St. Peter Chanel, Priest & Martyr, 1803-1841

Audio (aw) zongin ngai khawh a si.👇👇

Oceania tikulh bu in pakhatnak Martyr a simi St. Peter Chanel cu 1083 kum, France ram, Kuze khua ah a chuak. Amah kha Siangbawi cannak Sianginn ah a rak thlah mi khuahlum Siangbawi Appa Trumpia nih a fimthiamnak le Pathian le a zumhnak kha a rak hngalh. Amah cu Bishop pa i upat peknak kha a rak hmu i Bishop nihcun; ‘Peter Chanel cu ngakchia bantukin zumhnak a ngei i Vanmi pakhat bantukin a nung i a ummi a si’ tiah a rak ti. Siangbawi cannak a hmuh hnu ah leithuang hna hmum a simi Crozet Diocese ah kumthum chung Pathian rianṭuan dingin rian an rak khinh. Cu Diocese chung ahcun Biaknak rian ah lungtho tein a rak ṭuan i 1831 kum ah ramdang lei mission a ṭuanmi Maris phu ah a rak lut. 1836 kum ah Jesuh Khrih kong kha voikhatte hmanh a thei bal rih lomi Pacific rili chung i Muthuna tikulh ah umhmun a khuar i mission rian a rak ṭuan.

Cu tikulh i khua a sami hna holh kha a cawn i mizaw hna thlopbulnak in cu rammi hna zumhna kha a rak laak hnu ah mitampi kha Bupi chungah a rak luhter hna. Phungchimnak in Muthuna tikulh i hruaitu hna nih an rak ṭihzah i tha an pekmi khuachia biaknak kha a rak hrawh. Tikulh i hruaitu hna nih an miphun hna cu anmah uknak upadi tang lawngah chiah dingin khuahrum niaknak kha tha an rak pek. 1841 kum ah cu tikulh i hruaitu hna nih an ralkap kha an rak thlah i cu ralkap hna nihcun Peter Chanel cu hreitlung in an rak thah. Biatak caah thahnak a rak in hlan a hmai nikhat ah St. Peter Chanel nihcun ‘Ka thih zongah ka zei poi lo. Hi tikulh ah thukpi in hram a bunh cangmi Khrih zumhnak thawngṭha cu ka thih ruangah a rawk lai lo’ tiah a rak chim. St. Peter Chanel a thih hnu kum tlawmpal a rauh ah tikulh um dihlak cu Jesuh a zumtu Khrihfa ah an rak cang dih.