Fapa a zummi paoh cu zungzal nunnak an ngei

Nihin ni caah kan relmi cathiang John 3:31-36 a si. “Cung lei in a rung mi cu a dang vialte nakin a ngan deuh. Vawlei in a ra mi cu vawlei ta kha a si i vawlei cung thil kong kha a chim. Cung lei in a ra mi cu zeizong vialte cungah a um. Amah nih cun a hmuh mi le a theih mi kha a chim. Sihmanhsehlaw a chimmi kha an cohlang lo. A bia a cohlang mi nih cun kha an cohlaan nak thawng khan Pathian chimmi cu a taktak a ti timi kha an langhter. Pathian nih a thlah mi pa kha a thlarau cu tling tein a pek caah Pathian bia cu a chim. Pa nih Fapa kha a dawt i zeizong vialte kha amah kut tangah a chiah dih. Fapa a zummi paoh cu zungzal nunnak an ngei. Fapa a zum lomi paoh cu nunnak an ngei bal lai lo i Pathian thinhunnak cu an cungah a um zungzal ko lai.”

Nihin kan zumhnak hi a nungmi zumhnak maw a si, a thi mi zumhnak maw a si timi kha i check ṭhan cio u sih. A thimi zumhnak, a nungmi zumhnak tiin a um i kan zumhnak hi lung cung i sakmi inn bantuk a si tikah hin a nung mi zumhnak a si kho lai i, thetse cung i sak mi inn bantukin kan zumhnak a si ahcun a thimi zumhnak a si lai ti kha Bible kan zoh tikah kan hmuh khawh mi a si. Cucaah zumhnak kan ti tikah hin, kan zumhnak cu kan tuahser nak in kan langhter tik zongah hin a nung mi zumhnak ah a cang i cu kan zumhnak cu kan tuahser ank in kan langhter lo tikah James nih a thimi zumhnak a si tiah a kan chimh. 

Dawtmi u le nau hna, kan Bawipa Jesuh Khrih cu khamhtu le tlanhtu a si tiah kan zumh tikah hin cu kan zumhnak cu tuahser nak in kan langhter maw? Zumhnak cu tuahser nak in kan langhter tikah hin kan taksa caah damnak zong a si i kan thlarau ca tiang zongah khamhnak a si lai ti hi Bible chungah kan hmuh khawh mi a si. Zumhnak cu Bible chungah tuahser nak in aho nih dah a langhter tiah cun kum 12 chung thichuak mi nu kha kan zoh tikah a zumhnak kha a tuahser nak in a langhter tikah damnak a hmuh timi kha kan hmuh khawh. Kan Bawipa Jesuh Khrih a puan ki te khi ka tongh ah cun ka dam ko lai timi kha a zumh. Cu a zumhnak cu a tuahser nak in a langhter taktak. Jesuh puan ki te kha a tongh cang ka in a thi luannak cu a dam ti hi kan hmuh mi a si. A zumh lawng zum sehlaw, a puan ki te kha a tongh lo a si ahcun a dam lai lo. A zumhnak kha a tuahser nak in a langhter tikah a thi chuahnak kha a dam ti kha kan hmuh khawhmi a si. 

Ralbawi sin um pa zong kha zoh ṭhan u sih. Jesuh kha a va chimh i Jesuh nih ka ra lai i ka dam ter lai tiah a ti tikah “Bawipa, nangmah rat theng a herh lo, na bia kaa khat chim law a dam ko lai” ti kha ralbawi pa nih khan a zumh. Jesuh Khrih nih a tuah khawh lai ti kha a zumh tikah cu a zumhnak thawng cun a sin um pa zong cu a dam. 

Nihin kan zumhnak kan ngeih mi hi damnak kan hmuh khawh tiang in kan zum kho taktak maw? Cun kan zumhnak kha kan tuahser nak in kan langhter taktak maw? Kan zumhnak cu kan tuahser nak in kan langhter tikah hin, a dam mi zumhnak, a nung mi zumhnak a ngei dingmi kan si timi philh hlah u sih. 

Fapa a zummi paoh cu zungzal nunnak an ngei ee a ti. Jesuh Khrih kan zumh tikah hin zungzal nunnak a ngei mi kan si ti zong kha philh hlah u sih. Cu kan zumhnak a theipar cu zei dah a si tiah cun “Nunnak” a si. Kan sual, kan palhnak vialte ngaihthiamnak a si. Pathian dinnak ngeihnak zong a si i taksa, thlarau khamhnak zong a si. Lawmhnak ngeih khawhnak zong a si i thianhlimnak ngeih khawhnak zong a si, thil ti khawhnak ṭhawnnak ngeih khawhnak zong a si. Fapa a zummi paoh cu vawlei tei khawhnak zong a si i Pathian lung tonnak zong a si. Cucu kan zumhnak i a theipar cu a si. Cu vialte hna kan co khawhnak hnga nihin zumtu hna nih kan i zuam awk a si. 

Nihin kan zumhnak hi a deu a si lo mi, a taktak a simi, kan Bawipa Jesuh Khrih cungah kan nunnak vialte hngakchanhin kan nunnak dihlak i pek in, i bochan in, zeizong vialte a tuah kho tu a si, a kan tlanhtu a si, a ka khamhtu a si tiah kan nunnak dihlak in, Lamkaltu hna nun bang, “an nunnak dihlak in tehte an khaan” bantukin kannih hna zong kan Bawipa Jesuh Khrih cu a ka khamhtu, nunnak a ka petu a si tiah zumh in  tehte a khang kho mi kan sinak hnga ding caah hin kan i zuam ding mi a si. Fapa a zummi paoh cu zungzal nunnak an ngei a ti. Fapa na zumh, kan zumh a si ahcun zungzal nunnak a ngeimi kan si ti kha i philh hlah u sih.