2026 kum, Voi (100) nak Mission Sunday caah Pope Leo (14) i Biacah
“Khrih ah pumkhat, Mission rianṭuannak ah lungthinkhat”
Dawt mi u le nau hna,
Tu kum 2026 kum, Mission Sunday cu Pope Pius (11) nih a rak thawkmi Vawleicung Mission Sunday kum (100) tlinnak ni a si. Tu kum i ‘Khrih ah pumkhat, Mission rianṭuannak ah thinlungkhat’ timi tlaihtleng nih kannih vialte kha Khrih ah lungrual tein Khrih thawngṭhabia kha hmunkhat tein phuan awkah a kan sawm.
Jesuh Khrih nih ‘An dihlak in pakhat an sinak hnga’ (Jn 17:21) tiah thla a rak cam. Cucaah Khrih ah lungrualnak cu kanmah ca lawngah siloin, hi vawleipi nih Khrih kha a theih i a zumhnak hnga tehte khaannak caah a si.
Tipil innak Sacrament a hmutu paoh cu mission rianṭuantu kan si. Cucaah mission rianṭuannak cu Siangbawi hna, Sister hna (asiloah) missionary hna ca lawngah a si lo. Kannih vialte cu kanmah i Pathian kawhauhnak le kan sining hoih in Khrih i mission rian ah kan i tel awk a si. Thlacamnak, Khrih kha kan nunnak in tehte khaannak le kan caan, kan fimthiamnak, kan ngeihmi thilri hna phawtzamhnak hna in mission rian a ṭuan khotu kan si ve.
Nihin vawlei pumpi ah mission rianṭuantu hna cu mah le chungkhar, chuahkehnak, humhimnak le hngangam tein a ummi an nunnak kha kaltak in Khrih thawngṭhabia le dawtnak kha sifak-harsa mi hna, bawmh a herhmi peng ram hna le Khrih a thei rih lomi hna sinah Khrih thawngṭha va phuan dingin an nunnak kha ui loin an i pechan hna. Sihmanhsehlaw cu an thawngṭhabia phuannak ahcun kannih vialte zong kan i tel kho. Kan thlacamnak hna nih annih kha thazaang a pek khawh hna i, tehte kan khaanmi kan nunnak nih Khrih thawngṭha kha a phuan khawh i, kan pekchanhmi ahlu hna nih vawleicung mission rian hna kha mithmuh kuttongh in a bawmh khawh hna.
Nihin Vawleicung Mission Sunday ni ah kan pekmi ahlu phaisa cu a sawhsawh a si lo. Hi ahlu phaisa cu vawleicung pumpi i mission rianṭuantu hna he hmunkhat in kanmah pumpak zong mission rian ah direct in kan i tel ti kha a langhtermi zumhnak le dawtnak i tuahsernak hna an si. Zeitlukin a hmemi ahlu phaisa si ko hmanhsehlaw, Khrih thawngṭhabia phuannak ah kan pekmi kan siannak lungthin cu a sunglawi hringhran ko.
Cucaah tu kum (October 18, 2026 kum) ah kan tuahmi Vawleicung Mission Sunday ahhin thlacamnak in mission rian ah i tel ve hna usih. Tehte khaannak in mission rian ṭuan hna usih. Kan ngeihmi ahlu phaisa peknak zongin mission rian ah i tel hna usih.
Kannih vialte cu mission rianṭuantu kan si dih.
Khrih ah pumkhat, Mission rianṭuannak ah thinlungkhat si hna usih.
Vatican, 2026 kum, January 25 ni, Zarhkel Zarhthumnak Zarhpini, St. Paul lungthlennak puai
Pope Leo (14)