Harnak chungin a kan chuah tu cu Jesuh a si
RVA Hakha service in Pathian bia in thazang a la tu nan dih lak cungah Pathian nih thluachuah in pe ko hna seh. Nihin voikhatnak kan relmi cathiang (Acts 6:1-7; Jn 6:16-21) hna chungin thazang i lak ṭi hna u sih.
Thinphannak hna le lungretheih nak hna cu Jesuh cungah bochannak kan ngeih lo ruangah a si. Kum khat ah ni 365 a um bantukin ṭih hlah timi hi cathiang chungah voi 365 a um ve. Pathian nih nifatin a kan umpi zungzal ko timi hi kan hmuh. Nifa tein ‘ka fa, ṭih hlah, phang hlah’ tiah a kan ti lengmang ko. Nihin thawngṭhabia chung zongah ‘na thin phang hlah u, keimah ka si’ tiah a ti hna i an i tinhnak hmun cu lunglawm tein an phan kho timi kha kan hmuh. Psalm 107:28-31 “An harnak chungin Bawipa nih a khamh hna. Thlichia tilet a daihter, harnak chungin a kan chuah tu Bawipa a si” a ti.
St. John the Cross nih hitin thla a cam: “Lung retheihnak, thin phannak tong loin ka nunnak hi ka la rih hlah” tiah a ti. “Lung retheihnak na ton lo ah cun Pathian a ṭhatnak hi na thei kho lai lo” a ti.
Nihin kan Bawipa Jesuh nih zumhnak ah level kai ter a kan duh timi hi thawngṭhabia chungah kan hmuh. Mithiang hna nih lungretheihnak, ngaihchiatnak, soiselnak, thin phannak hna hi zumtu hna kan thazang le ka rawl a si an ti. Lamkaltu 16:16-30 chungah Paul le Silas cu Jesuh ruangah harnak nganpi chungah an um ko. Sihmahsehlaw annih cu Bawipa sinah thla an cam i Bawipa thangṭhatnak hla an sa. Thongtla vialte nih an halsak mi cu an ngaih hna. Chikhat te ah thong inn ka vialte aa hung dih i thongtla pawl thir cikcin vialte aa phoih dih. Bawipa cu harnak chungin a kan chuah tu a si. Thir cikcin nih a tlaih khawh lomi cu thlacamnak a si. Kan zumnak level hi ṭhinh ter lo a kan duh.
Nihin thawngṭhabia kan relmi ah “Jesuh cu zultu ti cungah a ke in a kal an hmuh tikah an thin a phang ngaingai i mithla a si an ti. Bawipa Jesuh nih nan thin phang hlah u. Keimah pei ka si ko cu a ti hna. Peter nih Bawipa na si taktak ah cun na sin ah ka ke in ka rat ter a ti. Jesuh nih ra a ti. Peter cu Bawipa sin ah a kal. Thlichia, ti let a hmuh tikah a thin a phang i ti chungah a tla. Peter nih Bawipa ka khamh ko tiah a ti. Jesuh nih a khamh. Thlichia, tilet kha zoh hlah, cu hna a daihter tu Jesuh kha zoh law na dam ko lai.”
Ṭihnak, thinphannak nih a teimi zumtu kan si lo. Ṭihnak, thinphannak le soiselnak a teitu zumtu kan si. Jesuh nih kan zumhnak kha ṭhumh ter lo a kan Duh. Harnak chungin a kan chuahter tu Jesuh a si.