Myanmar Bishop pawl “The Dicastery for Clergy” ah chikhat caan an hmang
Myanmar ram in Rome ah Pope he ton dingin a kal mi Bishop pawl cu June 2 ni ah Siangbawi hna caah a bik in tlangtlak piaknak le tawlrelnak a la tu zung “The Discastery for Clergy” timi zungpi ah rainṭuan tu hna he chikhat caan hman nak le tonnak an ngei hna tiah theih a si.
Siangbawi hna he pehtlai in tlangtlak nak zung “The Dicastery for Clergy” timi cu “Roman Curia” timi Bupi i tthit hruainak zung hrampi ah a ummi zung pakhat a si i Khrihfa bu uk-hruainak ah Pope a bawmtu zung pakhat zong a si. Vawlei cung hmunkip um Siangbawi hna, deacon hna nun-tthutdir ning, rianttuannak le fimcawnnak hna pehzulh tein zohkhenh ding rian a ngeibik mi zung pakhat zong a si. Cun Siangbawi cannak sianginn a kai mi seminarin hna ca zongah tawlrelnak a tuah piaktu zung zong a si.
Cardinal Charles Bo le Cardinal Lazzaro You Heung-sik hmaipanh tein laksawng an i pek lio. Photo – Fr. Dominic Thang Suan Lang
Mah zungpi nih a biapi bikmi tawlrelnak a tuah mi hna cu:
• Dirhmun timh piaknak (Formation): Seminarian le rian pekmi riantuantu hna fimcawnnak, thlarau lei fim cawnpiaknak le thlarau lei tthanchonak ding zohkhenhnak.
• Pastoral Riantuannak: Vawleicung pumpi i bishop pawl kha mah le diocese cio chungum Siangbawi hna thlarau lei le biatak lamhruainak peknak ah a bawmh hna.
• Uknak: Dioceses le parishes ta a simi Khrihfabu thilri le phaisa zohkhenhnak tlangtlak piaknak.
• Special nawl peknak(Dispensations): Riantuannak in dinh ding le luatnak nawl a kawlmi Siangbawi hna le deacon hna caah phunglam ningin dinhnak nawl halpiaknak.
Hlan ahcun Siangbawi hna Phu “Congregation for the Clergy” tiah rak theih a si. Sihmanhsehlaw, 2022 kum ah Pope Francis suai mi Praedicate Evangelium timi Lamkaltu hna Phunghram tangah a thar in dirh ṭhan le min thlen ṭhan mi a si.