nawlbia Ngan
Nihin ni caah Bupi nih thlarau thazang lak ṭi dingin a kan timh piakmi Bible cathiang hna cu (2Timothy 2:8-15; Mark 12:28-34) hna hi an si.
Nihin ni caah kan Bible thiang hna nih a kan cawnpiak mi cu “Nawlbia ngan” timi hi a si. (Mathai 22:34-40) chungah siseh, Luke 10:25-28 ah siseh kan hmuh khawhmi a si. Hi kan relmi cathiang hlaan te ah hin kan Bawipa Jesuh Khrih le Sadusee mi hna thihnak in thawhṭhannak kong an i ruah hna i bia an i al hna i, Jesuh zong nih Sadusee pawl kha fiang tein a cawnpiak hna hnu ah, cun Phungbia cawnpiak tu Saya pakhat nih bia an rak i al mi a thie mi pakhat a si ve bantukin, kan Bawipa Jesuh Khrih sin ah khan a ra i bia foih a vun timh.
“Nawlbia lak ah hin zei nawlbia dah a biapi bik a si” tiah a hal. Kan Bawipa Jesuh Khrih zong nih a leh ve mi cu “Isarael mi hna ngai tuah u! Bawipa kan Pathian lawnglawng hi Bawipa cu a si. Bawipa nan Pathian cu nan lungthin dihlak, nan nunnak dihlak, nan ruahnak dihlak le nan thazang dihlak in nan dawt lai timi hi a biapi bik mi cu a si ee” tiah fiang tein a chimh hna.
Cucu Bawipa Pathian nih (Deut 6:4-5) chung ta kha a vun lak i Moses sinah nawlbia ngan a pek mi hna “Bawipa Pathian lawnglawng dawt ding, Bawipa Pathian lawnglawng a nawl ngaih ding, Amah lawnglawng biak ding le Amah lawnglawng hi nunnak dihlak, thazang dihlak, ruahnak dihlak le ṭhawnnak dihlak in dawt ding” kong a chimh mi hna kha a vun lak ṭhan i kan Bawipa Jesuh Khrih nih hi pa hi fiang tein a chimh mi hi kan hmuh khawh mi cu a si.
Nihin ah dawtmi u le nau hna, Bawipa kan Pathian cu a kan sertu asi i, a kan sertu, zeizong vialte a kan pe tu, kan duh herhmi kan hal tikah a kan pe tu kan Pathian, kan um nak kip ah a kan zohkhenh tu kan Pathian hi nihin na lungthin dihlak, na nunnak dihlak, na ruahnak dihlak, na thazang dihlak in na daw kho taktak maw? Kan Pa Pathian nih a kan dawt tuk hringhran caah hin a Fapa Jesuh Khrih hi a kan pek timi hi aho cio paoh nih kan theih cio mi asi.
Asiahcun nang le kei a kan pek mi, a dawtnak a sangbik mi a kan langhter tikah nang le kei nih zeitin dah kan Bawipa kan Pathian kha kan dawtnak kan langhter ve lai. Lungthin dihlak in a ti. Cheuchumnak zeihmanh um loin, ruahnak dihlak, kan ruah mi vialte ahohmanh ruah loin kan Bawipa Pathian lawng ruat in, kan lungthin dihlak te in Amah Pathian lawnglawng kan nun nak a ngeitu asi tiin kan nunnak dihlak in, kan ruahnak kan thazang dihlak in dawt ding hi a kan chimh mi cu asi. Cutin Pathian kan dawt hnu ah “na innpa kha nangmah nai dawt bantukin na dawt hna lai” tiah a ti.
Dawtmi u le nau hna, hi hna pahnih hi a biapi deuhmi a si ee. Nawlbia tampi a um ko lai. Sihmanhsehlaw, hi hna pahnih chungah hin ai fun dih ee tiah kan Bawipa Jesuh Khrih nih a kan cawnpiak mi asi. Phungbia cawnpiaktu Saya pa zong hi cu vialte cu lak ṭhan in Pathian cu kan dawt ding a si. Kan nunnak, kan thazang, kan ruahnak dihlak in kan dawt hnu ah kan innpa hna zong cu minung asi mi hna nih hin kan dawt hna ding asi ee. Kan zulh dingmi asi ee a ti. Apeh ṭhan rih mi cu “hi pahnih zulh hi Pathian sin i khangh raithawinak le raithawinak dang pekchanhnak nak in a ṭha deuh” a ti.
Phungbia cawnpiaktu Saya pa zong nih cu pahnih kan zulh tikah kan Bawipa Jesuh Khrih dawt ding, innpa dawt ding hi kan tuah, kan zulh tikah hin raithawinak nak in a ṭha deuh ti hi a vun leh ve mi cu asi. Jesuh Khrih nih a vun leh mi cu “a bia lehnak cu a ṭha ngaingai ti kha a hmuh tikah Pathian Pennak he nai hlat lo ee” a ti.
Dawtmi u le nau hna, nang le kei kan Bawipa Pathian nih nawlbia nganbik a kan pek tak mi hi nihin kan zulh kan tuah tikah hin innpa dawtnak ah siseh, Amah dawtnak ah siseh, kan tuah kan zulh tikah hin Pathian Pennak he kan i hlat ve lo timi hi kan hmuh khawhmi cu asi.
Cucaah “Ahohmanh leiba i ba hlah u. Nan i bat mi cu pakhat le pakhat nan i dawt lawnglawng kha si ko seh. A minung hawi a daw mi paoh nih cun nawlbia kha a zulh asi ko” tiah Rome 13:8 chungah kan hmuh khawh mi cu a si. Cuasicaah, Kan Bawipa, kan Pathian nih a kan dawtnak te hi philh lo tein a kan dawtnak leiba hi zeitin dah ka cham khawh lai timi tu kha ruat in zeihmanh kan pek khawh lo hmanh ah nifatin kan nunnak ah hin kan lungthin dihlak le kan ruahnak dihlak le kan nunnak dihlak, kan thazang dihlak in kan Bawipa Jesuh Khrih caah i pek in, Amah dawt in, innpa chak-thlang zong a daw kho mi kan si cio nak hnga Bawipa nih a thar in thluachuahnak kan pe cio hram ko seh.
Thazang petu /- Saya William