Ṭhennak a chuahter tu cu pumsa nih a uk mi thlarau ngei lomi an si 

Nihin ni caah Bupi nih thlarau thazang lak ṭi dingin a kan thimpiak mi cathiang hna cu (Jude 1:17, 20-25; Mark 11:27-33) hna hi an si. 

“Cun Jerusalem khua ah khan an ra ṭhan. Jesuh cu Biakinn chung i aa chawh lioah khan tlangbawi upa hna le Phungbia cawnpiaktu saya hna le upa hna nih khan an fuh i, “Aho nawl in dah hi thil hi na tuah hna? Aho nih dah hi thil tuahnak nawl hi an pek?” tiah an hal. Jesuh nih cun an bia cu a leh hna i, “Bia pakhat tein kan hal ve tuah hna lai. Ka let u law, aho nawl in dah hi thil hi ka tuah hna ti kha kan chimh ve hna lai. Johan nih tipil a pek hna kha, Pathian sinin maw nawl kha a hmuh, minung sinin dah?” tiah a ti hna. Anmah le anmah cu an i al i, “Zeitindah kan ti lai? ‘Pathian sinin,’ kan ti ahcun, Zeicahdah Johan cu nan zomh kun lo? a kan ti lai. ‘Minung sinin,’ kan ti ahcun…,” an ti. (Mizapi nih khan Johan cu profet a si ti kha an zumh caah mizapi kha an ṭih fawn ṭung hna.) Cucaah Jesuh cu, “Kan hngal lo,” tiah an leh. Cun Jesuh nih annih cu, “Aho nawl in dah hi thil hi ka tuah hna, ti cu kei zong nih kan chim ve kun hna lai lo,” tiah a ti hna.

Avoi 1 nak cathiang chungah, “Ṭhennak a chuahter tu cu pumsa nih a uk mi thlarau nih ngei lomi a si” a ti. Nihin ni ah ṭhennak le buainak a chuahter tu maw kan si? Remnak, daihnak, dawtnak a sertu maw kan si? Nihin chungkhar hruaitu nu le pa hna, chungkhar buainak a chuahtertu nu le pa kan si maw? Khrihfa bupi hruaitu nu le pa hna, kan Khrihfa bu chungah buainak, ṭhennak, cheunak a chuahter tu nu le pa na si maw?

Ṭhennak a chuahter tu cu pumsa nih a uk mi thlarau ngei lomi an si a ti. 

Mithiang Paul zong nih Rom 16:17-18 chungah “Cheunak a chuahter tu hna le zumhnak a tuaitertu, nannih nih nan hmuh ciami cawnpiaknak a ralchanhmi hna kha i ralring hna u tiah kan forh hna; annih cu hrial ko hna u. Zeicahtiah cu bantuk rian a ṭuanmi cu kan Bawipa Khrih rian an ṭuan kha a si lo i anmah duhnak tu an tuah kha a si deuh. An hmurka ṭha le an mi hloi thiamnak in lungmawng zaran vialte kha an hlen hna” tiah a ti. 

Kan Bawipa Jesuh Khrih hi vawlei cungah a rak um lio ah a rak chim chung cia mi bia cu nihin ah a tling thluahmah cang. Bawipa ram kauhnak caah biatak tein rian a ṭuanmi an tampi ko. An mah paw cawmnak caah rian a ṭuanmi hna zong an tampi ko. Kan rianṭuannak cu kan theitlai in hmuh khawh a si. Kan thei tlai nih a langhter. 

Jn 15:16 ah “Jesuh nih thei tampi va tlai u” tiah a kan fial. Gal 5:22 ah “Thlarau thei tlai; thlarau nih a chuahter mi hna cu dawtnak, lawmhnak, daihnak, lungsaunak, zangfahnak, ṭhatnak, zumhawktlak sinak le toidornak hna hi an si” a ti. Cucu zumtu hna kan theitlai a si. 

Nihin thawngṭhabia chungah kan hmuh mi cu “Pathian sinin a ra mi maw, asiloah minung sinin a ra mi dah?” Pathian sinin a ra mi nih cun remnak, daihnak, lawmhnak, hngangamnak a kan pek. Tanglei in a ra mi, minung sinin a ra mi nih cun ṭhennak, cheunak, buainak, rem lonak a phunphun a chuahter. Zeicah tiah ṭhennak a chuahter tu hna cu pumsa nih a uk mi an si. Thlarau ngei lomi an si. Pumsa cu tang lei in a ra mi a si. Thlarau cu cung lei in a ra mi a si. Cucaah nannih cu nan zumhnak a rawhnak hnga lo a thiang bik mi nan zumhnak ah khan fek chin in um ko u tiah a ti. 

A thimi zumhnak siloin a nung mi zumhnak siseh. Kan zumhnak le kan rianṭuannak cu thei a tlaimi zumhnak rianṭuannak siseh. Nan dihlak cungah Pathian nih thluachuah in pe ko hna seh.