Zumhnak le tuahsernak

Nihin kan relmi cathiang hna cu (Acts 5:17-26; Jn 3:16-21) an si. Nihin ni ah ruah ṭi ka duh mi cu, kan Bawipa Pathian nih vawlei hi a dawt tuk hringhran caah a Fapa ngeihchunh a pek mi zumhnak le cu zumhnak in a kan fial mi tuahnak, ceunak chung i nun kha tawi tein ruat ṭi hna u sih. 

Khrihfa hna kan zumhnak ah hin zumhnak le tuah timi hi aa zulmi a si i ṭhen awk a ṭha bak lo timi kha fiang tein kan hmuh khawh mi a si. Vawlei taksa kan nunnak hmanh ah hin ka zumh ti sawhsawh in zeihmanh hi a tlamtling lo i kan zumhnak le kan tuahnak aa zulh lawnglawng ah a tlam a tling mi a si. Cucu fiang tein kan hngalh mi zong a si. Vawlei a ṭhat tuk nak hmun ah thlai rawl a ṭha tuk ko lai timi kha kan zumh tuk ko nain kan tuah, kan cin, kan thlak lo ahcun a theipar, a phi kha hmuh a si lo. Kan tuah ṭuan hnu lawngah a theipar kha kan zuun i a phi kha kan hmuh. Kan zumhnak kha kan tuahnak he ai fonh hnu lawngah a tlam a tling mi a si ti kha vawlei hmanh ah kan hmuh mi a si. 

Abraham zong zumhnak ah kan pa kan timi a si. Cu a zumhnak cu a tuah nak in a langhter hnu lawngah Pathian nih zumhnak tlamtling tiah a cohlaan ti kha cathiang ah kan hmuh i, Jeim chung zongah kan hmuh mi cu zumhnak cu tuah sernak aa tel lo ah cun a thimi a si i tuah sernak zong cu zumhnak aa tel lo ah cun a thimi a si tiah a kan timi kha kan hmuh mi a si. 

Biakam hlun chung kan zoh tikah Eve le Adam sualnak ruangah Pathian le minung hi i pehtlaih khawh a si lo i kan kar lak ah sualnak a um tikah Pathian nih minung sin zongah rian ṭuan le bia chim a duh tikah hin direct in bia a chim kho loh. Profet hna hmang in vawlei cung minung kha a kan pehtlaih timi kha kan hmuh mi a si. Sihmahsehlaw, Pathian nih vawlei kha a dawt tuk, a sermi minung he i ṭhen, i hlai kha a duh lo caah aho tuah ṭuannak, aho din felnak tel lo tein Kalvary vailam cungah a Fapa kha a kan pek, a nunnak kha a pekmi kha a si. 

Judah mi hna nih cun Moses nawlbia le Judah mi hna nawl phung zulh in dinnak, felnak, tuah sernak in Pathian lung kan ton lai timi kha an i ruahchan. Sihmahsehlaw, ahohmanh nih tuah sernak in Pathian lung an tong kho lo. Cucaah a Fapa ngeihchun te kha a kan pek ti kha cathiang ah kan hmuh mi cu a si. 

Zultu hna nih Thawngṭha an chim, ca an kuat hna tikah Khrih a thinak, a thawhṭhannak kha nan zumh ṭung lo i Moses nawlbia hna le Judah mi phung zulh in i zuam in dinfelnak in Pathian lung ton nan i zuam mi hi cu nan caah thih a si ko ee, zumhnak aa tel lo hin cun tuah sernak cu a thi mi a si ko zultu hna nih Judah mi kha an cawnpiak mi hna kha kan hmuh mi kha a si.

Kan Bawipa Jesuh Khrih Kalvary tlang cungin a thisen in a kan tlenh tikah “Khah, kan tlanh dih cang hna, zungzal nunnak ah a run run in, a bu buin kal u, lut tuah u” a kan ti maw kan ti a si ah cun a kan ti lo. Kanmah tein kan i tuah khawh ti lo mi, minung din felnak, ṭhatnak, ahohmamh tel loin Pathian a dawtnak tet tet ruangah Kalvary vailam cungah Kan Bawipa Jesuh Khrih nih a kan tlanhnak, a kan khamhnak cu kan zumh i kannih nih kan Bawipa Jesuh Khrih a cawnpiaknak kha kan zulh, kan tuah, kan ṭuan lawnglawng ah a kan kamhmi zungzal nunnak cu kan co lai timi kha fiang tein kan hmuh mi cu a si. 

Judah mi hna nih tuah sernak in Pathian lung ton an i zuamnak kha zultu hna nih ‘hihi cu a thi mi a si’ tiah an cawnpiak mi hna cu a si i, cathiang chungah cun Khrih a zummi hna nih cun kan Bawipa Jesuh Khrih nih a kan fial mi tuah ṭuan kha a biapi tuk mi a si timi kha fiang tein kan hmuh. 

Cucaah muihnak chung i tuahmi, ṭuan mi cu Satan sin in a ra mi a si i, ceunak chungah tuahmi thil ṭha, thil hmaan cu Khrih sin in a ra mi a si timi kha cathiang chungah kan hmuh ṭhan. Zeitik hmanh ah mifir le damiah hna nih ceunak chungah cawlcang in an fir lo i mui le zaan le mi nih hmuh khawh lonak hmun kha an i cherchanh. Cucu Satan sin in a ra mi a si ti kha fiang tein a lang. Ceunak chungah tuah mi cu Khrih sin in a ra mi thil dik, thil hmaan a si caah ceunak chungah khan zalong tein le ngamh te le ning cang tein tuah ṭuan a si ti kha cathiang chungah kan hmuh mi kha a si. 

Cucaah kannih hna zong kan tuah kan ṭuannak ah hin ceunak chungin a tuah mi maw kan si, muihnak chungin a tuah ṭuanmi maw kan si timi kha kan i check hrimhrim ding mi a si. 

Cucaah dawtmi u le nau hna, Khrih kan zumh kan ti tikah a zumh lawng si loin a kan pek mi a bia, cathiang chung i a ummi zulh kha a biapi taktak mi a si. Cu hnu lawnglawng ah a tlam a tling mi zumhnak, Pathian nih a co mi zumhnak, zungzal nunnak co tlak sinak ding cu zumhnak le tuahnak ai zulh hnu lawnglawng ah a si ti kha fiang tein kan hmuh mi kha a si. 

Dawtmi u le nau hna, van lei panh in vawlei ah kan um cuahmah lio ah hin nuamhnak men men in a um kal mi si loin Khrih nih a kan pek mi zumhnak le a kan pek mi a bia, tuah ṭuannak hi kannih nih biapi ah chiah in Pathain bia ah a um lo mi cu minung ruahnak a si i minung ruahnak cu a dong kho. Sihmahsehlaw, Pathian bia cu zungzal in a hmun mi a si caah Pathian bia tu in Pathian hi kan zulh, kan zumh ding a si ko hrawm ṭi kan duh mi hna cu a si. Bawipa nih thluachuahnak in pe ko hna seh. Amen