Pope Leo nih a chimmi cungah Cardinal charles Bo i a hmuhning

         Pope nih hriamnam karhchoter nakin minung limhang, biaruahnak le daihnak kong kha biapi ngaiin a chim i raltuknak ca i hmanmi phaisa hna le neuclear hriamnam kong ah a thinphannak kha a langhter.

       Pope Leo nih remdaihnak kong a chimmi kongah Cardinal Bo i a hmuhning…Pope nih a chimmi bia hna hi ka sunsak ngai. Zeicahtiah hihi nihin kan vawlei pi ca lawng si loin kan Kawlram ca hrim ah a thuk ngaimi le a sullam a ngei ngaimi a si. Thiang Thlarau nih ralrinnak a kan pekmi cu, Daihnak cu hriamnam in ser khawh a si lo, tihi a si. Thazaang hmannak, tlerhkhonnak le mah duhnak kha midang cungah hramhram in va khinhnak nih daihnak a ser kho bal lai lo. Raltuknak nih hin chikkhatte cu buainak kha a daihter lai nain a hmunmi daihnak cu a um kho lai lo. Pope Leo zong nih daihnak cu, ”Biaruahnak, tlukruannak le minung man ngeihternak in tuah dingmina si,” a ti. 

      Kan Kawlram zongah buainak, zaangennak, inn le lo chuahtaknak le sifah harnak hna cu mipi nih kum caan saupi kan tuar. Hi lio caan ah hin ”Aho nih dah a tei lai” timi nakin ”Zeitindah minung nunnak kan khamh lai i zeitindah daihnak kan ser lai,” ti tu hi biahalnak kan tuah deuh awk a si. 

   Kan Pope pa zong nih Kawkram kong kha ramkip ah atu le atu a chim theo tawn. Tu kum January thla ah khan ramkip palai phu hna hmaiah biatak tein a chim. 

       Keimah nih cun Pope aw hi Kawlram.mipi caah ruahchannak a kan petu aw a si, tiah ka ruah. Bupi i a ttuanvo cu kehlei ah ttang in ramkhel nawlngeihnak lak dingah a si lo. Kan rian nganbik cu minung nunnak kgamh ding, biadik chim ding, mi le mi karah Daihnak Hlei serpiak hi a si. Cucaah Bupi nih a biapi ngaimi rian pakhat a ngei.

     Pope nih a chim bantukin a caan ah cun daihnak kan aupimi hi pakpalawng a si, kan ti caan a um ko lai. Sihmanhsehlaw Bupi cu dai tein a um bal lai lo. Kan au lengmang ko lai. Kan sawm lengmang ko hna lai. Thla kan cam lengmang rih ko lai. Remnak ser dingin kan forh lengmang ko hna lai. 

        Cucaah kan Pope pa aw hi tha tein kan ngaih a herh. Daihnak cu derthawmnak a si hrim lo. Biaruahnak cu sungzatlaknak a si lo. Ngaihthiamnak cu derthawmnak lam si loin a ra laimi minung tefa hna a kham khotu ding ralthatnak lamthluan a si.

     Kan Kawlram caah kan thlacamnak cu pakhat lawng a si.

Hriamnam aw dai seh.

Minung nunnak khamh hna seh.

Biaruahnak thawk cang hna seh.

Cun hmunkhatte in daihnak ser hna seh.

Cucu Pope Leo (14) aw lawng si loin Thawngtha bia aw zong a si.