Bawipa Sin Thluachuah Halnak

Nihin ni tiangah caan ṭha, caan sunglawi a kan petu a min thiang thangṭhat in um ko seh. Nihin kan nu Bupi nih a kan timhpiakmi (Lk. 11:5-13), a saupah caah (11:9) nak te lawng kha kan vun langhter lai. “Cucaah hihi kan chimh hna; hla u law, pek nan si lai, kawl u law nan hmuh lai, king u law innka hun piak nan si lai,” Bawipa thawngṭhabia a si. 

Hihi tlangtar in thazaang pek le ruah ṭi kan duh hna. Kan Bawipa Jesuh Khrih nih a biakamnak chungah hal u law pek nan si lai timi hi nifatin zumtu kan nunnak ah kan hman cio i kan hal cio, thla kan cam cio tawn ko. 

Asinain zeiruanh ah dah kan hmuh lo ti a si ahcun, pakhatnak ah Pathian duhnak nakin kanmah duhnak kha pa kan pek deuh, cucaah a si. A pahnihnak ah kan halmi kha kanmah kan thlarau nunnak caah, harnak ah a cang ko dingmi a si caah a si. Pathumnak ah a hmun, a fekmi ralṭhatnak, lungdonghnak kan ngeih caah lungdong loin thlacam awkah Bawipa nih a kan duhpiakmi a si caah a si. Pathumnak ah kan halmi nakin a ṭha deuhmi, aa tlak deuhmi kan thlarau nunnak caah Bawipa kan Pathian nih pek a kan duh caah a si, ti hi nihin ah kan hmuh khawhmi a si. Cucaah thla kan cam tikah hin thlacam kan timi hi zeidah a si ti a si ahcun, thaw chuah le thaw dawp bantukin chim a si. 

Minung kan nunnak ah suimilam pakhat chung thaw chuah lo le thaw dawp loin kan kaa hi kan phit hna sehlaw, kan hnar hna hi kan phit hna sehlaw zeitindah kan um lai ti a si ahcun a thi ding kan si. Cuve bantukin zumtu kan nunnak ah hin thla kan cam lo a si ahcun nihin kan thlarau nunnak ah nikhat hnu nikhat a zawr chin lengmang. Ni khatkhat kan thlarau a thi te ding kha kan si. Cucaah lungdong lo tein thlacam awkah nihin Luke thawngṭhabia chungah kan hmuh khawhmi a si. Cuve bantuk tein Paul zong nih First Theselonica (5:17) chungah, “A zulzal in thlacam u” tiah a kan forhmi hi nihin ah kan hmuh khawhmi a si. Cucaah nihin thlarau lei kan pa hna nih zeitindah sikaan te hna an ni suai ti a si ahcun, an nunnak ah khan zingka thawhka ah ka khuk bilh in thla ka cam hlan ah hin ka ke kha na kar hlang lai lo tiah kaa ti e, an ti. 

Zingka ka thawhka ah Bible ka rel hlan ahcun cadang zeihmanh rel lo ding tiah kaa ti, an ti. Zingka ka thawhka ah Pathian thangṭhatnak caah ka kut ka thlir hlan ah hin ka kut in zeihmanh ka tawng lai lo tiah kaa ti e, tiah Thlarau lei an ṭhannak dingah Bawipa he biaruah ṭi, Bawipa sinah thlacamnak zeitluk in dah a ṭhawn, zeitluk in dah a ṭhat ti kha an nunnak ah an theih fian caah, cuve bantuk tein an thlarau nunnak caah sikaan tein an ni suaimi a si. Cucaah Billi gram hna zong nih zeitindah an chim ti a si ahcun, “Zumtu kan nunnak ah a herh bikmi cu pakhatnak ah thlacamnak a si, a pahnihnak zongah thlacamnak, a pathumnak zongah thlacamnak a si,” an ti. 

Cucu zei ruangah dah a si tiah cun thlacamnak hi zeitluk in dah a ṭhawn, thlacamnak hi zeitluk in dah a ṭhat ti kha an theih fiang caah a si. Cu thlacamnak cu kan Bawipa kan Pathian a lung a thlentertu thlacamnak zong a si ti hi nihin Bible cathiang chung kan zoh tikah tampi kan hmuh khawhmi a si. Cu thla kan cam tikah zeiruang ah kan Bawipa kan Pathian nih kan thlacamnak a kan leh lo? ti a si ahcun, tuna ikan chim bantuk te khan Pathian duhnak nakin kanmah duhnak pa kan pek deuh caah a si. Cun bible chung kan zoh tikah zeitin? Nan sualnak ruangah a si e, a ti. Nan thlacamnak a theih lo cu, an leh lo cu nan sualnak ruangah a si, a ti. 

