St. Catherine of Siena, Virgin & Doctor, 1347-1380
Audio (aw) zongin ngai khawh a si. 👇👇
Mithiang nu tlawmte hna chungin Bupi nih Bible thiamsang pakhat tiin a fehter mi St. Catherine cu 1347 kum, Italy ram, Siena khua i mirum chungkhar in a chuakmi a si. Kum (6) a si ah Bawipa Jesuh kha langhnak in a rak hmuh i a nunnak kha Pathian sinah a pekchanh. Kum (12) a tlin tikah zeitik hmanh ah va ka ngei lai lo tiah a nu le a pa lung fiannak caah aa dawh ngaimi a sam kha a rak tan dih. 1365 kum ah St. Dominic i dotthumnak Sister bu ah a rak lut i a inn ah rawl ulhnak le thlacamnak lawngin a rak um. Amah cu atu le atu in khuachia tukforhnak le lungrawknak a rak tong. Nikhat cu, “Maw Bawipa Pathian, ka thinlung thlarau nih tukforhnak a ton caan le sifah ka in caan ah khoika hen na um Bawipa” tiah a au i a hram. Bawipa nih, “Ka fanu, keimah cu na thinlung chungah kaa thup i ka vel in thazaang kan pek ko” tiah a rak leh.
1366 kum ah Siena khua ah nuamhnak puai an tuah lio; amah cu a khaan chungah thla a cam lioah Jesuh Khrih cu a Nu Mary he Vanmi hna kulh in a sinah a rak lang. Nu Mary nih Catherine kut kha a laak i Jesuh sinah a pek. Jesuh nih kutdonghrolh a hrukpiak i a pom hnu ah a thawhter. Hi thlarau lehthah puai cu Catherine i mi theih Pathian rianṭuannak caah a donghnak hmelchunhnak a si.
Catherine cu mizaw hna le thongtla mi hna kha a rak zohkhenh hna. Asinain aa zumh sualmi, aa hruhchih mi, miṭha bantukin aa umter mi a si tiah sual an puh. 1375 kum, Visa khua St. Christina Biakinn chungah thla a cam lioah Jesuh Khrih sinin hma hna kha a rak ngei ve. A thianhlimnak thawngin amah a rak ralmi hna le a rak theithiam lomi hna caah biachah piak dingin an rak auh tawn.
1376 kum ah Rome khuapi kha kum (74) tiang a rak chuahtak cangmi Pope Gregory (11) kha Rome khua lei kirṭhan dingah forhfial dingin France ram Avisden khua leiah a rak kal. A tangmi a nunnak kha Dialogue timi cauk ṭialnak in caan a hman. Cu cauk cu Thiangthlarau nih fimnak peknak tangah a rak ṭial. Cun rel awk a ṭha ngaimi cazual (400) tluk zong a rak ṭial rih.
Cu ca hna cu muidawhnak le thlarau lei caah a hleikhun in a ṭhami cauk an si. Catherine cu upat hmaizahnak, langhngannak le mi komh thiamnak hna in a hleikhun mi nunzia kha a rak langhter. Pope nih vawlei pumpi he pehtlaiin Bupi hruaitu sinak in a rianṭuannak cungah ralrinnak a rak ton caan ah Catherine nih Pope kha ‘Ka dawt ka Pa’ tiah a rak ti. A pum kha Bupi caah thawinak sa ah a rak chanh hnu ah kum (33) a tlin ah Bawipa Jesuh sinah lung dai tein a rak i din.