Pathian biatak in a dawmi hna cu Teitu an si

Nihin kan relmi Lamkaltu 7:51-8,1 chung “mithiang Stephen” kong he pehtlai in thlarau thazang pek kan duh hna. Mithiang Stephen cu deacon pakhat a si i lamkaltu hna a bawmtu a si. Deacon hna an rian cu ‘Bupi chawva pawl a zohkhenh a kengtu an si.’ Cun bawmhnak le thil cheuhbauhnak lei ah lai reltu zong an si. Mithiang Stephen cu dawtnak rian lawng siloin Jesuh Khrih thawngṭhabia le Jesuh Khrih kong hi biatak tein aa tlaih i a ṭanh, a chimtu a si ti zong kha kan hmuh. 

Thiang Thlarau he a khat mi Stephen cu Judah upa pawl he bia an i el tikah ṭihnak timi kha ngei loin Jesuh kong ngamh sang ngai in a dirkamhtu a si. Jesuh Khrih dawtnak kha a theih caah a hawi miphun hna zong nih Jesuh dawtnak thei ve hna seh tiin Jesuh nunning, a ṭhatnak, a dawtnak kong hna kha heh tiah a chimh hna i a ṭanh tu a si. Stephen a thih lai te ah vancung in khuaruahhar thil a hmuh bantukin a dang lamkaltu hna nih an hmuh ve timi hi kan Bible cathiang chung hmun dang ah kan hmu kho lo. Cucu Stephen chimmi bia hna le thawngṭhabia hna hi ‘a dik, a hmaan mi an si’ tiah Jesuh nih van in tehte a khaan piak mi zong a si. Cutin Stephen nih khuaruahhar thil a hmuh mi a chim tikah Judah upa pawl nih cun theih an duh lo caah an hna an i phih kanh ee ti a si. Cupin ah sual an puh rih mi cu “kan Pathian a soi, a kal tak, thitsaphoh a si” tiin Stephen cu lungin thi lak in an cheh. Sihmahsehlaw, a thih dengmang ah khan a thaṭu hna ca tu ah khan thla a cam piak hna: “Maw Bawipa, an tuah mi hi zei kan tuah ti an hngal lo. Rak ngaithiam ko hna” tiin thla a campiak hna. Kan Bawipa Jesuh Khrih nih “nan ral hna caah thlacam piak hna u” tiah a ti bang khan Stephen zong nih a ral hna caah thla a campiak ve hna. 

Stephen cu a dawt mi a Bawipa caah ngamh sang ngai in a nung mi a si. Pathian dawtnak le khamhnak kong kha chim phuan dingah ready in a um mi a si. Cun ṭihnak ngei loin uk tu le hruaitu a simi Judah upa hna zong kha Pathian ṭhatnak le dawtnak, Pathian zangfah dawtnak kong kha a chimphuang ngamtu a si. A dawtmi a Pathian, a Bawipa Jesuh caah a nun pek sian tiangin a um mi a si. 

Nihin ni zongah Bupi nih mithiang Anslem puai a kan tuah piak ve. Mithiang Anselm zong a zumhnak le Bupi a dawtnak ruangah fahnak le ningzahnak tampi a ingtuar tu a rak si ve. Cantebury ah Bishop a hung si tikah Enlang ram uktu hna nih catholic Bupi kha an kut tangah chiah dingin an zuam lio ah Bupi a rak dirkamh tu zong a si. Bupi cawnpiak ningin a nung mi le a chimphuanmi, tehte a khang mi a si bantukin amah zong a umnak hmun in voi 3 tiang ṭhawl a rak si. A donghnak ah ram leng ṭhawl a si nak hmun ah a nunnak zong a liam. 

Mithiang Stephen siseh, mithiang Anselm siseh, Jesuh Khrih le a Bupi caah ngamh sang ngai in an nunnak a pe siangmi mithiang hna an si kha kan hmuh khawh. Pathian an dawtnak le an ṭihzahnak kha ram uktu hna hmanh nih an kham kho hna lo. Pathian pakhat lawnglawng a nawl kan ngai ko lai tiah an lung aa khiakmi an si.