Africa ram tlawnnak Ni Nganak: Pope nih ‘kan dihlak in’ vawleicung rawlṭamnak tawlrelnak ah i bawh a herh tiah a ti

Africa ram chung a lamkaltu khualtlawnnak a ni nga nak ni ah, Pope Leo nih Douala khua ah minung 120,000 i tel khawhnak ah Missa a tuah. Cun Yaoundé khua i university siangngakchia hna kha “a thianghlimmi duhfahnak” ngeih dingin a thazang a pek hna.

Cacawn ninga ni ah, Cameroon ram nitlak thlang lei khuapi a si mi Bamenda ah ziknawh eihmuarnak mawhchiat nak le daihnak biaforhnak a chim hnu ah, Pope Leo nih Cameroon ram nih a ton cuahmah mi harsat rawltam nak kong he pehtlai in a chim ṭhan.

Cameroon ram sipuazi hmunpi a simi Douala khua i Missa pumhnak phungchimnak ah, Pope nih “hi rawl a ṭammi hna le, thazaang dernak nih a neh mi hna kha zoh hna u” tiah a kan forh i biahalnak a kan tuah mi cu: “Zeidah nan tuah lai?” tiah Jesuh nih a ti tiah a ti

‘Mi vialte caah rawl a um’

Cameroon milu zatuak 40 hrawng cu sifak rawl ṭam in an nung, i February thla ah khan 3.3 million cu rawltam in an tuar tiah Red Cross zong nih a ti.

Phungchimnak ah, Pope nih thawngṭhabia chung relmi: Jesuh nih mi 5000 rawl a danh hna nak kong kha a chim. 

A rawl a ṭam mi hna caah Jesuh nih zultu hna kha ‘zeitin dah nan tawlrel lai’ tiah a hal hna. Cu bia cu kanmah pakhat cio nihin ni ah Jesuh nih a kal hal ve mi a si. Jesuh nih a rawlṭam lio mi mibu pi kha rawl a pek hna i cucu ‘rawl i hrawm tiinak in an rawlṭamnak in a luaṭer hna.’ Hi nih a kan theihter mi cu pakhat le pakhat kan i bawmh, kan i chanh a si ah cun mi vialte caah rawl cu aa za in a um ko tiah Pope nih a ti. 

Aa pummmi minung 120,000 hrawng hna sinah rawl cu “mah caah lak a hmangmi kut siloin a pe tu kut a si ahcun” ahohmanh rawl a ṭam mi kan um lai lo tiah Pope nih a chim.