St. Carlo Acutis

Mithiang Carlo Acutis cu 1991 kum, May 3 ni ah England ram, London khua ah a chuak. A nu le a pa cu Andrea Acutis le Antonia Salzano hna an si. Amah cu a ngakchiat tein biaknak leiah aa pemi a si i, a hnu ah Italy ram, Milan khua ah a tthang i fimnak a rak cawng. Kum sarih a ti ah Hmasabik Bawipa Thisa Sacrament a rak cohlan. Cu ni thawkin a thiangmi puai hna le Jesuh Khrih cungah a hleiin duhpatnak a rak ngei i, nifa tein Missa Raithawinak ah tel a rak i zuam. Cu lengah Rosary camnak, thlacamnak le mi sifak hna bawmhchanhnak hna kha a nunnak i a biapi mi cheuchum ah a rak chiah.

Mithiang Carlo Acutis cu computer le internet fimthiamnak kha a duh ngaimi a si. Kum 11 hrawng a si in vawlei cung pumpi i ‘Bawipa Thisa Sacrament khuaruahharnak’ hna kong kha a hlathlai i website pakhat a ser. A tinhnak cu minung hna nih Catholic Bupi zumhnak le a thiangmi puai hna i an biapitnak kha thei deuh hna seh ti a duh caah a si. St. Carlo cu biaknak lei lawngah si loin nifate a nunnak ah Khrihfa nunzia in a nungmi a si. Ngakchia hna kha biaknak kong he pehtlaiin cawnpiaknak, harnak a tongmi a hawile kha bawmhnak le sifak mi hna bawmhchanhnak hna ah aa tel. Thianhlimnak cu Biakinn chung lawngah siloin nifatin kan nunnak zongah langhter ding a si kha St. Carlo nunnak nih a langhter.

2006 kum, October thla ah St. Carlo cu ‘thi cancer zawtnak’ in kum 15 a ti ah a rak thi. A ruak pum cu Italy ram, Assisi khua ah an chiah i nihin ni tiang Pathian biak ah a kalmi hna nih upat in an va len. 2020 kum, October 10 ah Pope Francis nih ‘Thluachuakmi-Blessed’ sinak ah a cawisan. 2025 kum, September 7 ah Pope Leo 14 nih ‘Mithiang-Saint’ sinak ah a cawisan. October 12 cu St. Carlo Acutis philhlonak a puai ni a si. A chimmi bia pakhat cu; ‘Jesuh Khrih he zungzal i komh in nun cu nifatin ka nunning a si’.