Daihnak caah Thlacamṭinak kum 40 tlinnak tonpumhnak ah Pope nih Assisi khua a tlawn lai

Italy ram, Assisi khua ah Oct 25 in 27 tiang biaknak phunkip in hruaitu hna cu biaknak pakhat le pakhat kar ah daihnak le rualremnak a um khawhnak hnga thlacamṭinak an ngei lai. Cu thlacamṭinak cu St John Paul II nih a rak thawkmi asi i tu thla (October 2026) ah kum 40 a tlinnak puai zong a si. Italy ram laifang i a ummi Assisi khua ah 1986 October 27 ah, Pope John Paul II (St.John Paul 2nak) cu Vawleicung Daihnak caah Thlacamnak Ni (World Day of Prayer for Peace) ah a rak i tel ve. Cu daihnak thlacamṭinak ahcun vawlei cung biaknak phunkip in lutlai le hruaitu hna le ai-awhtu palai hna i ton in thlacamṭinak avoikhatnak asi i cuti in tawlreltu le sawmnak a tuahtu le a thawktu cu Pope John Paul 2 asi.

 Cu tonnak le thlacamṭinak in thazaang a ngahbiktu hna lakah Catholic zumtu Khrihfa sawhsawh (Catholic lay association) phu pakhat a simi (Sant’Egidio Community) zong an i tel ve i cu phu hna nih cun Europe ram le hmun dangdang hna ah kum fatin ‘Assisi Lungput’ timi daihnak caah rianṭuannak le forhfialnak ṭhanchoter ding ah an i zuam. Assisisi khua ah Daihnak caah Thlacamṭinak kum 40 tlinnak puai ah Pope Leo 14 a ra lai ti kan theih caah kan tha a nuam tiah Assisisi khua i Bishop Felice Accrocca nih a chim. Cupin ah biaknak dangdang hruaitu lutlai hna le Pope Leo 14 nih daihnak caah thlacamṭinak an tuahnak thawng in buaibainak le raltuknak vialte ngol ding ah kan i zuammi kan rianṭuannak ah thazaang ṭhawnnak asi lai tiah ruahchannak kan ngei tiah a ti.