Cucaah dawtmi u le nau hna thla kan cam hlan ah zeitindah kan tuah lai, kan thlacamnak a kan leh dingah, kan thlacamnak a kan theih piak dingah pakhatnak ah thluachuahnak kan hmuhmi, kan comi vialte cu Bawipa kan Pathian sinah kan i lawm lai i, a pahnihnak ah kan thlacamnak, bawmh kan hal dingmi a kan leh dingah kan sual kan palhnak vialte kan i ngaihchih lai i, kan duh kan herhmi vialte kha kanmah duhnak nakin amah Pathian duhnak kha papek deuh in kan hal a si ahcun kan biakmi kan Pathian nih hin a kan pek hrimhrim lai ti kha kan hmuh khawhmi a si. 

Nihin thawngṭhabia chungah zeidah kan hmuh, “mipa pakhat nih a hawi, khualtlung, a ngei i a hawipa sinah a va kal i changreu te hna a va hal tikah a hawipa nih, “Kan it cang kan fale he, innka zong kan hrenh ding cang, kan tho kho lai lo,” a ti hna. Asinain lungdong lo tein cu a hawipa sinah cun a va kal i a va hal peng caah cun ningzak loin a hal peng hrat caah khan a herhmi paoh cu a pek ko lai e,” a ti. Cucaah nanih zong hal u law pek nan si lai, kawl u law nan hmuh lai, king u law innka hunpiak nan si lai e,” a ti. Thlacamnak ah a ranpi bikmi cu zeidah a si tiah cun, peknak in thlacamnak hi a rang bikmi a si. 

Nihin ah nang le keimah kan duh kan herhmi vialte kha hmuh colh hna usih ti kan duh a si ahcun peknak in thla kan cam a si ahcun innka kan Bawipa Jesuh nih hunpiak in thluachuah kha a kan pek colh lai. Hal u law pek nan si lai a timi cu a liam in a liammi a thluachuahnak veel chungin nang le kei nih lungdong lo tein kan hal tikah kan hmuh te ding a si. Cucaah thlacam a ṭha bikmi cu peknak in thlacam cu a rang bikmi le a ṭha bikmi a si ti zong kha thazaang pek chih kan duh hna. Cucaah nihin lung dong lo tein thla kan cam dingah kan Bawipa Jesuh nih a kan chimhmi, a kan cawnpiakmi chungah, cuve bantukin a hawipa zong cu lungdong lo tein a hal hrat peng caah a hawipa caah, khualtlung a ngeimi caah a hawipa nih a pek timi kha kan hmuh khawhmi cu a si. Cuve bantukin nannih zong nan fale nih an in halmi thengte kha pek nan duh, an thiam bantuk tein Vancung khua i a ummi nan Pa zong cu nan halmi kha, thlarau a halmi cu zeitluk in dah a pek chin chin lai e, a ti. 

Nang le kei nu le pa sinak in fale nih a kan halmi te kha kan pek thiam ko bantukin nang le kei zong Thiang Thlarau kan hal a si ahcun kan Bawipa kan Pathian nih a kan pek hrimhrim ko lai ti kha nihin ah kan hmuh khawhmi a si. Cucaah zumtu nun cu thlacam nun a si i nifatin kan nunnak ah hin thlacamnak he kan nunnak hi thlacamnak in a hmangmi kan si khawhnak dingah siseh, kan halmi vialte kha kanmah duhnak nakin amah Pathian duhnak bantuk tein lungdong lo tein nifatin kan nunnak ah thlacamnak he St. Theresa hna bantuk tein aa pekchan khomi zumtu kan si khawhnak hnga i zuam usih. 

Hal u law pek nan si lai, kawl u law nan hmuh lai, king u law innka hun piak nan si lai. A ngaitu nan dihlak cungah Bawipa thluachuahnak um ko seh. Amen.

Thazaang petu /- Saya William