Rosary Bawinu Mary Sin Bawmh Halnak

Nihin ni caan ah nunnak, damnak a kan pek lawng si loin a dawtnak in lam a kan hruai i atu bantukin a biathiang in thazaang i lak ṭi dingah caan ṭha, caan sunglawi a kan serpiaktu kan Pathian a si caah kan Pathian a min ka thangṭhat. RVA in thazaang a latu zumtu nan dihlak cungah Bawipa nih a thar in thluachuah in pe ko hna seh. 

Nihin ni cu kan nu Bupi nih Rosary Siangpahrang Bawinu puai a kan tuahpiak ni a si i cu kong he pehtlai in thazaang i lak ṭi dingah chim ka duh. Rosary thlacamnak kan timi le Rosary Siangpahrang Bawinu kan timi he pehtlai in nihin ni caan ah kan nu Bupi nih zeitindah a kan cawnpiak timi le a tuanbia te kha chim ka duh. Rosary thlacamnak kan timi cu kanmah RC nih hin thla kan cam tikah phunhnih in kan cam a tawinak in kan chim ahcun. 

A pakhatnak cu kanmah tein kan duh, kan herhmi paoh kha Pa Pathian sinah kan hal, kan chim. Cun Bawinu Mary le Mithiang vialte hna he hmunkhat in Pa Pathian sinah kan duh, kan herhmi vialte kha kan hal i thla kan cam. Cucu kan thlacamnak ah phunhnih in ṭhen khawh a si. Rosary thla kan cam tikah hin cu rosary thlacamnak le cun Siangpahrang Bawinu puai kan tuahnak aa thawknak kong kha hika ah zeitindah kan hmuh tiah cun, (1541) kum ah khan Bawinu Mary nih Mithiang Dominic sinah a lang i, “Kei cu Rosary Siangpahrang Bawinu ka si” a ti, Rosary kha a pek, “Rosary thlacam u” a ti. Cun thlacam ningcang le thlacamnak kan cam ruangah zeibantuk ṭhathnemnak kan hmuh i zeibantuk thluachuahnak dah kan co timi zong kha a chim chih. 

Cun nihin i kan tuahmi puai he pehtlai in Crusades raldohnak aa thawk i, cu Crusades raldohnak kan timi cu kanmah laimi nih cun kan theih kan hngalhtuk mi kha a si i, atu le atu kan theih pengmi le kan tuah pengmi kha a si i tampi chim a hau lo tiah ka ruah. Asinain hlan lio i Cursades raldohnak an tuah ning le nihin i kan tuahmi Crusades tu hi aa dang deuh in ka hmuh. Muslim pawl nih Khrihfa pawl kha an rak doh i tampi an rak tei hna. Khrihfa pawl kha an sung deng. Cu tikah kan Pope Pius V nih zeitindah a ti tiah cun, Khrihfa vialte kha, “Rosary thlacam u, hi Crusades raldohnak kan tei khawhnak ding caah hin Rosary thlacam u,” tiah a forh hna. Cu tikah Vawlei cung Khrihfa mi vialte nih Rosary thla an cam i, cuticun Muslim ral kha an rak tei ti kha kan hmuh. 

Cucaah cun kan Pope pa kha aa lawmtuk hringhran i, kum (1571) ah khan Rosary Siangpahrang Bawinu puai kha a rak tuahpi hna. Cuticun nihin ni tiang Rosary Siangpahrang Bawinu puai kha kan tuahnak cu a si. Cucu Muslim pawl an rak teinak, ral an rak teinak in khan aa thawkmi a si. Cucaah cun Rosary kan camnak thawngin cun zei bantuk thluachuahnak dah kan hmuh, zei bantuk hmual dah a ngei timi kha hika zawnte ah chim ka duh. 

Bawinu Mary nih St. Dominic sinah a chimmi cu zeidah a si tiah cun, “Rosary hi cam u, biatak tein Rosary hi nan cam ahcun nan luat lai,” a ti, “Cun misual mi hna nih an cam ahcun nunthlennak an hmuh lai,” a ti. Cun biatak tein Rosary thla a cammi cu a thlacamnak kha a hmuh hrimhrim lai,” a ti. A thlacamnak kha a tling hrimhrim lai, a ti. Cun zeidah a chim rih tiah cun, “Rosary kha biatak tein nan cam ahcun, sual ral nan tei lai a ti, Satan ral nan tei lai a ti, khuachia ral nan tei lai a ti. Thil ṭhalo vialte, ṭhatlonak vialte kha nan tei dih lai a ti. Cucaah cun Rosary thlacamnak cu thlacamnak vialte lakah a ṭhawngbik kan tinak cu a si. 

Vawlei cung i Rosary thla a cam ruangah Pathian hmual, Pathian ṭhawnnak a langmi tampi a um, tehte a khaanmi tampi an um. A dam kho ti lomi mizaw tampi zong nih biatak tein Rosary thla an cam i damnak an hmuh. A si khawh ti lo an timi khuaruahhar vansang in an um lio caan zongah biatak tein Rosary thla an cam i, Pathian thilti khawhnak aa lang, aa phuang. Cuticun Rosary thla an camnak thawngin Pathian sinin thluachuahnak tampi kan hmuh. Cu ruangah cun Rosary thlacamnak hi a ṭhawngbik kan tinak cu a si. Zeiruangah Rosary thlacamnak hi a ṭhawngbik kan ti? Bible cacaang in kan zoh ahcun, Rosary thla kan cam tikah hin mah ti hin kan chim sawh lo. 

A pakhatnak ah kan cammi cu Bawipa thlacamnak (Vancung um kan Pa) kha kan cam. 

A pahnihnak ah Vancungmi Gabriel nih Bawinu Mary sinah thawng a thanhnak, Elizabeth nih Bawinu Mary sinah a thangṭhatnak kha kan cam. Bible (Gospel) chung i a ummi kha kan cam ruangah nunthiannak a kan pek, hlawhtlinnak a kan pek, teinak a kan pek. Cucaah cun Rosary kan cammi hi a dangdang kanmah duhmi kan cam nakin cun Rosary thlacamnak cu a ṭhawnnak cu a si, teinak kan hmuhnak cu a si. A ruang cu Bible bia kha kan chim. Bible bia kha atu le atu kan chim ruangah nunthiannak, teinak a kan pek i hlawhtlinnak a kan pek. 

Cucaah cun dawtmi u le nau vialte hna Rosary thla kan cam i sual ral kan tei i, satan ral kan tei i kan duh, kan herhmi vialte kan co khawhnak ding caah nifatin te kan nunnak ah hin Rosary thlacamnak ah ṭang usih law, Bawinu Mary le Mithiang vialte hna he hmunkhat in Pa Pathian sinah pekchanh hna usih timi kha nihin caan ah chim ka duh. A ngaitu nan dihlak cungah Bawipa nih thluachuahnak in pe ko hna seh.  

Thazaang petu /- Saya Simon Hram Ling