Sifak har tongmi hna caah Bupi innka kha on piak zungzal awk ah siangbawi hna cu kawh kan si

Harnak le sifahnak a tuarmi hna dornak caah Bupi innka cu on cia in chiah awk ah tlangbawi (siangbawi) hna cu nifatin kawh kan si tiah Pope nih deacon pahra hna kha siangbawi ordination a pek hlandeuh te ah bia a cah hna. Tlangbawi (siangbawi) rian cu Khrih a nunnemnak le a lungsaunak kha langhter awk ah kawh kan si i, bia le holh tampi chim loin mi harsa hna caah innka on piak zungzal ding le cuka lei ah hruai awk le lam hmuhsak dingah kawh le auh kan si tiah 26 April ah, Vatican i Mithiang Peter Biakinnpi ah tuahmi deacon pahra ordination Missa raithawinak i phungchimnak ah bia a cah hna. Tulio kan chan ahhin, a tlawm a tam ti tuaknak le Bupi karlak ah ṭhencheunak a um tawn. Bupi innka kha ong zungzal ko u. Nannih cu tiluannak lam (channel) nan si i tizetnak (filter) nan si lo. Pope nih ordination a pekmi hna siangbawi pahra hna chungin pariat hna cu Rome Diocese ah rianṭuan ding in ṭuanvo a pek hna. Cu pariat chung in paruk cu Italy miphun an si i, Cameroon in pakhat le Columbia in pakhat an si. “Tu Zarhpini cu nunnak in a khat, zeicah tiah thihnak nih a kan kulh ko nain, Thawngṭha kan relmi chungah, ‘nunnak an ngeih i duhdim tein an nun khawhnak hnga a ra timi a tling,’ tiah Pope nih a ti.

Bupi nih tlangbawi cannak pek awk ah a kawh hna i hi ka hmun ah a ra phanmi hi mino hna nih  an nun siannak le an lungthawh thanuamnak kan hmuh khawh. Nihin ah a rak i pummi kannih vialte cu miphun dangdang kan si ko hna nain Khrih nih a kan umpi i pumkhat ah kan i komh. Thiang thlarau nih a kan tharchuah i a hohmanh kan mah ca lawng ah kan nung lo. Tlangbawi hna nih Khrih he an i komhnak a thuk deuhdeuh tik ah, mi vialte he an i pehtlai i a rawk kholo mi dawtnak nih a ṭem hna tiah a chim chap. Pathian Pennak caah nupi le pasal ngei lo in pumpek nun asi mi tlangbawi hna nunnak zong kilven le tharchuah a hau. Zeicah tiah dawtnak cu caan a hun rauh deuhdeuh tik ah a puitling i theipar tampi a tlai.