Myanmar Bishop pawl Ad Limina Apostolorum (Vatican Khualtlawnnak) nihnihnak
Myanmar ram in Rome – Vatican lei ah khual a tlawngmi Bishop hna cu khualtlawn a nihnih nak ah Vatican um Bupi zung hmun 4 ah rianṭuantu phu hna he ton biaruahnak an ngei hna tiah theih a si.
Zing 7:45 am ah Santa Marta ah Missa raithawinak an tuah i Bishop Felix Lian Khen Thang nih thlarau thazang pek nak in siseh, Missa hruainak in siseh tlang a tlak hna.
Sancta Martha Chapel chungah Missa raithawinak tuah dih in Myanmar Bishop pawl a phu in hmanthlaknak. Photo: Fr. Dominic Thang Suan Lang
Dicastery for Lay, Family and Life” (Piazza San Calisto,16) zungpi chungah Myanmar Bishop pawl hmunṭhu Zung rianṭuantu hna he group hmanthlak. Photo : Fr. Dominic Thang Suan Lang
Myanmar Bishop pawl cu Vatican hmunṭhu zung hmun 4 ah valen in ton biaruahnak an ngei hna. Cu zungpi hna cu Dicastery for Lay, Family and Life (Piazza San Calisto,16), “Caritas Internationalis” “Dicastery for promoting Integral Human Development (Idem), Dicastery for Doctrine of the Faith (Palazzo del Dicastero), Secretary General of Synod (Via della Conciliazione, 34) timi zung hna ah tlangtla rianṭuan tu phu hna he ton biaruahnak an ngei hna.
“Disaster for Lay, Family and Life” Zung chungah Zung rianṭuantu hna le Myanmar Bishop pawl tonnak. Photo: Fr. Dominic Thang Suan Lang
“Dicastery for Lay, Family and Life” (Piazza San Calisto,16) ah 9:30-10:30 am tiang nawl ngeitu hna he ton biaruahnak an ngei hna i, Myanmar ram aiawh in Hakha Diocese Lutlai Bishop Lucius Hre Kung nih biachimnak a ngeih hna. Bishop Lucius nih Myanmar ram thil sining, biaknak lei in zumtu hna sining, chungkhar hna nih ton cuahmah mi thil sining hna le Myanmar ram Catholic bupi nih a ton cuah mah mi sining kong hna kha chim phuannak a ngeih hna. Tonnak a dongh nak ah Bihsop Lucius nih CBCM aiawh in dawtnak laksawng zong mah vuanci zung ahcun a pek hna.
“Dicastery for promoting Integral Human Development (Idem)””Caritas Internationalis” zung chungah zung rianṭuantu hna le Myanmar Bishop pawl tonbiachimnak. Photo: Fr. Dominic Thang Suan Lang
Zung hmunkhat nak i tonnak a dih hna ah Bishop hna cu Vatican um “Caritas Internationalis” “Dicastery for promoting Integral Human Development (Idem)” zungpi ah rian ṭuan tu phu hna he pehzulh in ton biaruahnak an ngeih ṭhan hna. Hi zungpi nih a bik in tlangtlak piak nak a ngeih mi hna cu minung humhimnak le ṭhanchonak lei in a si. Bamaw Diocese Bishop Raymond Sum Lut Gam nih cu tonnak ahcun Myanmar ram nih a ton cuahmah mi thil sining kong he pehtlai in chimpuannak a ngeih hna i Myanmar ram he pehtlai in a chimphuanmi hna chungin biahal-bialehnak tete hna zong an ngei hna.
Cardinal Charles Bo nih Caritas Internationalis Secretary General Alistair Dutton laksawng a pek lio. Photo: Fr. Dominic Thang Suan Lang
Myanmar ram Bishop pawl le Caritas Internationalis rianṭuan tu phu hna tonnak cu Myanmar ram caah ruahchannak tampi a ngeimi tonnak zong a si tiah theih a si. Ton biaruahnak tlamtling in an dih hnu ah hmunṭhu zung rianṭuan tu hna nih chuncaw i hrawm ṭinak zong an ngeih hna tiah theih a si.
Dicastery for promoting Integral Human Development (Idem) rianṭuan tu hna le Myanmar Bishop pawl. Photo: Fr. Dominic Thang Suan Lang
Chun hnu zongah Bupi zumhnak lei kap in tlangtla tu phu hna ṭhutnak zung “Dicastery for Doctrine of the Faith (Palazzo del Dicastero)” ah Bishop pawl nih tlangtla rianṭuan tu hna kha tonnak an ngeih ṭhan hna. Cu tonnak ahcun Taung Kyi Arch- Diocese in Bishop Basilio Athai nih Catholic zumtu hna dirhmun kong he pehtlai in biachimnak a ngeih hna. Myanmar ram Catholic Khrihfa hna kong he pehtlai in biahal nak hna zong a um i Bishop Basilio nih cun lungsau tein le fiang ngai in bialeh nak zong a ngeih hna.
“Dicastery for Doctrine of the Faith (Palazzo del Dicastero)” zung chungah rianṭuan tu hna le Myanmar Bishop pawl group hmanthlak. Photo: Fr. Dominic Thang Suan Lang
“Secretary General of Synod” (Via della Conciliazione, 34) Zung rianṭuan tu hna le Myanmar Bishop pawl phu hmanthlak. Photo: Fr. Dominic Thang Suan Lang
Cu tonnak a dih hnu ah Bishop pawl cu Bupi nih Synod a tuahnak zungpi “Secretary General of Synod” (Via della Conciliazione, 34) ah pehzulh in an kal ṭhan hna i Myanmar ram Bishop hna aiawh in Bishop John Saw Yaw Han nih Myanmar ram lei zong nih Bupi hruainak in tuahmi Synod biachah fialmi hna chungin zeitin dah tuah le zulh a si nak kong hna kha chimphuannak a ngeih ve hna. Cu tonnak ahcun pakhat le pakhat thazang i pek nak le ruahnak cheuhbauhnak hna zong an ngei hna. Bupi i ṭhit hruainak ah hmailei zeitin dah kan kal ṭi hna lai i Bupi nih a tinh mi hna zong zeitin dah kan chuah khawh hna lai timi kong he pehtlai in chimphuannak an ngei hna i pakhat le pakhat thazang i pek nak in “Ad Limina Visit” a nihnih nak cu tlamtling tein an donghter.