June 6-12 tiang Pope cu Spain ram a tlawng lai

Pope i a voilinak Ramdang Khualtlawnnak kong he pehtlai in Vatican Thawngzamhnak Zung i Director nih chimphuannak a tuah. Pope i Lamkaltu Khualtlawnnak a voilinak cu Spain ram a tlawng lai tiah theih asi. Cu ram chung hna ah a bik in Madrid, Barcelona le Canary Islands ah a kal lai i. “Daihnak, raltuknak caah hmanmi hriamnam hna hrawh awk le hlohnak kong, lungrualnak, mino, nunphung, chanthar thiamsannak hna, mipeem hna kong he pehtlai in bia chim ding tampi a ngei lai tiah theih asi.

Pope i Spain ram khualtlawnnak cu a biapi ngaimi khualtlawnnak si i June 6 in 12 tiang a rau lai. Kilometer 2,500 a hlat i Madrid, Barcelona le Canary Islands hna ah a caam pah lai. Tutan i Pope a khualtlawnnak hin hall khaan, zaangleknak hmun, tonpumhnak hmunngan pipi hna ah biachimnak a ngeih lai caah Catholic zumtu sing nga (500,000) hrawng an i tel lai tiah ruahchannak nganpi a um tiah Vatican Thawngzamnak Zung Director nih a chim. Spain ram cu kumzabu 16 a lai chan lio hna ah Catholic Bupi chungin mifim mithiam hna le mithiang St.John of the Cross le Avila in mithiang Theresa hna a chuahkehnak ram asi tiah Vatican i spokeperson (biachimnak nawl ngeitu) nih a chim. Hi a khualtlawnnak ah mino tampi he i tonnak, Spain ram i nunphung dawhdawh hna le a rum ngaimi an tuanbia hna kha Pope nih a hmuh lai. Bupi, ram uktu hna le nunphung karlak  bia ruahnak zong a ngei lai. Thiamsannak le ṭhanchonak kong zong chim ding a ngei tiah theih asi.