Bawipa tlangah cun Bawipa nih khua a kan khan piak ko

Nihin kan relmi cathiang hna cu (Acts 5:34-42; Jn 6:1-15) an si. Thawngṭha bia chungah kan hmuh khawh mi cu Jesuh Khrih nih mizaw pawl a damter hna i khuaruahhar thil tampi kha a tuah tikah Jesuh Khrih cu hmunking ah a kal i, sihmahsehlaw, Jesuh Khrih cu mi tampi nih an zumh, an bochan tikah Jesuh sinah an fuh, an panh i Jesuh bochan in a ra mi hna kha a hmuh hna tikah Filip kha a thawh i hi mi vialte pek awkah rawl hi khuazei ah dah kan cawk lai tiah a hal.  

Nihin kan relmi Psalm hla 27:4 ah “Bawipa cu thil pakhat ka hal. Ka duhmi thil cu pakhat lawnglawng a si ko. Cucu ka nun chung vialte Bawipa innchung i um le a ṭhatnak kha khuaruahhar in zoh le amah kha lam ka hruai tuah tiin hal hi a si” tiah kan hmuh khawh. Jesuh Khrih bochan in amah sinah a fuhpanh tu cu Bawipa nih zeidah an herh ti kha a hngalh i Bawipa nih zeidah ka tuahpiak hna lai timi kha ai tim peng ko. Amah ṭuanvo ah ai chiah. 

Jesuh Khrih bochan in kan fuh kan panh tikah kan herhmi kha a hngalh i zawnruahnak, dawtnak thinlung he thil ṭha kha a kan petu Bawi a si kha hi cathiang nih a langhter. Filip kha hi mi vialte hna pek awkah rawl khawzei ah dah na cawk lai tiah a hal. Filip kha hneksak a si. Peter le Andrew zong nih hi vialte an ei hnga dingmi rawl ahcun Barli hlumnga le nga pahnih lawng a um. Hi mi vialte an ei hnga ding mi caah cun zei ti hmanh in a si kho lai lo an ti. Filip zong nih hi mi vialte an ei hnga dingmi rawl kan cawk a si ahcun tangka 200 leng a hau lai tiah Jesuh Khrih kha a leh. Jesuh Khrih nih ‘a ka zultu hna nih zeibantuk bia dah an ka leh lai’ timi kha a theih duh mi a si. An zumhnak kha a hneksak hna. 

Kan Bawipa Jesuh nih a dawtmi a fa le caah zeidah ka tuah lai ti kha a hngalh ko i, thil ṭha tuahpiak ding kha amah ṭuanvo ah aa lak i; sihmahsehlaw a mah a zumtu a mi a fa hna nih a rian kan ṭuan tikah a muihmai fiang chin in kan hmuh khawh nak hnga caah a kan hneksak tawn. Phungthlukbia 3:5 “Bawipa kha na lungchung dihlak in i bochan law nangmah fimnak kha i rinh hlah” tiah phungthlukbia nih a kan cawnpiak. 

Dawtmi u le nau hna lamkaltu hna hmai ah Jesuh Khrih nih thil lianngan khuaruahhar tampi a tauh i nihin ah Filip le Andrew le Peter nih an leh hnga dingmi bia cu, “Bawipa, thil khuaruahhar tampi a tuah kho mi pei na si cu. Pathian Fapa pei na si cu. Na ca ah hin zeihmah thil har mi an um lo. Nangmah bia kaa khat lawng in a za ko. An ei hnga dingmi rawl zong a tlamtling ko lai” tiin Jesuh Khrih kha zoh in, bochan in bawmhhal kha Jesuh nih a theih duhmi cu a si. 

A thiang nili zaan ah kan Bawipa Jesuh Khrih cu zaanriah an ei i lanhtak puai an hmannak ah changreu le mitsur hang kha a lak i “ka thi le ka sa a si. I lak u law ei u” tiah a ti i changreu kha a cheu. Cu changreu a cheu mi cu a pum a cheu a si i vailam tah i thihnak a in nak ah a tlinter. 

Nihin kan relmi Thawngṭhabia chungah ngakchia pa te nih amah caah ai ngeih ko mi barli changreu 5 le nga 2 te cu amah ca lawngah chia loin mi vialte an khim nak hnga ding caah siang tein a pek. A nun a cheuh hna tiah kan ti khawh. 

Dawtmi u le nau hna Jesuh zumtu kan sinak ah nihin i kan relmi Lamkaltu chungah ‘lamkaltu hna an tlaih hna i council ah an chuahpi hna i bia an ceih hna i thah dingin bia an khiah hna.’ Sihmahsehlaw, Gamiliel nih ‘hi mi hna hi chuahpi hna u. Pathian sin in a ra mi an si a si ahcun nan tei kho hlei hna lai lo. Pathian do tu leh lam nan si’ tiah a ti. Lamkaltu hna nih an nunnak thap in Jesuh Khrih rian an ṭuan bantukin; Psalm 27:14 “Bawipa cu i bochan u, zumhnak ngei u. Nan lung dong hlah u, Bawipa cu i bochan ko u” tiah a kan ti bantukin Bawipa cu i bochan u sihlaw Amah cu zum in a rian thiang cu ṭuan ko hna u sih. Bawipa bochan in a fuhpanh mi hna caah cun Bawipa nih kan caah a herh mi, taksa caah a herhmi ti le rawl vialte caah siseh, kan thlarau caah a herh mi vialte amah nih a kan khaan piak ko. Bawipa tlang ah cun amah nih ṭuanvo a kan lak i amah nih a ṭha bik in khua a kan khaan piak ko.