Dawtnak in lungthin khat sinak

Nihin kan relmi cathiang hna cu (Acts 4:32-37, Jn 3:7-15) hna an si. Thlarau thazang hrawm ṭi ka duh mi cu avoikhatnak kan relmi cathiang chungin a si lai. “Lungthin khat sinak le Dawtnak” pakhat le pakhat zawn i ruahnak kong kha nihin ni ah ruah ṭi kan duh mi hna cu a si. 

Nihin kan cathiang relmi chungah hin zultu hna cu lungthin khat tein an um hna ee timi kha kan hmuh khawh. An ngeihmi thil hna zong kha an i hrawn ṭi dih hna ee timi zong kan hmuh. Cun an dihlak in lungthin khat te si ning in Pathian hmai ah an um hna timi zong kha kan hmuh khawh. Zei ruangah dah a si hnga? Jesuh zultu Lamkaltu hna cawnpiak nak hna kha zumtu hna zong nih ṭha tein an ngaih hna i an nunnak ah a tak sinak in an i nun pi ruangah a si. Hi ruahnak cu Jesuh Khrih nih a nunnak kha mi vialte caah aa pekchanhnak ruangah a si i cucu zumtu hna zong nih mah zawn lawng ruat ti hna loin Jesuh Khrih nunzia kha an nunnak ah an langhter ve mi cu a si. Jesuh nih a thawngṭhabia a ngai i a zultu hna cu ka u ka nau, ka chungkhar an si timi kha fiang tein an hngalh ca zong ah a si fawn. 

Jesuh Khrih cu amah rumnak caah a nung mi a si lo. A rumnak cu Pa Pathian sinah khan a si. Hi thil, biathuk te kha zultu hna nih zumtu hna kha an cawnpiak hna i cu cawnpiak ning tein cun zumtu hna zong nih pakhat le pakhat caah dawtnak langhter nak in an nunnak in an langhter ve mi cu a si. An chawva kha mah ca lawngah an hmang ti lo, an i chiah ti lo. Hawi dang zumtu Khrihfa hna caah khan hman in an thilri vialte kha an i hrawm khawhnak in pakhat le pakhat an i dawtnak kha an langhter.  

Zumtu hna nih an ngeihmi thil hna kha zultu hna sin an rak ap tik zongah “van ṭhat, kanmah ta a si” timi lungput ngeih loin a herh a bau mi zumtu vialte hna kha an herh, an bau ning cio in an cheuh an bauh hna. Pathian caah, Bupi caah, Khrihfa caah tiin rak put mi thil, rak hlutmi thil kha lamkaltu hna nih an mah caah an i chiah lo. Hihi hruaitu hna nih kan i zohchih hrimhrim zungzal dingmi cu a si ko. Cu tin thil dik, thil hman tein an tuah hna ruangah ṭhawng ngai in Pathian biathiang kha tehte an khaan khawh i mi vialte nih upat nak an ngeih hna. Lamkaltu hna zong nih Jesuh Khrih cawnpiak ningin an nun khawh ve caah thil khuaruahhar tampi zong kha an tuah khawh ve hna timi zong kha kan hmuh khawh. 

Thil dik ning tein rian a ṭuantu Lamkaltu hna sinah khan zumtu hna nih an thil tuahmi a hmaan caah siang ngai in an ngeih mi thil hna kha an pek ngam hna. Cun Lamkaltu hna zong nih an rian kha ṭha tein an i theih ve i Pathian bia cawnpiak nak le khamhnak Thawngṭha puannak hna ah khan ṭhawng ngai in rian an ṭuan kho ve. Thil ṭha a tuah tu lamkaltu hna nunzia kha Judah mi hna zong nih an hmuh tikah an chimphuan mi kha an cohlaan khawh ve hna i Lamkaltu hna kha “zeidah kan tuah kun lai” tiah an ti tik hna ah, “nan sualnak kha i ngeihchih u law Jesuh Khrih min in tipil nak kha ing u” tiah an ti hna mi tampi zong Jesuh Khrih a zumtu an hung si hna. 

Nihin kan relmi chungah Barnabas kong zong kan hmuh. Hi pa zong nih Lamkaltu hna thil tuahnak cungah siseh, an chimphuanmi Jesuh Khrih cungah siseh zumhnak a hung ngei ve i cuticun a ngeih mi thil hna kha a zuar ve i Lamkaltu hna sinah a rak pek hna timi zong kha kan hmuh khawh. 

Lamkaltu hna si hna seh, zumtu hna si hna seh, an thinlung chungah “hi vawlei chawva le thilri hna cu zungzal in a hmun mi an si lo; zungzal in a hmunmi thil, Jesuh cawnpiak hmuhsak mi zungzal nunnak tu kha a biapi deuh” timi kha an theih caah an ngeihchiah chawva vialte kha siang ngai in Bupi caah, Pathian Pennak a kauh khawhnak caah tiin an hlut khaw, an rak put khawh hna. 

Dawtmi u le nau hna, kannih hna zong zumtu hna bantukin kan thiamnak, kan fimnak, kan chawva hna kha Pathian sunpar lianngannak a langh chin khawhnak hnga caah a hmang kho mi si ve hna u sih. Barnabas bantukin tuahsernak in siseh, chimrelnak in siseh, siannak lungthin a ngei mi si khawh i zuam ve hna u sih.