Pope Francis a thih kumkhat tlin Missa thlacam pumhnak

Hakha Diocese hruaitu Bishop Lucius Hre Kung cu a peng chung tuukhal khualtlannak a tuah lio April 21 ni ah, St. Joseph Parish Rezua Khrihfa hna he Pope Francis a thih kum 1 tlinnak Missa raithawinak a tuah tiah theih a si. 

Hi khual tlawnnak chungah peng chungum catholic zumtu hna he ton in Pathian biathiang in thazang peknak, Khrihfa hna he ton biaruah ṭinak le diocese chungin entrance exam a aungmi seminarian hna angki rang fual (cassock) peknak zong a ngeih hna.

Siangbawi hna hruk mi angki rang fual a hmu thar mi hna.

Pope Francis caah tuahmi Missa thawinak phungchimnak ah: “Pope Francis cu chanthar catholic zumh ning a kalpi ning ah khuaruahhar in thil tuahnak le zawnruah thiam piaknak a ngei mi a si. A nun chungah bupi caah thil tampi a tuah tak ko nain a bik in mithiang Francis bangin Pathian sermi kan Vawlei pi cungah upatnak le dawtnak ngeih thiam dingin cawnpiaktu pakhat zong a si. Cun amah nih ‘Laudato Si’ timi cauk zong in vawlei cung khuazakip ah Pathian sermi thil nung hna zohkhenh thiam ding, upat thiam ding le dawt ding tiin fakpi a rak cawnpiaktu zong a si” tiah a ti.

Pope Francis a thih kumkhat tlin Missa ah timhtuah mi

Cun Pope Francis a nunzia le Pathian dawtnak a theih ning kong he pehtlai in a chim rih mi cu, Pope nih “Pathian cu kan mah hna kan sualnak ngaihthiam dingah hin zeitik hmanh ah a tha a ba bal lo; kanmah minung hna tu hi Pathian sin kal in sual ngaihthiam hal ding tu ah kan tha a ba tawn” tiah a ti.