Dai zirziar te Umnak in Tho tuah
Missionary rianṭuantu pawl cu lungchung mirhnak he thawngṭha an chim tiah Pope Francis nih mino pawl a ti
Nan ulenau hna kha zohkhenh dingah, lawmhnak thawngṭhabia chim dingah le tehte khang dingah, a hniarhnuar mi, nuamhnak a umlo mi nan nunnak pungsan in thoṭhan cang u tiah Pope Francis nih mino pawl kha a ti. Pope Francis i “tho tuah, zohkhenh tuah, tehte khang tuah” timi biafang pathum kha langhter in Khrihfa missionary rianṭuantu pawl i ṭuanvo rian pawl kha “Missio Young People – Missionary Mino” phu chungtel pawl kha a liamcia mi zarhteni 23 April ah a chim. Anmah pawl cu Italy ram in an si i Pope i missionary mino phu in an si.
Italy ram i mino pawl cu missionary mino tonhpumhnak caah Rome khua ah an i pumh. Cu tonpumhnak i an i timhmi cu ‘Back to the COMIGI: Mission restarts from the future’ (Keimah sinah kirṭhan u; Missionary rian cu hmailei caan in a thawh) ti a si. Atu i tonhpumhnak cu mino pawl mission rianṭuan duhnak thinlung an thawhṭhan khawhnak caah a si.
Dai zirziar tein mah zawnlawng ruahnak in thocang tuah
Pope nih a cunglei i biafang pa (3) chung i a pakhatnak “Tho tuah” timi a chim tikah Bupi i “missionary thinlung” kha a sawhduhnak a si. Hi biafang cu vui dingin an kalpi mi Nain i nuhmeinu fapa kha Khrih nih a chimmi bia a si (Lk. 7.11-17). Cu bia a ngai i nunnak a hmuh ṭhan. Jesuh Khrih nih cu tlangvalpa i a nu nuhmeinu kha zaangfah dawtnak nganpi a hmuhsak. Ṭap loding zongin hnemhnak a pek. Cutin a hnemh tikah ngai a nuammi biafang men a silo. Jesuh nih a chimh tikah tuahsernak zong aa tel chih. Cu tlangval pate cu a nu sinah a apṭhan. Jesuh nih kanmah hna kha a siarem ngai mi sining cang, mahzawn lawng ruat in umtu ningcang, thathutnak le chungthu leengnaal thil umtuning in thoṭhan dingah a kan auh bangin thazaang zong a kan pek. Mission rianṭuantu pawl cu hawi zawn ruahnak rian, an ruahchanhnak kha serpiaknak thawngin mahle ulenau hna kha kilven le bawm dingin auhmi an si.
Pope nih a pahnihnak biafang a fiangter ṭhan tikah “Zohkhenhnak” nih dawtnak rian kha a tlingter i hngalhnak a ngeimi lam pungsan in tlinternak; phundang in kan chim a si ahcun “Samaritan miṭhapa” i tuahsernak phun a si. Mino pawl cu ralring tein aa veng thiammi zohnak-hmuhnak ngeih a herh. Cuti a si lawngah bawmhnak a herhmi pawl kha an hmuh khawh lai. An herhbau mi vialte kha chappiak in mah tikhawh chungin bawm awkah zuam a hau lai. Atu nan nunnak kha daitein i nun i hawizawn ruahnak rian hna kha ṭhahnem ngai le tlamtling tein ṭuan a herh. Tinhmi nganpi he lungchung in hmanthlak suai thiam u. Caansau ṭhathnemnak caah fektein tuar khawhnak le minung hna i nunnak lamtluan ah damternak pekin nun an ṭhangkhawhnak le hawikomh tuahpiaknak dingah mino pawl i caan a phanh cang.
Lawm tein tehte khang tuah
A pathumnak biafang a simi “Tehte khang tuah” timi he pehtlaiin a chim tikah missionary tuah tikah umlo in a ngahlo mi thil pakhat a si a ti. Khrihfa kip nih Thawhṭhan Nunnak kha mah nunkhuasak ningah nungter ding a si. Tiduhnak cu thih hnuah a nungṭhan mi bantuk kan si hrimhrim a hau. Mission rian cu lungtho ngaiin karhlan ding a si. Cuti a si lawngah mission tuahtu i a lawmhnak cu midang hna kha a cheuhkhawh lai. Cuve bangin lunglawmhnak a bau i nunnak a ngeilo mi bantuk nunnak cu a nungṭhan mi bantuk a si lai. Hibantuk tonhnak phun cu a dawh i zumhnak kha tha a ṭhawnter chin. Nunnak hlun kirṭhan ding sining cangin zong zeitin indah a hrial khawhlai timi zong a hngalh ter.
Pope nih Italy i Missionary Mino pawl kha a dulmi mithmai he ṭhawngthabia kha vape siloin lungthin chung in a chuakmi mirhnak he mission rianṭuan dingah, thawngṭha chimpeng dingah, cuti a si lawngah nan i lawm lai ti chim buin a biachimmi a dongh ter.