St. Anslem of Canterbury, Bishop & Doctor

1033-1109

Audio (aw) zongin ngai khawh a si. 👇👇

Canterbury khua Bishop a simi Mithiang Anslem cu 1033 kum, Italy ram, Aosta khua i phunsang chungkhar in a chuak. Kum 27 a si tikah Normandy khua, Bec ah a ummi St. Benedict Zateikbu ah a rak lut. Cu Sianginn ah kumthum khengte thlacamnak in thazaang a laak hnu ah Caen khua Zateik Sianguk ah rak thim. Zateik dang hna nih amah cu Sianguk si dingah a kum a no tuk rih tiin an lung a rak si lo nain Anslem nih a lungsaunak le a zaangfah thiamnak in a rak uk khawh hna. Amah cu ngakchia cawnpiaknak ah a thluak a ṭha ngai.

Ca cawnpiaknak ah teinak hmuh lo ruangah a lung aa nuam lo ngaimi a innpa Sianguk pakhat kha, ‘Na dum chung ahhin thingkung pakhat cing law a pawngkam in na tlaihkhih dih ahcun zeitindah a nge an chuak lai; zeibantuk kung ahdah aa chuah lai; Nangmah zong cu bantuk cun na si, cuticun na Siangngakchia kha na uk hna, luatnak le lawmhnak na tuahpiak hna lo; na ṭhihphaih lengmang hna cuta’ tiah a ti. Khuaruat thiamnak le hmasabik a simi Anslem cu an chan lioah minthang bik Bible thiamsang a rak si. Ca lei zongah Pa a rak si.

Mah lawngin bia chimnak (Monologue) timi cauk ah Pathian cu a sangbik le cungnungbik a si caah Pathian sining kha a rak cekhlat i, ‘Biahmaiṭhi-Prologue’ timi cauk tu ahcun Pathian a umnak kong kha a min a thangmi dirkamhnak in a rak langhter. 1093 kum ah Canterbury khua Bishop a simi Bishop Lanfranc hmunhma ah ṭuan dingin an rak auh. Culio caan cu Bupi zalonnak caah Siangpahrang he fakpi in an i doh lio caan a si caah Anslem cu atu le atu ram chungin ṭhawlnak a rak ing. Mipi an i lawmh lio caan 1109 kum ah Canterbury khua ah a rak kir hnu kumthum a rauh ah a rak thi.