Pathian pekmi rian cio kha dawtnak lungthin he lunglawm tein ṭuan ding a si

May 1, 2026, nihin ni i kan Nu Bupi nih Bible rel ding a kan timhpiak mi Kolose 3:14-15,17,23-24, Salm 39, Mt 13:54-58 tiang hna hi an si. Nihin cu May 1 ni a si i, kan Nu Bupi nih chungkhar hna rethei thaba in a cawmtu Mithiang Joseph i puai ni kha tuah dingin a kan timhpiak. Mt 13:55 ah kan hmuh khawh mi cu ‘Hi pa hi leṭama fapa kha a si lo maw’ tiah an ti. Mithiang Joseph nih leṭama rian in mi vialte a kan khamhtu ding kan Bawipa Jesuh Khrih le hringtu a Nu Mary cu a cawm i a zohkhenhnak kong kha nihin kan relmi thawngṭha ah kan hmuh khawh. Nihin hi Mithiang Joseph puai lawng siloin thazaang rethei ngaiin pawcawmnak rian a ṭuan i chungkhar a cawmtu hna (အလုပ်သမားနေ့) ti kha tuah a si i, kan zapi te i kan puaini a si ti kha kan Nu Bupi nih a kan cawnpiak. 1955, May 1 ah Catholic Khrihfabu nih thazaang rethei in pawcawmnak rian a ṭuantu hna phu cu Italy ram ah a rak dirh. Pope Pius (12) nih a chimmi cu; ‘vawlei cung i thazaang rethei in pawcawmnak rian a ṭuantu hna, hlawhfa hna caah a kan kilvengtu le kan i bochan awk pa kan ngei i amah cu Mithiang Joseph, Nu Mary le Jesuh Khrih a cawmkengtu a si’ tiah thazaang pek in thawngthanhnak a tuah. 

May 1 ni cu Mithiang Joseph nih thazaang rethei in, leṭama rian in kan Bawipa Jesuh Khrih le Nu Mary a cawm, a kilven hna nak kha cherhchan laakin vawlei cung vialte thazaang rethei in pawcawmnak rian a ṭuantu hna, hlawhfa hna tiah 1955, May 1 ah thawngthanhnak a tuah. Pope Leo (13) nih thazaang retheih in pawcawmnak rian a ṭuantu hna, hlawhfa hna nih an nuhrin covo le an ṭuanman tinvo siseh, mirum le rian ngeitu hna nih an ṭuanvo tiah ‘Rerum novarum’ tiah 1891, May thla ah vawlei cungpi cathanh a chuah. Cu chung i a ummi tampi lakah pakhatnak ah ‘hlawhfa le sifak hna nih nan bawi te thil kha hrawk loin felfai te le ṭha tein an rian nan ṭuanpiak hna lai. Na caah hlawknak lawng ruat in rian ngeitu a simi na bawi rian kha na hrawk lai lo’ tiah rerum ‘Novarum – No.30’ ah a kan cawnpiak. Kolose 3:22 ah ‘Sal le hna, nan bawi le kha zeizong ah an nawl ngai hna u, an mithmuh lawngah an lungton i zuam loin, Bawipa nan hmaizah caah lungthin tak tein an nawl ngai hna u’ tiah a kan ti. 

Kolose 3:23-24 ah kan hmuh khawh mi cu ‘zei thil nan tuah poah ah minung caah siloin Bawipa caah kan ṭuan ti lungput ngei in nan lungthin dihlak in ṭuah u, Bawipa nih nan ṭuanman an pek hna lai kha philh hlah u’ tiah a kan ti. Hihi thazaang rethei in rian a ṭuantu hna, hlawhfa hna i kan ṭuanvo le kan lungput a si awk a si. 

A pahnihnak ah rianngeitu le mirum hna i an ṭuanvo; ‘Na hlawhfa hna cu sal bantukin na zoh hna lai lo, an nuhrin covo kha na upat hna lai, an biaknak, an phunglam kha zalong tein tuahnak caan, biaknak caan kha na pek hna lai. Hlawhfa hna i an i tlak ning tein, an ṭuan khawh tawk cioin rian na pek hna lai. Na hlawhfa hna nih na rianṭuan ding tlam a tlinh a dih ahcun an covo thlahlawh kha tlamtling tein na pek hna lai. Cun, mi harsa misifak hna zong na bawmh hna lai’ tiah Rerum Novarum No. 31-32 ah Khrihfa Bupi nih a kan cawnpiak.

Kolose 4:1 ah; ‘bawi le hna nan sal le cungah ding te le dawh tein khuasa u, vancung ah nanih zong Bawi nan ngeih ve kha philh hlah u’ tiah a kan ti. Duhdawt mi u le nau nu le pa hna, Salm 90:12 chungah ‘kan nunnak hi zeitlukindah a tawi ti kha kan hngalhter law kan fim deuh lai’ tiah a ti. Khamhtu pa Jesuh Khrih zohkhenh in a cawmkengtu Mithiang Joseph i a nunnak hi a tawi ngaite a si. Sihmanhsehlaw a nunchung caan tawite ah thinlung thiangte le lungnem tein Pa Pathian nih pekmi rian tiah a cohlan i Fapa Jesuh Khrih le hringtu a Nu Mary cu a rak cawm hna. 

Duhdawt mi u le nau, nu le pa hna, zei dirhmun in dah kan dir, nu le pa dirhmun in kan dir maw, fanu fapa zohkhenh cawmken ding kha Jesuh nih a kan timhpiak mi a si bantukin hlawhfa tah kan si maw, kan bawi hna i rian kha kan ṭuan tikah Pathian rian kan ṭuan tiah i hmuh in, lungsi diriam tein Bawipa pekmi rian a si tiah thinlung thiang te le lungput ṭha tein Mithiang Joseph bangin Bawipa pekmi rian a si tiah felfai tein ṭuan khawh i zuam hna usih. Kan Biak kan Pathian nih thluachuah in pe ko hna seh.