Pa khat Le Pa khat nan thilrit i chawng uh

Chungkhar kong lamthluan ah zeizongte hi a thlamtling dih lai, tiah ruat ding asi lo. Kannupi/vapa hi sualnak in athiang mi asi lai ti zong ruahchanh awk attha lo. Chungkhar ngei nu le va pahnih te in tthawndeuhnak le thazaangder deuhnak pumpak cio aum phung asi. Pakhat der deuhnak kha pakhat nih intuar ngaihthiam piak nak in chungkhar kongah lunglawmh nak kha pahnih tein cohlan khawh asi. Chungkhar ngei hna nih a nuam i a dawtmi nun ning kha thlaihchan le manngeihter ah cun lung diran in anuam kho.

       Nikhat cu aa tthi-um ka mi mipa pakhat nih ahawi lengttul pakhat kha a nupi kong he pehtlaih in ahmuh tonmi harnak kha hibangin achimh.

       “Ka hawi pa, Ka nupi cu aa dawhtuk, duhtlaih ngai asi; Asinain amah nih a phunphun harnak a ka pek. Keimah caah cun abiapi mi vailam pakhat asiko,” tiah ati tikah phawipa nih,

         “Na ka chimh cangka nan zawnruah ngai, Cucaah na hawikom ttha pakhat sinak in na Vailamtung put kan bawmh lai,” tiah arak ti.

Cutikah Chungkhar ngei mipa nih,

         “Cucu kan onh kho bak lailo,” Hi vailam cu rit ko hmanhsehlaw ka tlaihchanh ko. Keimah nih ka put ko lai, zawn na ka ruahnak cung ah kaa lawm… Ka inn ah rat ra ti hlah” tiah a leh ko ai.

          Chungkhar kong vailamtung cu a rit ngai ko. Put (phorh) ahar tawm ko. Sihmanhsehlaw a dawh i duh nung asi ti zong philh awk asi lo. Pakhat le pakhat i duh cang hnu ahcun dawtmi caah harnak tampi in ahau. Pumpeknak, pekchanhnak, dawtnak nih afialmi harnak lamkha sifah temnak vailam put in kaarhlan awk asi.

            Pumpeknak cu duhdawt ruangah asi,

            Pekchanhnak cu duhdawt ruangah asi,

            Pumpeknak cu thinlungah thlithup in a ummi dawtnak kha hmuh khawh dingah faingfai te in hmuhsaknak bantuk asi.