Biatak luatnak le Chunglei Thianhlimhnak
Bible relding: Galatians 5:1–6 and Luke 11:37–41
Nihin kan relmi cathiang hna nih biapi ngai in pahnih a kan cawnpiak. Khrih chungah a luat mi kan si cang maw? Cun, lenglei in thianhlimnak kan tuah bangin kan chunglei hna hi a thaing tak ve maw?
Paul nih Khrih nih luat nak a kan pek cang tiah Galati mi hna sin a ca kuat ah a langhter. Gospel chung zongah Jesuh nih Farasi mi hna kha lenglei thianhlimnak nak in chunglei thianhlimnak a biapi deuh tiin a cawnpiak hna.
A kan cawnpiak mi cu Khrihfa kan sinak ah hin biaknak lei phung kan zulh lawng si loin kan zumhnak kha dawtnak, le a thianghlimmi lungthin in kan i nunpi ding a herh timi kha a si.
Khrih nih biatak luatnak a kan pek taktak cang ko.
Voikhat nak Bible chungah Paul nih luatnak a hmu cang mi Galati Khrihfa hna kha sual tannak ah um, kir ṭhan lo dingin a cawnpiak hna. Cuarpar tannak a herh timi bianak phung lawng ah um peng loin Pathian veel le dawtnak, Jesuh Khrih cungah zumhnak ngeih dingin a cawnpiak hna.
Khrihfa luatnak kan timi ah hin kanmah duh mi paoh kan tuah cang lai timi a si lo. Sualnak chungin a luat mi kan si cang caah lenglei tuah sernak lawng kha si loin chunglei in dawtnak he Pathian fanu fapa sinak kha cohlaan thiam in nun ding kha a si.
Nifatin Missa tuahnak ah kan i tel kho ko men lai. Rosary thlacamnak zong kan tuah ko men lai. Rawl ulhnak zong kan tuah leng mang ko men lai. Biaknak lei rianṭuannak zongah kan i tel lengmang ko men lai. Hi kan tuahmi vialte hna cung ah hin Dawtnak lungthin kan telh chih taktak hna maw timi hi a herh. Mi dang hna nih an kan zohchuk sual lai tiin minung mithmai menmen lawng a zoh tu kan si sual lo ding kha a herh. A tak in kan zoh dingmi cu Pathian mithmai tu kha a si deuh.
Cuasicaah, a kan cawnpiak duhmi cu a fiang ngai ko. Khrih nih dawtnak in pakhat le pakhat pehtlaihnak tuah ding, cutin kan tuah tik zongah lenglei tuah sernak men lawng si loin chunglei in a ra mi dawtnak chungah hrambunh in tuah a herh timi kha a si.
Khrih nih a kan pek mi luatnak a ngei mi kan si a si ahcun Pathian rianthiang kha duhnak taktak he kan ṭuan ko lai. Pakhat le pakhat cung zongah i ngaihthiam khawhnak lungthin kan ngei kho hna lai. Cun mi dang hna nih a kan hmuh lo caan hmanh ah kan tuah sernak, kan ṭuan kawl hawlnak ah kan fel kho zungzal lai.
Pathain cu lenglei a zoh mi a si lo. Chunglei a zoh tu a si.
“Bawipa nih cun mi i an zohning in a zoh lo; mi nih cu leng lei langhning kha an zoh, sihmahsehlaw Bawipa nih cun lungthin kha a zoh.” (1Samuel 16:7)
Thazaang petu /- Fr. Fidelis Maung Sein