Pope Leo 14 cu Africa ram a tlawng hmasabik Pope asi
Pope Leo XIV cu Africa ah khua a tlawng lio i April 13-23 tiang a rau lai. Hi a khuatlawnnak cu kum zabu 21 Bupi caah a biapi tukmi asi pin ah Africa a tlawng hmasabik Pope zong asi fawn. Pope nih Africa a tlawn hnawh chanmi le aa tinhmi cu Khrihfa-Muslim hna karlak i pehtlaihnak ah pakhat le pakhat i dawrem tein khuasakṭi khawhnak hnga caah asi. Middle East ah a chuakmi buaibainak le i dohkalhnak a linhsat lio ah, American in ahmasa bik Pope Leo 14 nih Africa a tlawnnak. Cu lio ah Pete Hegseth, US defence secretary nih US ral rianṭuannak (US nih Iran a tuknak) cu Pathian nih a dirpi tiah a ti. Pope Leo 14 nih Muslim tamnak ram Algeria tlawn ding le biaknak karlak pehtlaihnak tawlrel ding in biakhiahnak a tuahmi nih hin Trump cozah le US ralkap nih Iran an tukdohmi kongah Pope nih raltuknak a dirpi lo, a ṭanpi lo ti a langhter.
Pope khualtlawn ai thawh hlan zan ah Trump nih Truth Social ah Pope a soiselnak ca a ṭialmi cu, “Pontiff (Pope) cu “Ramdang Policy caah ṭihnung a si” tiah a ti i “Iran nih Nuclear Hriamnam ngeih cu a poi lo tiah a ruatmi Pope cu ka duh lo” tiah a ti. Pope Leo nih a hnu Monday ah a vanlawng cung ah a leh i, “Ka chimmi thil hna hi ahohmanh tukdohnak caah a si lo,” tiah a ti, asinain, “Trump cozah le Thawngṭhabia aw thangpi in chim hi ka ṭih hna lo,” tiah a chimchap.Kan hnu cawn nikhat ni ah Algeria ramkhel nawlngeitu hna sinah bia a chim lio ah, “minung kan sinak limhang hi upat awk asi i mi hna kha fahnak le harnak intuarter tawk asi lo” tiah a forh hna i hi rian hi “ramkip upadi le neocolonial lungput buarnak a um peng caah a hlan nakin a biapi deuh” tiah a ti. Africa cu Catholic Khrihfabu a karh cuahmahmi ram a si, cun Khrihfabu nih fimcawnnak le ngandamnak zohkhenhnak rian an ṭuan pin ah buaibainak a umtik ah remdaihnak serpiaknakin zatlang nun ah Catholic zumtu hna nih thazaang chuah in rianṭuannak an ngeihnak hmun a si.
Vatican cazin ning in, vawleicung pumpi ah Catholic cu vawleicung zumtu zatuak 20% hrawng an si cang. A khualtlawnnak ah Algeria, Cameroon, Angola le Equatorial Guinea aa tel i vanlawng 18 a zuang lai, helicopter in pahnih aa tel, cun meng 11,185, asiloah meng 18,000 hrawng a kal lai. Pope nih Africa a tlawnnak thawngin African Catholic bia i ruah khawhnak caanṭha asi lai i nifatin nunnak kong kha amah pumpak nih a hmuh a hngalh khawhnak caanṭha a asi lai tiah Nigeria rammi Fr.Agbonkhianmeghe Orobator nih a chim. Pope Leo 14 cu Africa ram ah a ke a thla hmasa bikmi Pope a si lai. Nitlaklei nunphung le Khrihfa zumhnak hna he a dannak le an i lawh lonak cu Algeria ah a sang rih. Catholic milu 8,000 hrawng lawng an umnak hmun a si i cu ka ummi Khrihfa hna cu harnak an tong lengmang. Pope nih a tlawnnak hna thawng in Algeria Catholic Bupi hna caah thazaang a pek hna lai tiah ruahchannak tampi a um.
Photo:credit