Jesuh Khrih thawhṭhannak thawngin Nun thlennak kan ngeih a herh

Nihin thawhṭhan zarh(3)nak kan relmi cathiang hna cu (Lamkaltu 2:14,22-33; Psalm 15(16):1-2,5,7-11; 1Peter 1:17-21; Lk 24:13-35) hna hi an si. 

“Pathian sin i thla nan cam tikah; amah cu kan Pa tiah nan kawh; amah nih cun mi vialte kha an tuahning cio ah duhdanh zeihmanh um loin bia a ceih hna. Cu Pathian cu a sin i thla nan cam tikah, kan Pa, tiin nan kawh ṭung ahcun, hi vawleicung nan nun lioah hin amah upat bu tein na um awk a si. Nan pupa nih an in rohmi hna santlailo phunglam hna chungin an luaṭertu hna cu zeidah a si kha nan hngalh, a rawk khomi thil sui le ngun bantuk si loin nanmah luatnak man cu a sungmi thi, dotlak lonak zeihmah a ngi lomi tuufa thi bantuk, Khrih thi kha a si. Amah cu Pathian nih vawlei a ser hlan khan a thim cang i nanmah caah hi ni hmanung bik hna caan ah hin a hun langhter. Amah thawngin Pathian cu nan zumh i Pathian nih cun thihnak in a thawhter i sunpernak a pek; cucaah nan zumhnak le ruahchannak cu Pathian cungah aa bunhmi an si.”

A tu hi thawhṭhan zarh(3)nak kan phan ṭhan cang hna. Khrihfa a simi kan nih vialte cu mi vanṭhan kan si. Zeicah tiah cun “Khrih cu thihnak a teitu” a si caah a si. Cucaah Peter nih Jesuh cu Messiah, Khamhtu a si tiah a ti. Cun Khrih nih a thisen in a kan tlanh cang tiah kan hmuh fawn. Thawngṭhabia chung zong ah Emmaus khua lei a kal mi zultu pahnih hna zong Jesuh Khrih he bia an i ruah hnu ah lungthlennak an ngei timi kha kan hmuh ṭhan. A thoṭhan mi Jesuh nih zultu hna kha biafiang a chimh hna tikah zultu hna zong nih “kan Bawipa a si” timi kha an hung i fiang. Kannih hna zong Jesuh thawhṭhan nak thawngin kan nunnak aa thlen ve hi a herh mi a si. Zultu hna bantukin kannih hna zong Jesuh thawhṭhan caan chungah hin nun thlennak ngei cio hna u sih. Samaritan mi nu te zong Jesuh Khrih he bia an i ruah hnu ah khua chungah a va kal i mipi sinah Messiah Jesuh kong kha a va chimh dih hna. 

Peter cu a nunnak aa thlen hnu ah a nun ṭhing ‘ralchiatnak in ralṭhatnak’ dirhmun ah a nunnak kha aa thleng. Cun ṭhawnnak zong a ngei. A dang zultu vialte hna zong Jesuh Khrih thawhṭhan hnu cun nun thlennak a hmu mi lawng te an hung si hna. Thawhṭhan a si hnu ah muihnak chung an rak nunnak in khan ceunak chungah an hung um kho hna i nun thlennak a hung ngei mi an hung si hna.

Khrih he kan i ton a si ah cun a thoṭhan mi Jesuh Khrih nih nun thlennak a kan pek ve. Cuasicaah pumpak cio in kan nunnak ah nun thlennak ngei cio hna u sih. Thawhṭhan puai ah aa lawm sawhsawh mi dirhmun lawng in si loin nunzia thar, nun thlennak ngei cio hna u sih. Cucu Pathian nih vel a kan ngeihmi a si. 

Cuasicaah, dawtmi u le nau hna Jesuh Khrih a thawhṭhannak thawngin hmailei kan nunnak hna zongah a thar a simi nunzia, nun thlennak taktak ngieh in Pathian hnu zultu ṭha si khawh i zuam zungzal hna u sih.