Toidornak le Zawnruahnak Lungput Ngei Hna Usih

Tik cu caan a kan serpiak tthantu kan biakmi kan Pathian a min ka thangtthat. 2026 Oct 23, nihin ni zongah Pathian thawngtthabia hrawmtti dingin le Pathian thawngttha a rak ngaitu, thazaang a kan petu nan zapi te cungah Pathian nih thluachuah in pe ko hna seh! Kan hnu lei zarh ah kan rak chim cang bangin kannih vialte cu Pathian thimmi miphun, amah mi si dingah hlankan tein khua a rak khan cia, Pathian nih aa tinh ningin thil a rak kal diahmah ko timi kong kha kan chi mi, cu chungah kannih zong sawm kan si ve, a Khrihfabu chungah sawm kan si ve timi kong kha kan rak chim cang i, nihin ni caan zongah Khrihfa Bupi nih rel dingin a kan timhpiakmi Efesa 4:1-6 chungah kan hmuh khawhmi cu; relnak panga ah Bawipa pakhat lawng a um, zumhnak pakhat lawng a um, tipil innak pakhat lawng a um e tiah a ti. Pathian nih a kawhmi hna a Khrihfa Bupi chung ahcun Bawipa pakhat lawng a um, zumhnak pakhatte lawng a um, tipil innak phunkhatte lawng a si. Cu chung i a ummi hna cu pumkhatte an si tiah nihin kan relmi Bible chungah a langhter i cu pumkhat chung i a ummi hna cu kan zumhnak pakhatte a si i kan Pathian pakhat a si, tipil innak pakhatte in pumkhat dirhmun in Pathian kamhmi ram, van Kanan ram cu kar a hlangmi kan si. Nihin rel dingin Khrihfa Bupi nih a kan timhpiakmi Salm 24:3-4 ah Bawipa tlang ah ahodah a kai kho lai? A Biakinn thiang chungah ahodah a lut kho lai? Tuahnak le lungthin in a thiang i siasal kha a bia lo i, hlennak biakam a tuah lomi kha an kai kho lai, an lut kho lai tiah a kan ti. Efesa Cathiang chungah Mithiang Paul nih a kan timi cu Efesa 4:1 zawn ah Pathian nih an auh hna nak he aa tlakmi nunning khan nung u tiah kan forh hna. Toidornak lungthin ngei u, lungnem le lungsau in um zungzal u, pakhat le pakhat le i bawm ulaw cuticun nan i dawtnak kha langhter u. Pumkhat sinak thlarau nih an pekmi hna kha ngeih peng awkah an funtu hna thlarau hri khan fek tein i ttem u. Pathian nih an kawh hna tikah ruahchannak pakhat a um ti bantuk te khan pum cu pakhat lawng a um i thlarau pakhat lawng a um e tiah a ti. Duhdawtmi u le nau nu le pa hna; cu pumkhat chungin van Kanan ram ah kar kan hlannak ah toidornak lungthin put kan ngeih ding hi kan rian nganpi a si. Jesuh Khrih cu mi nunnem a si bantukin kan lung hi a nem i kan lung a sau ding a si i toidornak thinlungput hi kan ngeih peng ding a si. Aho hmanh aa uah ngam ding kan um lo, aho hmanh ka si kho ka tuah kho tiah aa porhlaw ngam ding kan um lo. Mi zong zeitik hmanh ah a serhsat in a zawmhtaih ngam dingmi hohmanh kan um lo. Pathian nih a kan kawh auhnak ning tein aa tlak tein kan nun ding kha cucu a kan chimh i, nihin ni ah Khrihfa Bupi nih rel dingin a kan timhpiakmi Lk 12:54-59 chungah kan hmuh khawh mi cu; Nitlak leiin khuadawm a thawh nan hmuh tikah hmakhatte ah ruah a sur lai nan ti, cun chimlei thli a run hran tikah nan pum nih a theih tikah khua a sa lai nan ti i a lin taktak. Mi depde hna, van le vawlei kha nan zoh i a sullam zeidah a si ti kha nan hngalh khawh, a si kun ahcun zeicahdah caan sullam hi nan hngalh khawh lo e tiah a ti. Pathian kutchuak thil hna nihhin Pathian muisam le Pathian thinlung put hi tampi a langhter ko. Cucaah cun Pathian duhnak cu toidornak thinlung put, zawnruahnak thinlung put, dawtnak thinlung put vialte hi kan Pathian nih a duhmi a si. Relnak 57-59 ahcun a hmaanmi thil tuah kha nan lung nan i thleh peng awk a si tiah a kan ti. Mi pakhatkhat nih tazacuai an duh i zung ah an chuahpi tikah lam i nan kal lioah rem khawhnak i zuam, cuti na tuah khawh lo ahcun biaceih bawi hmai ah an chuahpi lai i, biaceih bawi nihkhan palik sinah an chan lai i palik zong nihkhan thong ah an in thlak lai. Na tlak vekvek a si ahcun dan i an in tatmi na liam dih hlan cu na chuak hrimhrim lai lo tiah a ti. Hika zawn i thongtlak kan timi cu zeidah a si; kan thih hnu i thianternak hmun i um, purgatory tiah an timi kha a si. Duhdawt mi u le nau nu le pa hna, vawlei cung kan nun lioah kan sualnak Bawipa nih a kan ngaihthiam bantukin mi sualnak kha kan ngaihthiam ve ding a si i, mi nih kan cungah thil tthalo an tuah zongah ngaihthiam ding kha kan rian nganpi a si. Cu a si lo ahcun i porhlawtnak thinlung put, uahnak thinlung put, kan Pathian nih a duh lomi thinlung put pawl kan ngeih i kan sual kan i ngaihchih lo a si ahcun kan thih te tikah kan sual biaceih kan si te lai i, cuticun thianternak hmun ah kan thlarau, Pa Pathian mithmai a hmuh hlan ah kan thlarau cu thianternak hmun ah a um lai tiah nihin ah a kan chimh. A ruang cu thong an in thlak lai i na liam dih cikcek hlan tiang na chuak kho hrimhrim lai lo a ti duh mi cu; thianternak hmun cu donghnak a ngei timi kha sullam a sawh duh mi a si i, hell pi a si ahcun donghnak a ngei lomi a si caah donghnak a ngeimi thong thlak cu thlanpin kan thih hnu i sualman liamnak, thianternak hmun purgatory kha a chim duh mi a si. Palh i tuahmi hi sual an si dih ko, sihmanhsehlaw sualnak vialte hi thihpi tlak sualnak an si dih lo tiah Johan cakuat chungah kan hmuh bantukin duhdawtmi nu le pa u le nau hna, pumkhat sinak in vancung Kanan rampi zumhnak he kar kan hlan lioah toidornak lungput he, zawnruahnak lungput kha ngeih dingin Pathian nih a kan kawh hnawh chan a si caah cu thinlung put te cun Pathian kha sunparnak pek khawh i zuam cio usih! Pathian nih thluachuah in pe ko hna seh!